MICAH 5 - Edisana ñwed Abasi Ibom

Ini Ukara Andinyaŋa Emi Otode Jerusalem

¹ SƆP idem, ndien, O adiaha udim: enye akan nnyin okuk: mmɔ eda eto eyibi ebier-ikpe Israel ke mbaŋ.

² Ndien afo Beth-lehem Ephrathah, emekpri ke otu mme tɔsin Judah, edi owo eyeto fi ke esit ɔnɔ mi, eke edidide andikara ke Israel; enye emi eriwɔrɔ esie okodude tutuko, kpa ke eyo eset.

³ Mmɔdo enye eyeyak mmɔ ɔnɔ, tutu ŋwan eke amande aman ama: ndien nditɔ-ete esie eke esukde eyefiak etiene nditɔ Israel.

⁴ Ndien enye eyeda edibɔk ke odudu Jehovah, ke ubɔŋ enyiŋ Jehovah Abasi esie; ndien mmɔ eyebigi: koro ke emi ke enye edikpon tutu osim utit ererimbot.

⁵ Ndien emem eyedu ndien. Adaŋemi Assyria edidukde ke edem nnyin; adaŋemi enye onyuŋ edigide ikpɔ ufɔk nnyin, ndien nnyin iyedemere mme ekpemerɔŋ itiaba ye mbɔŋ eke eyetde mmɔ aran itiaita, ete eŋwana ye enye:

⁶ ndien mmɔ eyedia isɔŋ Assyria ke ofut, ye isɔŋ Nimrod ke inua-otop esie: ndien enye eyenyaŋa nnyin osio Assyria ke ubɔk ke adaŋemi enye odukde ke isɔŋ nnyin, ke enye onyuŋ edigide ŋkpɔ ke esit adaŋa nnyin.

⁷ Ndien nditɔ Jacob eke esukde eyedu ke otu ediwak mme idut, kpa nte mbara eke otode Jehovah, kpa nte edim eke edepde ke ikɔŋ, eke mibetke owo, minyuŋ ibeŋeke nditɔ owo.

⁸ Ndien nditɔ Jacob eke esukde eyedu ke otu mme idut, ke ufɔt ediwak obio, nte lion ke otu mme unam akai, mme mkparawa lion ke otu mme udim ŋkpri ufene: emi ke ini enye asaŋade ebe, edigi onyuŋ awai, ndien owo eke anyaŋade iduhe.

⁹ Afo eyemenere ubɔk fo aŋwana ye mbon-utɔk fo, ndien eyesibe kpukpru mme asua fo efep.

¹⁰ Jehovah onyuŋ ɔdɔhɔ, ete, Ndien ama ekem ke usen oro, nyesibe mme horse fo mfep ke otu fo, nye-nyuŋ nsobo mme chariot fo mfep:

¹¹ nyenyuŋ nsibe mme obio isɔŋ fo mfep, nnyuŋ ŋwuri kpukpru mkpɔsɔŋ ebiet fo:

¹² nnyuŋ nsibe fi idiɔŋ ke ubɔk mfep; ndien afo udunyeneke aba mbia-mfa:

¹³ nyenyuŋ nsibe ndisɔi mbiet fo, ye mbio-eto fo ke ufɔt fo mfep; ndien afo udutuakke aba ibuot unɔ se ubɔk fo akanamde.

¹⁴ Nyenyuŋ mbiat mme eto-mkpe fo ke ufɔt fo mfep, nnyuŋ nsobo mme obio fo.

¹⁵ Nyenyuŋ nda iyaresit ye ifuresit nsio usiene ye mme idut eke mikopke.