MATTHEW 8 - Edisana ñwed Abasi Ibom

Jesus Ɔkɔk Mme Owo Udɔŋɔ

¹ KE ini Enye otode ke obot ɔsuhɔre, ediwak otu owo etiene Enye.

² Ndien sese, owo akpa-mfia kiet asaŋa ekpere Enye, edituak ibuot ɔnɔ Enye, ete, Ɔbɔŋ, edieke onyimede, emekeme ndinam mi nsana.

³ Ndien Jesus anyan ubɔk, otuk enye, ete, Mmonyime, sana. Ndien ndo-ndo oro owo oro asana ɔbɔhɔ akpa-mfia esie.

⁴ Edi Jesus ete enye, Kpeme, kutiŋ unɔ baba owo kiet; edi nyɔŋ ke owut oku idem fo, nyuŋ wa enɔ eke Moses eketemede, man edi ŋkpɔ-ntiense ɔnɔ mme owo.

Jesus Ɔkɔk Eyen Ufɔk Centurion Kiet

⁵ Edi ke adaŋemi Enye odukde ke Capernaum, centurion kiet etiene Enye edikpe Enye ubɔk

⁶ ete, Ɔbɔŋ, owo mi ke ana ke ufɔk ɔdɔŋɔ akpa-ubeŋ, odu ke ata ndutuhɔ.

⁷ Jesus ɔdɔhɔ enye ete, Nyedi ndinam udɔŋɔ okure enye.

⁸ Centurion oro ɔbɔrɔ ete, Ɔbɔŋ, ndotke nte Afo okpodukde ke idak ɔkɔm mi; kam tiŋ suk ikɔ, ndien owo mi eyekop nsɔŋ-idem.

⁹ Koro ami ke idem mi ndu ke idak erikara, mmonyuŋ nnyene mbon-ekɔŋ eke esinede mi ke idak; nnyuŋ ndɔhɔ owo emi nte ka, ndien enye aka; nnyuŋ ndɔhɔ owo efen, nte, Di, ndien enye edi; nnyuŋ ndɔhɔ owo mi, nte, Nam emi, ndien enye anam.

¹⁰ Ke adaŋemi Jesus okopde ikɔ emi, enyene Enye nyɔ; Enye onyuŋ ɔdɔhɔ mmɔ emi etienede Enye, ete, ke akpanikɔ ke ndɔhɔ mbufo, akanam ŋkwe mbuɔtidem eke okponde ntem, kpa ke Israel.

¹¹ Edi ndɔhɔ mbufo nte, Ediwak owo eyeto ke edem usiaha-utin ye edem usop-utin, edisuhɔre etetie ye Abraham, ye Isaac, ye Jacob, ke Obio Ubɔŋ Heaven:

¹² edi eyeduɔk nditɔ Obio Ubɔŋ ke ekim ke aŋwa-aŋwa: do ke eritua eyet ye erita edet eyedu.

¹³ Ekem Jesus ɔdɔhɔ centurion, ete, Nyɔŋ okuo: yak osu ɔnɔ fi adaŋa nte onimde ke akpanikɔ. Ndien udɔŋɔ okure owo esie kpa ke ini oro.

Jesus Ɔkɔk Ediwak Owo

¹⁴ Ekem ke ini Jesus odukde ke ufɔk Peter, Enye okut eka ŋwan esie nte anade ɔdɔŋɔ ufiop-idem.

¹⁵ Ndien otuk enye ke ubɔk, ufiop-idem onyuŋ ɔkpɔŋ enye, enye onyuŋ adaha ke enyɔŋ anam ŋkpɔ ɔnɔ Enye.

¹⁶ Edi ke ini osimde mbubreyo, eda ediwak owo eke enyenede demon esɔk Enye: Enye onyuŋ ada ikɔ inua Esie ebin mme demon ɔduɔk, onyuŋ anam kpukpru mbon udɔŋɔ ekop nsɔŋ-idem:

¹⁷ man osu nte prophet Isaiah ɔkɔdɔhɔde, ete, Enye ke Idem esie ɔbɔ mmemidem nnyin ada, onyuŋ obiom mme udɔŋɔ nnyin.

Mme Mbet Jesus

¹⁸ Edi ke ini Jesus okutde nte ediwak otu owo ekande Enye ekuk, enye ɔnɔ uyo ete mme imɔ idaha ika ke edem oko.

¹⁹ Ndien scribe kiet edi edidɔhɔ Enye ete, Andikpep, nyetiene Fi ŋka ebiet eke Afo edikaka.

²⁰ Ndien Jesus ete enye, Ebua-ikɔt enyene ndudu, inuen enyɔŋ enyuŋ enyene mme efɔk; edi Eyen Owo inyeneke ɔtɔ eke odoride ibuot Esie.

²¹ Owo efen ke otu mbet ete Enye, Ɔbɔŋ, yak mbem iso ŋka ŋkobuk ete mi.

²² Edi Jesus ete enye, Tiene Mi; nyuŋ yak mme akpa-mkpa ebuk mme akpa-mkpa mmɔ.

²³ Ekem Enye ediere ke ubom, mbet Esie enyuŋ etiene Enye.

²⁴ Ndien sese, akwa oyobio otibe ke inyaŋ, tutu mbufut ke ofofuk ubom: edi Enye ɔduɔ idap.

²⁵ Ndien mmɔ edi edidemere Enye, ete, Ɔbɔŋ, nyaŋa nnyin; imɔŋ itak.

²⁶ Enye ete mmɔ, Nsinam mbufo efehede ndik, O mbufo nditɔ ekpri mbuɔtidem? Ekem Enye adaha ke enyɔŋ, asua ɔnɔ ofim ye inyaŋ; inyaŋ onyuŋ ana suŋ.

²⁷ Edi enyene mbon oro nyɔ, mmɔ enyuŋ ete, Nso oruk owo edi emi, emi kpa ofim ye inyaŋ ekopde uyo Esie.

²⁸ Ekem ke adaŋemi Enye osimde ke edem oko ke idut mme Gadarene, owo iba emi enyenede demon ewɔŋɔ ke mme udi edisobo ye Enye; mmɔ edama eti-eti, tutu baba owo kiet ikemeke ndisaŋa ke usuŋ oro mbe.

²⁹ Ndien sese, mmɔ efiori ete, Nnyin isaŋa nso ye Afo, Afo Eyen Abasi? Nte emedi ndituhɔre nnyin ke ini mikemke kaŋa ini?

³⁰ Otu ediwak edi edu do nsan-nsan edia ŋkpɔ.

³¹ Ndien mme demon ekpe Enye ubɔk, ete, Edieke edibinde nnyin iwɔrɔ, dɔŋ nnyin ika ikoduk otu edi ke idem.

³² Enye ete mmɔ, Eka. Ntre ke mmɔ ewɔŋɔ ekoduk ke idem mme edi: ndien sese, ofuri otu edi ebumere efeŋe esuhɔre ke ebedeŋ, eduɔŋɔ ke inyaŋ, ekpaŋa ke mmɔŋ.

³³ Edi mme andibɔk edi efeŋe eka ke obio, ekobuk ofuri ŋkpɔ, ye se ikotibede ye mmɔ oro ekenyenede mme demon.

³⁴ Ndien sese, ofuri obio ewɔŋɔ edi ndisobo ye Jesus; ndien ke adaŋemi mmɔ ekutde Enye, mmɔ ekpe Enye ubɔk, ete adaha ɔkpɔŋ edem mme imɔ.