MME ŊKE 4 - Edisana ñwed Abasi Ibom

Mme Ufɔn Odude ke Owo Ndinyene Ɔniɔŋ

¹ MBUFO nditɔwɔŋ, ekop item ete, enyuŋ ekpaŋ utɔŋ ke ifiɔk ye asian:

² Koro mmotim nteme mbufo eti ŋkpɔ, mbufo ekukpɔŋ ido mi.

³ Koro ŋkedide eyenɔwɔŋ nnɔ ete mi, ye ekpri ikpɔŋ eyen ke enyin eka mi.

⁴ Ndien enye eteme mi, onyuŋ ɔdɔhɔ mi, ete, Yak esit fo afat ikɔ mi; kpeme mbet mi, nyuŋ du uwem.

⁵ Nyene eti ibuot, nyene asian: kufre, kunyuŋ uwɔŋɔre ukpɔŋ ikɔ inua mi,

⁶ Kukpɔŋ enye, ndien enye eyekpeme fi: ma enye, ndien enye eyekama fi.

⁷ Ata akpan ŋkpɔ edi eti ibuot; nyene eti ibuot: nyuŋ nyene asian ye ofuri inyene fo.

⁸ Kpono enye, ndien enye eyefori fi: enye eyenɔ fi ubɔŋ ke ini afo afatde enye.

⁹ Enye eyeyara fi ediye mbana ŋkpɔ ke ibuot: eyenɔ fi anyanya eke enyenede uyai.

¹⁰ Eyen mi, kop, nyuŋ nim ikɔ mi; ndien isua uwem fo eyewak.

¹¹ Mmeteme fi nsin ke usuŋ eti ibuot; nnam fi asaŋa ke usuŋ emi enende.

¹² Ke ini afo asaŋade, ukot fo idikɔmɔkede; ndien ke ini afo efehede itɔk, udutuakke ukot uduɔ.

¹³ Sɔŋɔ mum item kama, kuyak: nim enye; koro enye edide uwem fo.

¹⁴ Kuduk ke usuŋ oburobut owo, kunyuŋ usaŋa ke usuŋ mme anam idiɔk;

¹⁵ Kpɔŋ enye, kusaŋa ke esit ube, wɔŋɔre kpɔŋ enye, ndien be nyɔŋ.

¹⁶ Koro mmɔ midehe idap, ke minamke idiɔk; idap onyuŋ atiam mmɔ, ke mmɔ minamke owo ɔduɔ.

¹⁷ Koro mmɔ esuk ededia uyo idiɔk ido, enyuŋ eŋwɔŋ wine afai.

¹⁸ Edi usuŋ nti owo ebiet uŋwana eke asiahade, aka iso ayama, tutu osim ufɔt uwemeyo.

¹⁹ Usuŋ mme idiɔk owo ebiet ata ekim: mmɔ ifiɔkke se edituahade eduɔŋɔ.

²⁰ Eyen mi, nim ibuot ke ikɔ mi; kpaŋ utɔŋ fo ke uyo mi.

²¹ Kuyak mmɔ esop fi ke enyin; kpeme mmɔ ke ɔwɔŋ esit fo.

²² Koro mmɔ edide uwem mmɔ eke ekutde mmɔ, ye se iŋwaŋade mmɔ ofuri idem.

²³ Tim kpeme esit fo kan kpukpru se ekpemede; koro uwem otode enye.

²⁴ Dianare ke ndiɔk-inua, nyuŋ men ŋkwaŋa uyo ke idem fo nim nsan-nsan.

²⁵ Sak enyin fo se edinen; yak mkpɔk-enyin fo enyuŋ eneŋere ese ke iso fo.

²⁶ Dodomo usuŋ ukot fo, ndien kpukpru usuŋ fo esɔŋ eda.

²⁷ Kuwɔŋɔre uka nnasia, kunyuŋ uwɔŋɔre ufien sio ukot fo fep ke idiɔk.