MATTHEW 22 - Edisana ñwed Abasi Ibom

Jesus Otop Ŋke Abaŋa Usɔrɔ Ndɔ

¹ EKEM Jesus ɔbɔrɔ onyuŋ ɔtɔŋɔ ntak otop ŋke ɔnɔ mmɔ ete,

² Obio Ubɔŋ Heaven ebiet edidem kiet, emi anamde udia-ndɔ ɔnɔ eyen esie;

³ enye onyuŋ ɔdɔŋ ikɔt esie edidɔhɔ mmɔ emi ekokotde edi udia: ndien mmɔ inyimeke ndidi.

⁴ Enye ɔtɔŋɔ ntak ɔdɔŋ ikɔt esie efen, ete, Edɔhɔ mmɔ oro ekokotde ete, Sese mmanam udia mma, ewot enaŋ mi ye munam eke esehede, enyuŋ enam kpukpru ŋkpɔ ema: edi udia-ndɔ.

⁵ Edi mmɔ ikereke, enyuŋ edaha eduk ke afaŋ mmɔ, kiet aka iŋwaŋ esiemɔ, efen aka urua:

⁶ ndien mmɔ emi esukde emum ikɔt esie, enam mmɔ ido esuene, enyuŋ ewot mmɔ.

⁷ Edi edidem ayat esit, onyuŋ osio mbon-ekɔŋ esie ɔdɔŋ, ete esobo mbio obio oro, enyuŋ efɔp obio mmɔ ke ikaŋ.

⁸ Ekem enye ɔdɔhɔ ikɔt esie ete, Ema enam udia-ndɔ ema, edi mmɔ emi ekekotde idotke.

⁹ Mbufo eka ndien ke ŋwaŋa usuŋ ekekot kpukpru mmɔ eke edikutde edidi udia-ndɔ,

¹⁰ Ndien ikɔt esie ewɔŋɔ eka ke ɔkpɔusuŋ ekataŋ kpukpru owo, adaŋa nte mmɔ ekutde, mme idiɔk ye nti ŋko, edibon ɔtɔ kiet: ndien ubet udia ɔyɔhɔ ye mmɔ emi etiede ke okpokoro.

¹¹ Edi ke adaŋemi edidem odukde ndise mmɔ emi etiede, enye okut owo do eke misineke ɔfɔŋidem-ndɔ:

¹² onyuŋ ɔdɔhɔ enye ete, Ufan, afo anam didie oduk mi ke musineke ɔfɔŋidem-ndɔ? Edi enye inyeneke se ɔbɔrɔde.

¹³ Ekem edidem ɔdɔhɔ ikɔt esie ete, Ebɔp enye ubɔk ye ukot, enyuŋ etop enye eduɔk ke ekim ke esien; do ke eritua eyet ye erita edet eyedu.

¹⁴ Koro mmɔ eke ekotde ewak, edi mmɔ eke emekde iwakke.

¹⁵ Ekem mme Pharisee eka ekoduk odu, nte mmɔ edikɔkde afia emum Enye ikɔ-inua.

¹⁶ Ndien mmɔ esio mbet mmɔ ye mme Herodian edɔŋ ke ɔtɔ Esie, ete, Andikpep, nnyin imɔfiɔk ite Afo edi akpanikɔ, onyuŋ ekpep owo usuŋ Abasi ke akpanikɔ, unyuŋ ukereke owo; koro Afo uteŋeke owo enyin.

¹⁷ Sian nnyin ndien; Afo ese didie? nte enen ndinɔ Caesar utomo mme inenke?

¹⁸ Edi Jesus ɔfiɔk ibak mmɔ, onyuŋ ɔdɔhɔ ete, Nsinam edomode Mi, mbufo mbio mbubik?

¹⁹ ewut Mi okuk utomo. Ndien mmɔ eda okuk kiet esɔk Enye.

²⁰ Ndien Jesus obup mmɔ ete, Mbiet ye ŋwed emi enyene anie?

²¹ Mmɔ ete, Enyene Caesar. Ekem Enye ɔdɔhɔ mmɔ ete, Enɔ Caesar ndien ŋkpɔ eke enyenede Caesar; enyuŋ enɔ Abasi ŋkpɔ eke enyenede Abasi.

