MATTHEW 28 - Edisana ñwed Abasi Ibom

Jesus Eset Ke Mkpa

¹ EDI ke utit sabbath, nte eyo ɔtɔŋɔde ndisiere ke akpa usen urua, Mary Magdalene ye Mary eken edi edise udi.

² Ndien sese, akwa unyek -isɔŋ odu: koro angel Jehovah okoto ke Heaven ɔsuhɔre edi edikpat itiat osio, onyuŋ etie ke esit.

³ Iso esie ebiet emireŋ-mireŋ, edisine-ŋkpɔ esie onyuŋ afia nte snow:

⁴ ndien oto ndik esie mbon-ukpeme enyek, enyuŋ ekabare etie nte mme akpa-mkpa.

⁵ Edi angel ɔbɔrɔ iban oro, ete, Mbufo ekufehe ndik: koro mmɔfiɔk nte mbufo eyom Jesus emi ekowotde ke cross.

⁶ Enye iduhe mi; Enye emeset kpa nte ɔkɔdɔhɔde. Edi edise ebiet emi Ɔbɔŋ akanade do.

⁷ Enyuŋ esɔp eka ekɔdɔhɔ mbet Esie, ete, Enye emeset ke mkpa; ndien sese, Enye ebem mbufo iso aka Galilee; mbufo edikut Enye do; sese, mmetiŋ do nnɔ mbufo.

⁸ Mmɔ enyuŋ ewara edaha ekpɔŋ udi ye ndik ye akwa idara, enyuŋ efehe edi ndida etop emi nsɔk mbet Esie.

⁹ Ndien sese, Jesus osobo mmɔ, ete mmɔ, Mmɔkɔm mbufo. Mmɔ enyuŋ edi edimum Enye ukot, etuak ibuot enɔ Enye.

¹⁰ Ndien Jesus ɔdɔhɔ mmɔ ete, Ekufehe ndik: eka ekɔdɔhɔ nditɔ ete Mi, ete, mmɔ enyɔŋɔ eka ke Galilee; mmɔ edinyuŋ ekut Mi do.

¹¹ Edi nte mmɔ esaŋade eka, sese, ndusuk mbon-ukpeme eduk obio, enyuŋ emen kpukpru se ikotibede etiŋ enɔ ikpɔ oku.

¹² Ndien ke ini mmɔ oro ema ekobono ye mbiowo, enyuŋ esobo ibuot ekere, mmɔ enɔ mbon-ekɔŋ ediwak okuk, ete mmɔ oro, Mbufo edɔhɔ ete,

¹³ Mbet Esie ekedi ke okoneyo ediyip Enye, ke adaŋemi nnyin idede idap.

¹⁴ Ndien edieke ikɔ emi osimde andikara utɔŋ, nnyin iyekpe ye enye, isio mbufo ke ndik.

¹⁵ Ntre mmɔ oro ebɔ okuk, enam nte etemede mmɔ: ndien ikɔ emi asuana ke otu mme Jew tutu osim mfin emi.

¹⁶ Edi mbet duopekiet eka ke Galilee ke obot oro Jesus okonimde ɔnɔ mmɔ.

¹⁷ Ndien ke ini mmɔ ekutde Enye, etuak ibuot enɔ Enye: edi ndusuk mmɔ eyik.

¹⁸ Edi Jesus asaŋa ekpere mmɔ, onyuŋ ɔdɔhɔ mmɔ ete, Enɔ Mi ofuri odudu ke heaven ye ke isɔŋ.

¹⁹ Mbufo eka ekanam kpukpru mme idut edi mbet Mi, enim mmɔ baptism esin ke enyiŋ Ete ye Eyen ye Edisana Spirit:

²⁰ enyuŋ ekpep mmɔ enam kpukpru ŋkpɔ eke ŋketemede mbufo: ndien sese, Ami ndodu ye mbufo kpukpru ini, tutu osim utit ererimbot. Amen.