MICAH 1 - Edisana ñwed Abasi Ibom

Micah Eseme Abaŋa Samaria ye Jerusalem

¹ UYO Jehovah emi okosim Micah Morashtite, ke eyo Jotham, Ahaz, ye Hezekiah, ndidem Judah, (uyo) emi ke enye okokut abaŋa Samaria ye Jerusalem.

² Mbufo kpukpru owo ekop! O isɔŋ, ye se iyɔhɔde ke esit, mbufo ekpaŋ utɔŋ! ndien yak Ɔbɔŋ Jehovah edi ntiense abaŋa mbufo, kpa Ɔbɔŋ ke edisana temple esie.

³ Koro, sese, Jehovah ke oto ke ebiet esie, eyenyuŋ ɔsuhɔre, onyuŋ edigi edikoŋ ebiet isɔŋ.

⁴ Ndien ikpɔ obot eyetara ke idak esie, mme itihere eyenyuŋ esiaha, kpa nte obukpa ɔkwɔk ke enyin ikaŋ, kpa nte mmɔŋ eke eŋwaŋade ke ŋwewere.

⁵ Ofuri ŋkpɔ emi oto ke idiɔk ido Jacob, ye ke ndudue ufɔk Israel. Nsidi ndudue Jacob? Nte idige Samaria? Nsidi ŋkokoŋo ebiet Judah? Nte idige Jerusalem?

⁶ Ndien nyenim Samaria nte ibombom ke ikɔt, ye ke ebiet eke etɔde iŋwaŋ-vine: nyenyuŋ ŋŋwaŋa mme itiat esie nsin ke ebedeŋ, nnyuŋ mfuhɔre ebiet emi enye adade ke esit.

⁷ Eyenyuŋ enuak kpukpru ndisɔi mbiet esie mbai-mbai: enyuŋ efɔp kpukpru ndisɔi mbiet ndem esie: koro enye ɔkɔde mmɔ ke utip akpara, ndien mmɔ eyekabare edi utip akpara.

⁸ Nyeseme nnyuŋ ntua mbaŋa ŋkpɔ emi, nyesioŋo ŋkpɔ ke idem nsaŋa iferi: nyeseme eseme nte jackal, nnyuŋ ntua nte ostrich.

⁹ Koro unan esie odorode ufiɔn; koro enye osimde Judah: enye omoduk ke inua-otop ikɔt mi, kpa ke Jerusalem.

¹⁰ Mbufo ekutiŋ ke Gath, ekutua eyet ke Akko: Beth-le-Aphrah, miaŋa ke ntan:

¹¹ andiduŋ Shaphir, saŋa be, iferi ye but: andiduŋ Zaanan iwɔrɔke; eseme Beth-ezel ɔbɔ mbufo idaha esie.

¹² Koro andiduŋ Maroth ekerede ekikere abaŋa mfɔn: koro idiɔk-ŋkpɔ otode Jehovah ɔsuhɔre ke inua-otop Jerusalem.

¹³ O andiduŋ Lachish, tebe chariot ke horse nsɔp-ukot: (enye ekedi ntak idiɔk ido adiaha Zion) koro mmɔ ekutde fi mme oburobut ŋkpɔ Israel ke idem.

¹⁴ Da ŋwed usio-ndɔ, ndien, nɔ Moresheth-gath: mme ufɔk Achzib enam abiaŋa ye ndidem Israel.

¹⁵ Nyenyuŋ nda andinyene ŋko ntiene fi, O andiduŋ Mareshah: enye eyesim Adullam ubɔŋ Israel.

¹⁶ Sin ibɔ, nyuŋ fat idet baŋa edima nditɔ fo: nam ufaŋ ibɔ fo aŋwaŋa nte ntrukpom: koro etaŋde mmɔ efep ekpɔŋ fi.