MATTHEW 21 - Edisana ñwed Abasi Ibom

Jesus Oduk Jerusalem Uko Uko

¹ EKEM ke ini mmɔ esaŋade ekpere Jerusalem, enyuŋ esimde Bethphage ke obot Olive, Jesus osio owo iba ke otu mbet Esie ɔdɔŋ,

² Ete mmɔ, eka ekoduk ke obio-iŋwaŋ emi asakde iso ese mbufo, ndien idaha oro mbufo eyekut ass emi eyiride, ye eyen esie ye enye; etat mmɔ, eda esɔk Mi.

³ Ndien owo ekededi ama ɔdɔhɔ ŋkpɔ ye mbufo, ebɔrɔ ete, Ɔbɔŋ ke oyom mmɔ; ekem idaha oro enye eyenɔ mmɔ edi.

⁴ Ŋkpɔ emi ɔwɔrɔ man se prophet eketiŋde osu ete,

⁵ Mbufo edɔhɔ adiaha Zion, ete, Sese, Edidem fo ke edi ke ɔtɔ fo, Ɔsuhɔre idem, onyuŋ odoro ke ass, Ke abak ass, eyen uman ass.

⁶ Mbet enyuŋ eka ekanam kpa nte Jesus ɔkɔdɔhɔde mmɔ,

⁷ enyuŋ eda ass ye eyen esie edi, enyuŋ eda ɔfɔŋidem mmɔ ebri ke edem; ndien Jesus odoro enye ke edem.

⁸ Akamba ubak otu owo oro enyuŋ ebri ɔfɔŋidem mmɔ ke ɔkpɔusuŋ; mmɔ eken enyuŋ ekpeŋe ŋkɔk eto ebri ke ɔkpɔusuŋ.

⁹ Mme otu owo emi ebemde Enye iso ye mmɔ emi etienede ke edem efiori ete, Hosanna enyene Eyen David; Itoro enyene Enye emi edide ke enyiŋ Jehovah; Hosanna ke ata enyɔŋ.

¹⁰ Ekem ke ini Enye odukde ke Jerusalem, ofuri obio otime, ete, Anie edi emi?

¹¹ Edi mme otu owo edɔhɔ ete, Emi edi Jesus, prophet emi otode ke Nazareth, ke Galilee.

¹² Ndien Jesus oduk ke temple Abasi, onyuŋ ebin kpukpru mmɔ eke enyamde ŋkpɔ enyuŋ edepde ŋkpɔ ke temple efep, onyuŋ onuk mme okpokoro mme ɔkpuhɔ okuk ɔduɔk, ye mme itie mme anyam ibiom;

¹³ onyuŋ ɔdɔhɔ mmɔ ete, Ewet ete, ufɔk Mi eyekere ete, ufɔk akam, edi mbufo emanam enye akabare edi itie mbon-ŋwo.

¹⁴ Ndien mme nnan ye mme mbuŋɔ etiene Enye ke temple: ndien Enye anam udɔŋɔ mmɔ okure.

¹⁵ Edi ke adaŋemi ikpɔ oku ye mme scribe ekutde mme utibe ŋkpɔ eke Enye anamde, ye nditɔ emi efioride ke temple, ete, Hosanna enyene Eyen David, esit ayat mmɔ eti-eti, mmɔ enyuŋ edɔhɔ Enye ete,

¹⁶ Nte omokop se mmɔ emi edɔhɔde? Edi Jesus ɔdɔhɔ mmɔ ete, Edi ntre; nte akanam mbufo ikotke se ewetde ete, Afo osio itoro eke ɔfɔnde ama ke inua nsek-nditɔ ye mme awap-eba?

¹⁷ Ndien Enye ɔkpɔŋ mmɔ, ɔwɔrɔ ke obio aka Bethany akadaŋ do.

¹⁸ Edi ke usenubɔk nte Enye afiakde edi ke obio, okop biɔŋ.

¹⁹ Ndien ke ini Enye okutde eto fig ke mben ɔkpɔusuŋ, asaŋa ekpere, inyuŋ ikwe ŋkpɔ ke esit, ke mibɔhɔke ikɔŋ-ikɔŋ; onyuŋ ɔdɔhɔ eto oro ete, Mfri okuto fi oŋwum ɔtɔŋɔde ke emi tutu amama.

²⁰ Ndien idaha oro eto fig eyemere akpa. Edi ke ini mbet ekutde emi, mmɔ eyik eti-eti, ete, Eto fig eyemere didie akpa ini kiet ntre?

²¹ Edi Jesus ɔbɔrɔ mmɔ ete, Ke akpanikɔ ke ndɔhɔ mbufo, edieke mbufo enyenede mbuɔtidem, minyuŋ iyikke, idige se enamde ye eto fig emi ikpɔŋ ke mbufo edinam, edi edieke mbufo edɔhɔde kpa obot emi ete, Wuhɔre, kɔduɔ sine ke akwa inyaŋ, eyewɔrɔ osu.

