MME HEBREW 5 - Edisana ñwed Abasi Ibom

Ekpeme Mbak Mbufo Ediduɔ Ekpɔŋ Mbuɔtidem

¹ KORO ke ememek kpukpru akwa oku, eke esiode ke otu owo enim enɔ owo kabaŋa ŋkpɔ Abasi, man enye emen enɔ ɔsɔk Abasi, onyuŋ awa uwa kabaŋa mme idiɔk-ŋkpɔ;

² emi onyuŋ ekemede ndime ime ye mme ɔkɔi ye mme edue-ibet, sia enye ke idem esie edide owo emi mmem-idem akande enye okuk:

³ Ndien oto ke ntak emi, ana ɔnɔ enye ndiwa uwa idiɔk-ŋkpɔ mbaŋa idem esie, kpa nte enye awade abaŋa mbio-obio.

⁴ Ndien baba owo kiet idaha itie-ukpono emi inɔ idem esie, edi ada, ke adaŋemi Abasi okotde enye, kpa nte okokotde Aaron.

⁵ Kpasuk ntre Christ ikɔnɔŋɔ Idem Esie ubɔŋ iyom ite enim Imɔ nte Akwa Oku; edi Andinɔ Enye ubɔŋ oro edi Enye emi eketiŋde ɔnɔ Enye ete, Afo edi Eyen Mi, Mmobon Fi mfin emi.

⁶ Onyuŋ ɔdɔhɔde ke ebiet efen ete, Afo edi oku ke nsinsi Nte utɔ Melchizedek asaŋade.

⁷ Ke mme usen emi Enye odude ke obukidem Enye ɔkɔbɔŋ akam onyuŋ anam mkpe-ubɔk ye ɔkpɔsɔŋ eseme ye mmɔŋ-eyet ɔnɔ Abasi emi ekemede ndinyaŋa Enye nsio ke mkpa, Abasi onyuŋ eyere Enye, koro Enye eteŋede Abasi;

⁸ okposuk edi nte Enye edide Eyen, Enye ekpep nsuk-ibuot ɔfiɔk oto ke ndutuhɔ eke Enye okutde;

⁹ ndien ke ema ekenam Enye ɔfɔn ama, Enye akabare edi ntak nsinsi erinyaŋa ɔnɔ kpukpru owo emi ekopde uyo Esie;

¹⁰ edi Enye ke Abasi okokot ete, Akwa Oku nte utɔ Mechizedek asaŋade.

¹¹ Nnyin imenyene ediwak ikɔ nditiŋ mbaŋa ŋkpɔ emi, eke esɔŋde ndisiak, sia utɔŋ mbufo ema ekabare edobi.

¹² Koro ke ini mbufo ekpedide mme anditeme owo efen adaŋemi, mbufo etɔŋɔ ntak eyom owo ekpep mbufo akpa eritɔŋɔ ukpep-ŋkpɔ Abasi; ema enyuŋ ekabare edi mmɔ emi mmɔŋeba ɔfɔnde ye mmɔ, midige ata udia.

¹³ Koro owo ekededi eke awapde eba anana ifiɔk abaŋa ikɔ edinen ido, koro enye edide kaŋa eyen nsek.

¹⁴ Edi ɔkpɔsɔŋ udia enyene mmɔ emi ema ekokoŋ ewɔrɔ idaha, kpa mmɔ emi otode ke nnam-mehe mmɔ ema ekɔ ifiɔk ndidiɔŋɔ se ifɔnde ye se idiɔkde.