MICAH 7 - Edisana ñwed Abasi Ibom

Nditɔ Israel Ema Ebiara Ofuri Ofuri

¹ ƆDƆDIƆK ye ami! koro ntiede nte etetde ndat-ndat mfri: mbiet ŋkeŋe-ŋkeŋe mfri vine: baba etuek kiet eke owo adiade iduhe: baba akpa ndat fig eke ɔdɔŋde mi ukpɔŋ.

² Owo eke amade Abasi atak ke isɔŋ: baba owo kiet eke enende ke otu owo iduhe: kpukpru mmɔ edibe eyom iyip, kiet ada iyire ebine eken.

³ Ubɔk mbiba edoro ke idiɔk man etim enam: ɔbɔŋ ye ebierikpe ŋko eyom utip: akwa owo onyuŋ etiŋ se idɔŋde ukpɔŋ esie: ntem ke mmɔ ekwaŋa ŋkpɔ.

⁴ Mmɔ eke efɔnde ke otu mmɔ ebiet ŋkukim: mmɔ eke enede ediɔk ekan ɔkɔ akpap: usen mbon ukpeme fo ye eke ufen fo ke edi: ke emi ke ndutime mmɔ edidi.

⁵ Mbufo ekunim uyo nsaŋa ke akpanikɔ, ekubuɔt idem ye ata ufan: kpeme usuŋ inua fo bak ŋwan emi anade fi ke ikpanesit.

⁶ Koro eyen-eren esede ete esie ke ndek, eyen-aŋwan onyuŋ omiom ye eka esie: ŋwan eyen onyuŋ oyom eka ebe esie ikɔ; mbon usua owo edi nditɔ ufɔk esiemɔ.

⁷ Edi ami nyetiŋ enyin ke Jehovah: nyebet Abasi emi anyaŋade mi: Abasi mi eyekop uyo mi.

⁸ Kubure ubaŋa mi, O usua mi; ke ini nduɔde, nyedaha ke enyɔŋ; ke ini ntiede ke ekim, Jehovah eyedi uŋwana mi.

⁹ Nyeyɔ ifuresit Jehovah, koro nduede enye: tutu enye edibiere ikɔ mi, onyuŋ ekpe ikpe mi: enye eyesio mi onim ke uŋwana: nyekut edinen ido esie.

¹⁰ Ndien usua mi eyekut, ndien but eyefuk enye emi ɔkɔdɔhɔde mi, ete, Jehovah Abasi fo odu mmɔŋ? Enyin mi eyekut enye: ke emi enye eyedi se edigide nte mbat aŋwa.

¹¹ Ke usen eke edidiɔŋde ibibene fo, ke usen oro ke edinam adaŋa (fo) okpon.

¹² Ndien ke usen oro, owo eyeto ke Assyria, ye ke mme obio Egypt edi ke ebiet fo, ɔtɔŋɔde ke Egypt ŋko tutu osim akpa, ye ke inyaŋ kiet tutu osim inyaŋ eken, ye ke obot kiet tutu osim obot eken.

¹³ Ndien isɔŋ emi eyena ikpikpu abaŋa mme andiduŋ enye, oto ke mfri ido mmɔ.

¹⁴ Da esaŋ fo bɔk ikɔt fo, kpa ufene emi afo enyenede, emi eduŋde ikpɔŋ ke akai ke ufɔt Carmel: mmɔ eyeta mbiet ke Bashan ye ke Gilead, kpa nte eyo oko.

¹⁵ Kpa nte usen emi afo okotode ke Egypt ke ndiwut enye mme utibe ŋkpɔ.

¹⁶ Mme idut eyekut mi, ndien but ofuri odudu mmɔ eyenam mmɔ: mmɔ eyeda ubɔk mmɔ edori ke inua, utɔŋ mmɔ eyebakare edi inan.

¹⁷ Mmɔ eyedei ntan nte urukikɔt, eyetie ke ndudu mmɔ enyek idem nte mme andinyɔni ke ntan: eyetiene Jehovah Abasi nnyin ke ndik, enyuŋ edikhe fi.

¹⁸ Anie Abasi ebiet fi, ke efen mme ukwaŋ-ŋkpɔ, ke adahado ke idiɔk ido owo udeme esie emi esuhɔde? Ikɔhɔkede iyaresit esie ke nsinsi: koro enye adatde esit ndifɔn ido.

¹⁹ Enye eyetɔŋɔ ntak atua nnyin mbɔm, eyedigi mme idiɔk ido nnyin; afo eyemen kpukpru mme ukwaŋ-ŋkpo mmɔ ɔduɔk ke udem inyaŋ.

²⁰ Afo eyenɔ Jacob akpanikɔ, ɔnɔ Abraham ufɔn oro afo ɔkɔŋwɔŋɔde ɔnɔ mme ete nnyin ke eyo oko.