NAHUM 2 - Edisana ñwed Abasi Ibom

Abasi Ɔmɔŋ Osobo Nineveh

¹ ANDISUAN ɔmɔdɔk edi ke iso fo; tiŋ enyin ke ɔkɔ ekɔŋ, kpeme ɔkpɔ-usuŋ, sɔŋɔ isin, sɔŋɔ odudu eti-eti.

² Koro Jehovah amada ubɔŋ Jacob afiak edi, kpa nte ubɔŋ Israel: koro mbon-ŋwo ebumede mmɔ fap-fap, enyuŋ ebiatde ŋkɔk mmɔ.

³ Otu-ekɔŋ mbon-ŋwo esie emeyibe: mkpɔsɔŋ owo emesine ididuot ke idem: mme chariot enyene ikwa ikaŋ ke usen utim-ŋkpɔ esie; mmɔ enyene mme cypress.

⁴ Mme chariot edama ke efak, eyɔrɔ itɔk-itɔk ke aŋwan, ebiet nsaraŋ ikaŋ, esɔp nte obuma.

⁵ Enye eti ikpɔ owo esie; mmɔ etuak ukot eduɔŋɔ ke isaŋ mmɔ: esɔp itɔk esim ibibene esie, enyuŋ etim ŋkpɔ ufuk mbon-ekɔŋ enim.

⁶ Mme usuŋ akpa ena iŋwaŋ; ufɔk edidem onyuŋ atara.

⁷ Omonyuŋ ɔwuhɔ: efuhɔre enye idem: eda enye edɔk: nditɔ-iban esie enyuŋ etuaŋa, ebiet uyo ibiom: mmɔ etuak ikpanesit mmɔ.

⁸ Ndien Nineveh edi mkpɔdiɔhɔ-mmɔŋ kpa toto ko: ndien mmɔ efeŋe; mbufo etuak eda: ndien baba owo kiet ikabakede.

⁹ Mbufo ebume silver, ebume gold: ŋkpɔ-uto inyeneke utit: kpukpru oruk ndinem ŋkpɔ esin enye odobi.

¹⁰ Enye etie ukpɔk ye ikpikpu, ye ubɔk-ubɔk: ndien esit atara; edɔŋ enyuŋ enyek: ɔkpɔsɔŋ ubiak onyuŋ odu ke kpukpru isin; iso kpukpru mmɔ enyuŋ ekabare kpai.

¹¹ Nna mme lion, emi onyuŋ edide ebiet udia mkparawa lion, odu mmɔŋ? Emi ayara ye uman lion ekesaŋade do, eyen lion ŋko, ndien baba owo kiet eke esinde mmɔ ndik ikoduhe?

¹² Ayara lion awai se ikemde ye nditɔ esie, onyuŋ efik unam itɔŋ ɔnɔ iban esie; onyuŋ esin se enye awaide ke ndudu esie, ye se enye omumde ke nna esie ɔyɔhɔ.

¹³ Jehovah mme udim ɔdɔhɔ ete, Sese, mmɔŋ nnam ikɔ ye afo. Ndien nyefɔp mme chariot esie nnam edi nsuŋ-ikaŋ: ofut eyenyuŋ adia mkparawa lion fo: ndien nyesibe se afo awaide ke isɔŋ mfep, ndien idikopke aba uyo mme isuŋ-utom fo.