²² Ndien ke ini mmɔ ekopde, idem akpa mmɔ eti-eti, mmɔ enyuŋ ekpɔŋ Enye enyɔŋɔ.

²³ Usen oro mme Sadducee, emi edɔhɔde ete eriset ke mkpa iduhe, etiene Enye, ebup Enye

²⁴ ete, Andikpep, Moses ɔkɔdɔhɔ ete, Edieke owo akpade, ndien minyeneke eyen, yak eyen-ete esie ada ŋwan esie ɔdɔ, asiak ubon ɔnɔ eyen-ete esie.

²⁵ Nditɔ-ete itiaba ekodu ye nnyin: akpan ɔdɔ ŋwan, akpa, ndien, sia enye minyeneke eyen, ɔkpɔŋ ŋwan esie ɔnɔ eyenete esie.

²⁶ Ɔwɔrɔ kpasuk ntre ye udiana, ye ɔyɔhɔ ita, tutu osim ɔyɔhɔ itiaba.

²⁷ Ndien ke akpatre ŋwan nde akpa.

²⁸ Mmɔdo ke eriset ke mkpa, enye eyedi ŋwan anie ke otu mmɔ mbitiaba, koro kpukpru mmɔ ekadade enye nte ŋwan?

²⁹ Edi Jesus ɔbɔrɔ mmɔ ete, mbufo emedue, koro mbufo mifiɔkke ŋwed Abasi ye odudu Abasi.

³⁰ Koro ke eriset ke mkpa mmɔ idɔhɔ ndɔ inyuŋ idaha mmɔ inɔ ke ndɔ, edi mmɔ etie nte mme angel ke heaven.

³¹ Edi kabaŋa eriset ke mkpa, nte mbufo ikotke se Abasi ɔkɔdɔhɔde ete,

³² Ami ndi Abasi Abraham ye Abasi Isaac, ye Abasi Jacob? Enye idige Abasi mme akpa-mkpa, edi edi eke mme odu-uwem.

³³ Ndien ke mme otu owo oro ekopde, idem akpa mmɔ ye ukpep-ŋkpɔ Esie.

³⁴ Edi ke ini mme Pharisee ekopde ete Enye ama okokibi mme Sadducee inua, mmɔ esop idem ɔtɔ kiet.

³⁵ Ndien owo kiet ke otu mmɔ, emi edide ɔfiɔk-ibet, odomo Enye, obup Enye mbume, ete,

³⁶ Andikpep, ewe edi akamba item ke mbet?

³⁷ Jesus ɔdɔhɔ enye ete, Ma Jehovah Abasi fo ke ofuri esit fo, ye ke ofuri ukpɔŋ fo, ye ke ofuri ekikere fo.

³⁸ Emi edi akamba ye ebe-iso item.

³⁹ Udiana onyuŋ ebiet enye, ete, Ma mbɔhiduŋ fo nte idem fo.

⁴⁰ Ofuri mbet ye mme prophet esine ke mme item iba oro.

⁴¹ Ke ini mme Pharisee ebonode ɔtɔ kiet, Jesus obup mmɔ mbume ete, Mbufo ekere nso ebaŋa Christ? Enye edi Eyen anie?

⁴² Mmɔ ete Enye, Eke David.

⁴³ Enye ɔdɔhɔ mmɔ ete, Nsinam David ke Spirit okotde Enye, ete, Ɔbɔŋ, ete,

⁴⁴ Jehovah ɔdɔhɔ ye Ɔbɔŋ Mi ete, Tie ke ubɔk nnasia Mi, Tutu nda mme asua fo nnim Fi ke idak ukot?

⁴⁵ Edieke David ndien okotde Enye ete, Ɔbɔŋ, didie ke Enye edi eyen esie?

⁴⁶ Ndien ndomo owo kiet ikemeke ndibɔrɔ Enye ikɔ, ndien ɔtɔŋɔde ke usen oro aka iso, baba owo kiet idehede ibup Enye aba mbume efen.