MATTHEW 5 - Edisana ñwed Abasi Ibom

Jesus Ɔkwɔrɔ Ikɔ Ke Enyɔŋ Obot

¹ EKEM ke adaŋemi Enye okutde mme otu owo, Enye ɔdɔk ke akamba obot; ndien ke Enye ama ɔkɔsuhɔre etie, mbet Esie etiene Enye:

² Enye onyuŋ atat inua Esie ekpep mmɔ ete,

³ Ɔfɔfɔn ɔnɔ mmɔ eke ebuenede ke spirit: koro Obio Ubɔŋ Heaven enyene mmɔ.

⁴ Ɔfɔfɔn ɔnɔ mmɔ eke etuaŋade: koro eyedɔŋ mmɔ esit.

⁵ Ɔfɔfɔn ɔnɔ mmɔ eke enyenede ifure-ifure ido: koro mmɔ eyeda isɔŋ enyene.

⁶ Ɔfɔfɔn ɔnɔ mmɔ eke ekopde biɔŋ ye nsat-itɔŋ edinen ido: koro mmɔ eyeyuhɔ.

⁷ Ɔfɔfɔn ɔnɔ mmɔ eke etuade owo mbɔm: koro eyetua mmɔ mbɔm.

⁸ Ɔfɔfɔn ɔnɔ mmɔ eke esit mmo asanade: koro mmɔ eyekut Abasi.

⁹ Ɔfɔfɔn ɔnɔ mme anam emem: koro eyekot mmɔ nditɔ Abasi.

¹⁰ Ɔfɔfɔn ɔnɔ mmɔ eke owo ekɔbɔde mmɔ kabaŋa edinen ido: koro Obio Ubɔŋ Heaven enyene mmɔ.

¹¹ Ɔfɔfɔn ɔnɔ mbufo ke adaŋemi owo edisuŋide mbufo, enyuŋ enam mbufo isin-enyin, enyuŋ etiŋ kpukpru oruk idiɔk-ŋkpɔ ke nsu edian mbufo kabaŋa Mi.

¹² Edaresit, edara eti-eti: koro utip mbufo ke Heaven omokpon: koro kpa ntre ke mmɔ ekanam mme prophet emi ebemde mbufo iso edu isin enyin.

¹³ Mbufo edi inuŋ isɔŋ: edi inuŋ ama akabare adaba, edida nso enam enye enyene inem? ifɔnke aba ke baba ŋkpɔ kiet, ibɔhɔke nditop nduɔk, owo ndidigi ke ukot.

¹⁴ Mbufo edi uŋwana ererimbot. Obio eke ebɔpde ke enyɔŋ obot ikemeke ndidibe.

¹⁵ Owo inyuŋ idomoke utuenikaŋ ida abaŋ ifuk, edi owuk ke uwuk-utuenikaŋ; ntem ke uŋwana ayama ɔnɔ kpukpru owo eke edude ke ufɔk.

¹⁶ Kpa ntre yak uŋwana mbufo ayama ke iso owo, man mmɔ ekut nti utom mbufo, enyuŋ etoro Ete mbufo emi odude ke Heaven.

¹⁷ Ekuse ete ŋkedi ndiwuhɔre ibet ye mme prophet; ŋkedige ndiwuhɔre, ndi ndiwuk mma.

¹⁸ Koro ke akpanikɔ ke ndɔhɔ mbufo, Tutu enyɔŋ ye isɔŋ ebe efep, baba ntɔi kiet mme ekpri ŋkpɔ kiet idibehe ifep ke ibet, tutu kpukpru ŋkpɔ esu.

¹⁹ Mmɔdɔ owo ekededi eke edibiatde ata ekpri ibet emi kiet, edinyuŋ ekpepde owo efen nditiene mbiat, eyekot enye ata ekpri ke Obio Ubɔŋ Heaven: edi owo ekededi eke edinimde, edinyuŋ ekpepde owo efen ndinim, eyekot enye akamba ke Obio Ubɔŋ Heaven.

²⁰ Koro ndɔhɔ mbufo nte Edieke edinen ido mbufo mikanke eke mme scribe ye mme Pharisee, mbufo ididukke ke Obio Ubɔŋ heaven.

²¹ Mbufo emokop ete, ekɔnɔ mbio eyo oko uyo, ete, Kuwot owo: edi owo ekededi eke owotde owo esesin idem ke ikpe:

²² Edi Ami ndɔhɔ mbufo nte, owo ekededi eke ayatde esit ye eyen-ete esie esesin idem ke ikpe; owo ekededi eke ɔdɔhɔde eyen-ete esie ete, Raca (ikpikpu owo), esesin idem ke ikpe Sanhedrin; owo ekededi eke ɔdɔhɔde ete, Afo ndisime, esesin idem ke ufen hell eke asakde ikaŋ.

