MATTHEW 3 - Edisana ñwed Abasi Ibom

Ukwɔrɔ Ikɔ John Baptist

¹ KE mme usen oro John Paptist oto edi edikwɔrɔ ikɔ ke desert Judaea, ete,

² Mbufo ekabare esit; koro Ubɔŋ Heaven ke ekpere.

³ Emi edi owo emi prophet Isaiah eketiŋde abaŋa enye, ete, Uyo andifiori ke desert, ete, Mbufo ediɔŋ usuŋ Jehovah, eneŋere ɔkpɔusuŋ Esie.

⁴ John oro esine edisine-ŋkpɔ eke edade idet camel enam, onyuŋ ɔbɔbɔ mbɔbɔ ikpa-unam ke isin; udia esie onyuŋ edi ŋkukuŋpkɔyɔriyɔ ye aranɔkwɔk-ikɔt.

⁵ Ekem mbio Jerusalem, ye ofuri Judaea, ye ofuri ŋkan-ŋkuk Jordan,

⁶ ewɔŋɔ etiene enye; enyuŋ ena baptistm ke ubɔk esie ke akpa Jordan, ke eyararede mme idiɔkŋkpɔ mmɔ.

⁷ Edi ke ini enye okutde ediwak mme Pharisee ye mme Sadduccee edide edina baptism ke ubɔk esie, enye ete mmɔ, Mbufo nditɔ urukikɔt, anie eketeme mbufo efeŋe ebɔhɔ iyaresit eke edide?

⁸ Esioŋo naŋa mfri eke ekemde ye erikabare esit:

⁹ ekunyuŋ ekere ndidɔhɔ ke esit mbufo, ete, Ŋkɔm nnyin imenyene Abraham ke ete: koro ndɔhɔ mbufo nte, Abasi emekeme ndinam mme itiat emi edaha eda edi nditɔ Abraham.

¹⁰ Edi kpa idahemi emonim ekudi ke itak eto: ntre ke ekpi kpukpru eto eke miŋwumke mfri eke eyede eduɔk, emen, esin ke ikaŋ.

¹¹ Ami nda mmɔŋ nnim mbufo baptism, man ekabare esit: edi Enye emi etienede Mi ke edem enyene odudu akan mi, emi mmendotke ndikama ikpa-ukɔt Esie; Enye eyenim mbufo baptism ke Edisana Spirit ye ikaŋ.

¹² Usakŋkpɔ Esie odu Enye ke ubɔk, Enye eyenyuŋ anam itie-ubekibokpot Esie otim asana, onyuŋ obon ibokpot Esie ke ubet, edi eyefɔp mbio ke ikaŋ eke midinimeke.

¹³ Ekem Jesus oto ke Galilee etiene John ke Jordan, ete onim Imɔ baptism.

¹⁴ Edi John aŋwana ndibiɔŋɔ Enye, ete, Ŋkam nyom Afo onim mi baptism, ndien Afo etiene mi?

¹⁵ Edi Jesus ɔbɔrɔ enye ete, Yak edi ntre ke emi: koro ntem ke odot nnyin ndinam kpukpru nti ido.

¹⁶ Ekem John onyime ɔnɔ Enye. Edi ke ini Jesus akanade baptism ama, kpa idaha oro Enye ɔwɔrɔ ke mmɔŋ ɔdɔk: ndien sese, enyɔŋ eberere ɔnɔ Enye, Enye onyuŋ okut Spirit Abasi ɔsuhɔrede nte ibiom edidoro Enye ke idem;

¹⁷ ndien sese, uyo oto ke enyɔŋ ɔdɔhɔ ete, Emi edi edima Eyen Mi, emi esit enemde Mi eti-eti ye Enye.