MME HEBREW 3 - Edisana ñwed Abasi Ibom

Moses Ekedi Isuŋ-Utom Abasi Edi Christ Edi Eyen Abasi

¹ MMƆDO, ndisana nditɔ-ete, emi enyenede udeme ke ikot eke otode ke heaven, ese Apostle ye Akwa Oku emi nnyin inyimede ite idi ikɔt Esie, kpa Jesus;

² emi akanamde akpanikɔ ye Abasi emi ekemekde Enye onim, kpa nte Moses okonyuŋ anamde akpanikɔ ke ofuri ufɔk Abasi.

³ Koro ebat ete Enye emi odot ubɔŋ akan Moses, adaŋa nte ɔbɔp-ufɔk enyenede ubɔŋ akan ufɔk

⁴ Koro kpukpru ufɔk enyene andibɔp, edi Enye emi ɔkɔbɔpde kpukpru ŋkpɔ edi Abasi.

⁵ Ndien ke akpanikɔ Moses akanam akpanikɔ ke ofuri ufɔk Abasi nte asaŋutom, man enye edi ntiense mme ŋkpɔ eke editiŋde ke ukperedem;

⁶ edi Christ ke anam akpanikɔ nte Eyen, emi akarade ufɔk Abasi: ndien nnyin idi ufɔk Abasi emi, edieke nnyin isɔŋɔde imum uko nnyin ye mbure eke nnyin iburede ke idori-enyin nnyin tutu osim akpatre.

⁷ Ntre, kpa nte Edisana Spirit ɔdɔhɔde, Mfin, edieke mbufo edikopde uyo Esie,

⁸ Ekusɔŋ esit mbufo nte mmɔ ekesɔŋde, ke ini mmɔ eyatde Abasi esit, Ke usen emi mmɔ ekedomode Enye ke wilderness,

⁹ Ke ɔtɔ nte mme ete mbufo ekedomode Mi ese, Enyuŋ ekut se nnamde ke isua aba.

¹⁰ Mmɔdo nkeyat esit ye mbio eyo emi, Mma nnyuŋ ndɔhɔ nte, mmɔ eyoyo kpukpru ini ke esit mmɔ: Mmɔ inyuŋ ifiɔkke usuŋ Mi;

¹¹ Mma ŋŋwɔŋɔ ke iyaresit nte, Mmɔ ididukke ke nduɔk-odudu Mi.

¹² Nditɔ-ete, ekpeme mbak ndusuk idiɔk esit unana mbuɔtidem edidu owo mbufo kiet ke idem, ke eriwɔŋɔre ŋkpɔŋ Abasi uwem:

¹³ Edi enɔ kiet eken item kpukpru usen adaŋa nte ini ekerede mfin mbak, idiɔk-ŋkpɔ edida abiaŋa esie ɔsɔŋ owo ekededi ke otu mbufo esit:

¹⁴ koro nnyin imakabare idi mme abuana ŋkpɔ ye Christ, edieke nnyin isɔŋɔde imum mbuɔtidem eke ikenyenede ke eritɔŋɔ tutu osim akpatre:

¹⁵ ke adaŋemi edɔhɔde ete, Mfin, edieke mbufo edikopde uyo Esie, Ekusɔŋ esit mbufo, nte mmɔ ekesɔŋde ke ini mmɔ eyatde Abasi esit.

¹⁶ Koro manie ekokop enyuŋ eyat Enye esit? nte idige kpukpru mmɔ eke esaŋade ye Moses ewɔŋɔ ke Egypt?

¹⁷ Abasi okonyuŋ ayat esit ye manie isua aba? Nte idige ye mme anam idiɔk-ŋkpɔ, emi mme okpo mmɔ eduɔŋɔde ke desert?

¹⁸ Enye okonyuŋ ɔŋwɔŋɔ ɔnɔ manie ete, mmɔ ididukke ke nduɔk-odudu Imɔ, ke mibɔhɔke mbon ntut-utɔŋ?

¹⁹ Ntre ke nnyin ikut ite mmɔ ikekemeke ndiduk oto ke unana mbuɔtidem.