MICAH 4 - Edisana ñwed Abasi Ibom

Ŋkopitem Anam Owo Enyene Emem ye Ukpeme

¹ NDIEN ama ekem ke akpatre ini oro, obot ufɔk Jehovah eyewuhɔ ke ibuot ikpɔ obot, eyenyuŋ emenere enye ekan ŋkpri obot: ndien mme idut eyebuŋɔ eka do.

² Ndien ediwak mme idut eyeka ekedɔhɔ, ete, Edi, nnyin idɔk ke obot Jehovah, ye ke ufɔk Abasi Jacob; ndien Enye eyeda usuŋ esie ekpep nnyin, nnyin iyenyuŋ isaŋa ke ɔkpɔ-usuŋ esie: koro ewuhɔ eyeto ke Zion, uyo Jehovah eyenyuŋ oto ke Jerusalem.

³ Ndien enye eyekpe ikpe ke otu ediwak mme idut, onyuŋ asua ɔnɔ mkpɔsɔŋ mme idut tutu osim anyan ebiet; ndien mmɔ eyeda ofut mmɔ edom ŋkpɔ ufuŋ-isɔŋ, enyuŋ eda eduat mmɔ edom ikwa udiɔŋ-eto: ndien idut idimenke ofut itiene idut, idinyuŋ ikpepke aba ekɔŋ.

⁴ Ndien kpu-kpru mmɔ eyetie ke idak vine mmɔ ye ke idak fig mmɔ; ndien baba owo kiet eke edinamde mmɔ ndik ididuhe: koro edi inua Jehovah mme udim ɔdɔhɔ.

⁵ Koro kpukpru mme idut eyesaŋa ke enyiŋ abasi mmɔ; nnyiŋ iyenyuŋ isaŋa ke enyiŋ Jehovah Abasi nnyin ke nsinsi-nsinsi.

⁶ Jehovah ɔdɔhɔ, ete, Ke usen oro nyemen mbuŋɔ, nnyuŋ ntaŋ mmɔ eke ekebinde mmɔ efep, ye mmɔ eke ŋkotukde mbon.

⁷ Ndien nyenim mbufo ke nsuhɔ, nnyuŋ nda mmɔ eke ekebinde efep esin ke anyan ebiet, nnim ke ɔkpɔsɔŋ obio: ndien Jehovah eyedi edidem mmɔ ke obot Zion ke nsinsi ye ke nsinsi.

⁸ Ndien afo edikoŋ ufɔk otu ufene, obot adiaha Zion, akpa ubɔŋ, kpa itie-edidem adiaha Jerusalem, eyefiak edi edisim fi.

⁹ Ke emi nsinsm afo ofioride mfiori? Nte edidem iduhe ke otu mbufo? nte owo item fo amatak? koro ubiak omomum fi kpa nte ŋwan uman.

¹⁰ Kop ubiak, nyuŋ man eyen, O adiaha Zion, kpa nte ŋwan uman: koro afo eyeto ke obio ɔwɔrɔ ke idahemi, eyenyuŋ oduŋ ke iŋwaŋ, onyuŋ osim Babylon: eyenyaŋa fi do: do ke Jehovah edifak fi osio mme asua fo ke ubɔk.

¹¹ Ndien ke emi ediwak mme idut emesop idem ebaŋa fi, eke edɔhɔde, ete, Yak esabare enye, yak enyin nnyin enyuŋ ese Zion.

¹² Ndien mmɔ ifiɔkke uduak Jeho-vah, ekikere esie inyuŋ iŋwaŋake mmɔ: koro Enye eyetaŋ mmɔ obon nte ebek ke ɔtɔ ubek-ibokpot.

¹³ O adiaha Zion, daha ke enyɔŋ, nyuŋ bek: koro nyenam nduk fo edi ukwak, nyenyuŋ nnam ikpat ukot fo edi okpoho: ndien afo eyenuak ediwak mme idut: ndien ami nyenim udori mmɔ nnɔ Jehovah, nyenim inyene mmɔ nnɔ Ɔbɔŋ ofuri ererimbot.