MICAH 2 - Edisana ñwed Abasi Ibom

Idifɔnkefɔn Inɔ Mmɔ Emi Efikde Mbon Unana

¹ ƆDƆDIƆK ɔnɔ mmɔ emi ekerede idiɔk ido, enyuŋ enade ke bed mmɔ eduak ukwaŋ-ŋkpɔ! Mmɔ eyenam enye ke uŋwana usenubɔk, koro odude ke ukeme ubɔk mmɔ.

² Mmɔ enyuŋ esin esit mmɔ ke iŋwaŋ, ndien eda mmɔ ke ŋkanubɔk: enyuŋ esin esit ke ufɔk, ndien ebɔ mmɔ: mmɔ enyuŋ etuk owo ye ufɔk esie, etuk owo ye udeme esie.

³ Mmɔdo ntem ke Jehovah ɔdɔhɔ, ete, Sese, ami mmɔŋ ŋkere idiɔk-ŋkpɔ kiet mbaŋa idiɔk ufɔk emi, ŋkpɔ eke mbufo mikemeke ndisio itɔŋ mbufo ke esit mfep: midinyuŋ isaŋake iseri-iseri: koro enye edide idiɔk ini.

⁴ Ke usen oro owo eyetop ŋke abaŋa mbufo, onyuŋ eseme ata eseme mbɔm, ɔdɔhɔ ete, Nnyin imabiara kpukpru: enye ɔkpuhɔre udeme ikɔt nnyin: enye anam didie adaha ɔkpɔŋ mi? onyuŋ edeme iŋwaŋ nnyin ɔnɔ owo nsɔŋ ibuot.

⁵ Mmɔdo afo mudunyeneke owo eke edinyande uruk ke udeme ke otu mbon-esop Jehovah.

⁶ Mbufo ekutiŋ ikɔ. Ete, eyetiŋ; mitiŋke ntem, esuene iditreke.

⁷ Afo emi ekerede ufɔk Jacob, nte emesibe spirit Jehovah ɔmuhɔ? Nte mmɔ emi edi ido esie? Nte ikɔ mi ifɔnke ye owo eke eneŋerede asaŋa?

⁸ Ndien tutuko ikɔt mi edaha eda nte usua; mmɔ esioŋo ekura ekɔrɔ ye ɔfɔŋ-idem ke idem mmɔ eke esaŋade ke ndue-idem ebe, nte mmɔ eke etode ke ekɔŋ efiak edi.

⁹ Mbufo emebin iban ikɔt mi ke edima ufɔk mmɔ efep: emesio abak-inua mmɔ ubɔŋ mi ke idem efep ke nsinsi.

¹⁰ Mbufo edaha ke enyɔŋ eka: koro midige ebiet nduɔk-odudu (mbufo) edi emi: koro enye edehede, eyesobo (mbufo), ndien nsobo oro eyediɔk eti-eti.

¹¹ Edieke owo asaŋade ke spirit ye ke abiaŋa, edisu nsu, ete, Ami nyetiŋ nnɔ fi mbaŋa wine ye mmin; edi enye edidi etiŋ-ikɔ ɔnɔ mbio-obio emi.

¹² O Jacob, nditreke nditaŋ mbufo kpukpru mbon: nyenam Israel emi esukde esop idem: nyenim mmɔ ɔtɔ kiet nte ŋkpri ufene Bozrah, kpa nte otu ufene ke otu mbiet mmɔ, mmɔ eyenam uyom ebaŋa owo.

¹³ Andibuŋ emebem mmɔ iso ɔdɔk: mmɔ emebuŋ, enyuŋ ebe eduk ke inua-otop, enyuŋ eto ke esit ewɔrɔ: edidem mmɔ omonyuŋ ebem mmɔ iso ebe; Jehovah onyuŋ asaŋa nte etubom mmɔ.