²³ Mmɔdo edieke adade enɔ fo edi ke itie-uwa, onyuŋ etide do ete, eyen-ete fo enyene ikɔ ye afo,

²⁴ kpɔŋ enɔ fo do ke iso itie-uwa, ka kebem iso nam emem ye eyen -ete fo, ndien di diwa enɔ fo.

²⁵ Wara nam emem ye owo-utɔk fo, ke adaŋemi afo odude ye enye ke usuŋ; mbak owo-utɔk fo edida fi ɔnɔ ebierikpe, ndien ebierikpe ayak fi ɔnɔ asaŋutom esop, ndien eduɔk fi ke ufɔk-ŋkpɔkɔbi.

²⁶ Ke akpanikɔ ke ndɔhɔ fi, Uduwɔrɔke do, tutu osio akpatre okuk isɔn fo.

²⁷ Mbufo emekop ete, ekɔnɔ owo uyo ete, Kusin efibe:

²⁸ edi Ami ndɔhɔ mbufo nte, Owo ekededi eke esede ŋwan ke enyin use ama esin efibe ye enye ama ke esit esie.

²⁹ Edi edieke enyin nnasia fo esinde fi ɔduɔ, wubere enye, top, duɔk: koro ɔfɔn ye afo ubak idem fo nditak utu ke ndikpɔduɔk fi ofuri idem ke hell.

³⁰ Onyuŋ edieke ubɔk nasia fo esinde fi ɔduɔ, sibe enye, top, duɔk: koro ɔfɔn ye afo ubak idem kiet nditak utu ke ndikpesin fi ofuri idem ke hell.

³¹ Ekenyuŋ edɔhɔ ete, Owo ekededi eke osiode ŋwan esie ndɔ, yak ɔnɔ enye ŋwed usio-ndɔ.

³² Edi Ami ndɔhɔ mbufo nte, owo ekededi eke osiode ŋwan esie ndɔ, ke mitoho ke ntak eridue ye erenowo, anam ŋwan oro akabare edi esin-efibe: owo ekededi eke edinyuŋ ɔdɔde ŋwan oro esiode enye ndɔ, edi esin-efibe.

³³ Ŋko, mbufo emekop ete ekɔnɔ mbio eyo oko uyo, ete, Kutomo ŋkpɔ ke nsu, edi nam nɔ Jehovah kpa nte ɔkɔŋwɔŋede.

³⁴ Edi Ami ndɔhɔ mbufo nte, Ekutomo baba ŋkpɔ kiet; ekutomo heaven, koro heaven edi itie-ubɔŋ Abasi;

³⁵ ekutomo isɔŋ, koro isɔŋ edi udori-ukot Esie; ekunyuŋ etomo Jerusalem, koro Jerusalem edi obio akwa Edidem.

³⁶ Kunyuŋ utomo ibuot fo, koro ukemeke ndinam idet kiet akabare edi afia mme obubit.

³⁷ Edi yak ikɔ mbufo edi; Edi ntre, ye, Idige ntre: koro se ibede oro oto ke andidiɔk.

³⁸ Mbufo emekop ete ekɔnɔ owo uyo, ete, Enyin ke usiene enyin, ye edet ke usiene edet.

³⁹ Edi Ami ndɔhɔ mbufo nte, Ekuŋwana ye anam-idiɔk: edi owo ama oyibi fi ke mfuk nnasia, kabare mfuk eken nɔ enye.

⁴⁰ Owo ama onyuŋ oyom ndikot fi ikpe mbɔ ekpri ɔfɔŋidem fo, yak ekura fo nɔ enye nko.

⁴¹ Owo ama onyuŋ esin fi asaŋa mile kiet, saŋa iba ye enye.

⁴² Nɔ owo eke ebeŋede fi ŋkpɔ, kunyuŋ udaha ukpɔŋ owo eke oyomde ndibuɔt ŋkpɔ ke ubɔk fo.

⁴³ Mbufo emekop ete ekɔnɔ owo uyo, ete, Ma mbɔhiduŋ fo, nyuŋ sua owo usua fo.

⁴⁴ Edi Ami ndɔhɔ mbufo nte, ema mme asua mbufo enyuŋ ebɔŋ akam eyom ufɔn mmɔ eke enamde mbufo isin-enyin:

⁴⁵ man mbufo edi nditɔ Ete mbufo emi odude ke heaven; koro Enye anamde utin Esie asiaha ɔnɔ mme idiɔk owo ye nti owo, onyuŋ anamde edim edep ɔnɔ ndinen owo ye mme anam ukwaŋ-ido.

⁴⁶ Koro edieke mbufo emade mmɔ eke emade mbufo, nso utip ke enyene? Nte kpa mme publican inamke suk ntre?

⁴⁷ Ndien edieke ekɔmde nditɔ-ete mbufo ikpɔŋ-ikpɔŋ, nso ke enam ebe adaŋa? Nte kpa mme Gentile inamke suk ntre?

⁴⁸ Mbufo efɔn ema ndien, kpa nte Ete mbufo ke heaven ɔfɔnde ama.