NAHUM 1 - Edisana ñwed Abasi Ibom

Abasi Ayat Esit ye Nineveh

¹ UYO JEHOVAH EMI ABAŊA NINEVEH. ŊWED ŊKUKUT NAHUM ELKOSHITE.

² Jehovah edi Abasi ufup ye usiene: Jehovah osio usiene onyuŋ ɔyɔhɔ ifuresit. Jehovah osio usiene ye mme asua esie, onyuŋ ɔkɔhɔrɔ mbon utɔk esie.

³ Jehovah isɔpke iyaresit, enye onyuŋ okpon odudu, edi enye idiyakke mme edue-isop ebɔhɔ: usuŋ Jehovah odu ke idio ye ke oyobio, obubit enyɔŋ onyuŋ edi obu ukot esie.

⁴ Enye aduari inyaŋ ibom, onyuŋ anam enye asat, onyuŋ anam mmɔŋ okure ke kpukpru mme akpa: Bashan eyemere ye Carmel ŋko, nsehe Lebanon onyuŋ eyemere.

⁵ Ikpɔ obot enyek ebak enye, ŋkpri obot enyuŋ etara: iso esie esin isɔŋ ofut, ye ekondo ye kpukpru mme andiduŋ ke esit.

⁶ Anie ekeme ndibigi ke iso ifuresit esie? Anie onyuŋ ekeme ndida ke ikaŋ iyaresit esie? Enye aŋwaŋa ifuresit esie nte ikaŋ, onyuŋ obom ikpɔ itiat.

⁷ Jehovah ɔmɔfɔn, edi ɔkpɔsɔŋ ebiet ke usen ukut; enye onyuŋ ɔfiɔk mmɔ eke ebuɔtde idem mmɔ ye enye.

⁸ Edi enye eyeda akwa ɔtɔ mmɔŋ osobo ebiet esie; ndien ekim eyebine mme asua esie.

⁹ Mbufo eduak nso ŋkpɔ ebaŋa Jehovah? Enye eyenam ama: afanikɔŋ iditɔŋɔke ntak itibe.

¹⁰ Koro ke ini mmɔ esuk ebebari nte ikɔt ŋkukim, enyuŋ eŋwɔŋ wine ekpa, eyeta mmɔ nte etak nnyanyaŋa eke asatde ama.

¹¹ Owo kiet emi aduakde idiɔk abaŋa Jehovah, kpa oburobut ɔnɔ-item, okoto fi ke esit.

¹² Ntem ke Jehovah ɔdɔhɔ, ete, Okposuk edi nte mmɔ edide mfuri-mfuri, enyuŋ ewakde ntem, ntem ke edisibe mmɔ efep ŋko, ndien enye eyetak. Okposuk edi nte ŋkotukde fi, nditukke aba fi.

¹³ Ndien ke emi ke ndibuŋ fi ɔkpɔnɔ esie ke idem mfep, nnyuŋ ŋkibi uruk fo.

¹⁴ Jehovah omowuk abaŋa fi, ete ke ididaha aba enyiŋ fo baba itɔ ke isɔŋ: nyesibe edisɔi ye editara mbiet mfep ke ufɔk mme abasi fo: nyenim udi fo; koro afo edide obukpo.

¹⁵ Sese, ukot enye emi adade eti mbuk edi, emi ɔkwɔrɔde emem, edu ke ikpɔ obot! O Judah, nim ederi fo, sio mme akaŋa fo: koro oburobut owo miditɔŋɔke aba ntak isaŋa fi ke esit: emesibe enye efep ema.