MME ŊKE 7 - Edisana ñwed Abasi Ibom

Mme Ŋkari Aŋwan Akpara

¹ EYEN mi, nim ikɔ mi, nyuŋ dip mme ewuhɔ mi ke esit fo.

² Nim mme ewuhɔ mi, ndien du uwem; nim ido mi nte eyen enyin fo.

³ Tebe mmɔ dian ke nnuenubɔk fo, wet mmɔ sin ke ɔwɔŋ esit fo.

⁴ Dɔhɔ eti ibuot, ete, “Afo edi eyen-ete mi aŋwan”; nyuŋ kot asian, ete, Ada:

⁵ Man mmɔ ekpeme fi mbak esen aŋwan, mbak esen aŋwan eke eniŋede ikɔ inua.

⁶ Koro ŋketiede ke window ufɔk mi, ke lattice mi ke nnyuŋɔ;

⁷ Ndien ŋkut eyenɔwɔŋ kiet emi ananade ibuot, ke otu mbon ɔkɔi, ndiɔŋɔ enye ke otu mkparawa,

⁸ Asaŋa ke efak, ekpere ɔtɔ aŋwan oro; ndien oduk usuŋ ufɔk esie,

⁹ Ke mfuŋ-mfuŋ mbubreyo, ke eyo okutde, ke ufɔt okoneyo, kpa ke ɔkpɔsɔŋ ekim:

¹⁰ Ndien, sese, ŋwan kiet osobo ye enye, esine edisine-ŋkpɔ akpara, onyuŋ enyene ŋkari ke esit.

¹¹ Enye edi owo uyom ye owo eneni; ukot esie iduŋke ke ufɔk esiemɔ.

¹² Usuk ini ke efak, usuk ini ke aŋwa, onyuŋ etie ke kpukpru inuk ebet.

¹³ Ndien enye (Ŋwan) omum enye, onyuŋ otim enye inua, ɔsɔŋ enyin, onyuŋ ɔdɔhɔ enye, ete,

¹⁴ Mme uwa emem ena enɔ mi; mfin emi ke nsio mme akaŋa mi.

¹⁵ Mmɔdo ŋwɔrɔde nte ndisobo ye afo, ndiyom iso fo, ndien mmokut fi.

¹⁶ Mmebri ɔfɔŋ ke bed mi, mbuaha ndidi Egypt.

¹⁷ Nda myrrh, ye aloes, ye cinnamon, nsime ke bed.

¹⁸ Yak nnyin ika ndien, ikeyuhɔ ima tutu eyo esiere: yak ima adat nnyin esit.

¹⁹ Koro ete miduhe ke ufɔk esie, enye amaka anyan ebiet:

²⁰ Ada ekpat inyene ke ubɔk esie, eyenyuŋ edi ke ufɔk esie ke ɔyɔhɔ ɔfiɔŋ.

²¹ Ŋwan akabare eyen oro ke uwak ŋkari ikɔ esie, ada nneminua esie odudi enye aka.

²² Enye etiene ŋwan oro ke edem ini kiet aka, nte enaŋ akade ndikpa, ye nte owo-ŋkpɔkɔbi akade ufen ndisime owo;

²³ Tutu idaŋ okim enye esit; nte ntarusuŋ ɔsɔpde oduk ke afia, ndien mifiɔkke ite eyom uwem imɔ.

²⁴ Mbufo nditɔwɔŋ, ekop ndien uyo mi, enyuŋ ekpaŋ utɔŋ ke ikɔ inua mi.

²⁵ Kuyak esit fo awaha oduk ke usuŋ esie, kudiyo ke ɔkpɔ-usuŋ esie.

²⁶ Koro enye ama ɔnɔ ediwak owo unan ɔduɔŋɔ ke isɔŋ: ndien kpukpru owo eke enye okowotde edi mkpɔsɔŋ owo.

²⁷ Mme usuŋ obio ekpo edi ufɔk esie, esuhɔre ke mme ubet mkpa.