MICAH 6 - Edisana ñwed Abasi Ibom

Utɔk Emi Abasi Enyenede ye Nditɔ Israel

¹ MBUFO ekop ndien se Jehovah ɔdɔhɔde, ete, Daha ke enyɔŋ, kpe ikɔ ke iso ikpɔ obot, nyuŋ yak ŋkpri obot ekop uyo fo.

² Ikpɔ obot ye ikpɔ itiat emi ererimbot odorode ke esit, mbufo ekop utɔk Jehovah: koro Jehovah ɔtɔhɔde utɔk ye ikɔt esie, onyuŋ anamde ikɔ ye Israel.

³ O ikɔt mi, nnam mbufo nso ŋkpɔ? Nnyuŋ nda nso mfek mbufo? Mbufo ebɔrɔ ebaŋa mi.

⁴ Ŋkɔm ŋkada mbufo ke isɔŋ Egypt ndɔk, nnyuŋ mfak mbufo nsio ke ufɔk ufin; nnyuŋ ndɔŋ Moses ye Aaron ye Miriam, nte ebem mbufo iso.

⁵ O ikɔt mi, mbɔk, mbufo eti se Balak edidem Moab okodiomide, ye se Balaam eyen Beor ɔkɔbɔrɔde enye, ɔtɔŋɔde ke Shittim tutu osim ke Gilgal: man mbufo efiɔk edinen ido Jehovah.

⁶ Ndida nso ndi ke iso Jehovah, nda nso nnuhɔ nnɔ Edikoŋ Abasi? Nte ndida edifɔp uwa, nditɔ enaŋ isua kiet ndi enye ke iso?

⁷ Nte tɔsin okukim erɔŋ, ye tɔsin idim aran duop eyenem Jehovah esit? Nte nyenɔ ekpan mi ke ndudue mi, ye mfri idem mi ke idiɔk ido ukpɔŋ mi?

⁸ O owo, enye omowut fi se ifɔnde; ndien nso ke Jehovah oyom ye afo, ke mibɔhɔke ndinam se inende, nnyuŋ mma ima Abasi, nnyuŋ nsuk idem nsaŋa ye Abasi fo?

⁹ Uyo Jehovah ofiori okot obio, ndien mbon ifiɔk eyese enyiŋ fo: mbufo ekop eto ye uyo enye emi owukde enye.

¹⁰ Nte inyene idiɔk ido esuk ena ke ufɔk idiɔk owo, ye ekpri ephah, ata idiɔk-ŋkpɔ?

¹¹ Nte ami ŋkeme ndibat owo eke enyenede idiɔk balance ye ekpat itiat idomo abiaŋa ke edisana?

¹² Koro afai ɔyɔhɔde mbɔŋ esie ke idem, mme andiduŋ enye enyuŋ esu nsu; edeme mmɔ onyuŋ abiaŋa ke inua mmɔ.

¹³ Ami ŋko nyeyibi fi nnam ɔdɔŋɔ, nnyuŋ nsobo fi mbaŋa mme idiɔk ido fo.

¹⁴ Afo eyedia ŋkpɔ, edi uyuhɔke; esit eyenyuŋ ɔduɔ fi: afo ekpemen ŋkpɔ efep, udunimke mmɔ ke ifure; ndien nyeda se afo anyaŋade nyak nnɔ ofut.

¹⁵ Afo eyesuan, edi udukpeŋeke; eyenuak olive, edi uduyetke aran ke idem, eyenuak mmɔŋ mfri vine, ndien uduŋwɔŋke wine.

¹⁶ Ndien mmɔ enim mme ewuhɔ Omri, ye kpukpru se ufɔk Ahab akanamde, ndien mbufo esaŋa ke mme uduak mmɔ, man nnim fi ke ŋkpɔ nditaha, nnim mme andiduŋ enye ke se eside: mmɔdo mbufo eyebiom esuene ikɔt mi.