²² Ndien kpukpru ŋkpɔ ekededi eke mbufo edibeŋede ke akam, edinyuŋ ebuɔtdeidem, mbufo eyenyene.

²³ Ekem ke ini Enye odukde ke temple, ikpɔ oku ye mbiowo obio etiene Enye, nte Enye ekpepde mme owo ŋkpɔ, enyuŋ edɔhɔ ete, Ada odudu ewe anam mme ŋkpɔ emi? ŋko, anie okonyuŋ ɔnɔ Fi odudu emi?

²⁴ Edi Jesus ɔbɔrɔ mmɔ, ete, Ami nde nyebup mbufo mbume kiet; mbufo ema ebɔrɔ Mi, Ami nyenyuŋ nsian mbufo odudu eke ndade nnam mme ŋkpɔ emi

²⁵ Baptism John okoto mmɔŋ? me oto heaven, me oto owo? Edi mmɔ eneni ke otu idem mmɔ, ete, Nnyin ima idɔhɔ ite, Oto heaven, Enye eyedɔhɔ nnyin ete, Nsinam mbufo mikonimke enye ke akpanikɔ ndien?

²⁶ Edi ima idɔhɔ ite, Oto owo; nnyin ifefehe otu owo; koro kpukpru owo edade John ke prophet.

²⁷ Ntre ke mmɔ ebɔrɔ Jesus ete, Nnyin ifiɔkke. Ndien Enye ɔdɔhɔ mmɔ ete, Ami nde nsianke mbufo odudu eke ndade nnam mme ŋkpɔ emi.

²⁸ Edi mbufo ese didie? Owo kiet ekenyene nditɔ-iren iba; enye onyuŋ etiene akpan ete, Eyen mi, ka kanam utom ke iŋwaŋ-vine mi mfin.

²⁹ Ndien enye ɔbɔrɔ ete, Ŋka ete, edi ikaha.

³⁰ Ete etiene udɔ ɔdɔhɔ enye kpasuk ntre. Edi enye ɔbɔrɔ ete, Ŋkaha; edi ama ekem, enye atua mkpɔfiɔk, aka.

³¹ Anie ke otu mmɔ mbiba anam se ete esie oyomde? Mmɔ ete, Udɔ. Jesus ɔdɔhɔ mmɔ ete, Ke akpanikɔ ke ndɔhɔ mbufo nte, mme publican ye mme akpara ebem mbufo iso eduk ke Obio Ubɔŋ Abasi.

³² Koro John akasaŋa ke usuŋ edinem ido etiene mbufo, ndien mbufo inimke enye ke akpanikɔ; edi mme publican ye mme akpara enim enye ke akpanikɔ; ndien ke ini mbufo ekutde, ituaha mkpɔfiɔk ke ukperedem, man mbufo nde enim enye ke akpanikɔ.

³³ Mbufo ekop ŋke efen. Owo kiet okodu emi edide ete-ufɔk. Enye onyuŋ ɔtɔ iŋwaŋ-vine, onyuŋ ɔbɔp ɔkɔ akan enye okuk, onyuŋ otibi obube unyimi-wine ke esit, onyuŋ ɔbɔp tower, onyuŋ ayak enye ɔnɔ mme ekpeme-iŋwaŋ, ndien adaha aka idut efen.

³⁴ Edi ke adaŋemi ini mbuŋwum ekperede, enye osio mme isuŋutom ɔdɔŋ ke ɔtɔ mme ekpeme-iŋwaŋ, ete ebɔ mbuŋwum imɔ.

³⁵ Ndien mme ekpeme-iŋwaŋ emum mme isuŋutom esie, emia kiet, enyuŋ ewot efen, enyuŋ etɔŋɔ efen ke itiat.

³⁶ Enyene-iŋwaŋ ɔtɔŋɔ ntak osio mme isuŋutom efen ɔdɔŋ emi ewakde ekan mme ebemiso: ndien enam ye mmɔ oro kpasuk ntre.

³⁷ Edi ke ukperedem enye ɔdɔŋ eyen esie ke ɔtɔ mmɔ ete, Mmɔ eyeteŋe eyen mi.

³⁸ Edi ke ini mme ekpeme-iŋwaŋ ekutde eyen oro mmɔ eneme ke otu idem mmɔ ete, Emi edi andidia-ufɔk; ekam eyak iwot enye, inyuŋ idia ŋkpɔ-akpa esie.

³⁹ Ndien mmɔ emum enye, ebin esio ke iŋwaŋ-vine enyuŋ ewot enye.

⁴⁰ Mmɔdo ke ini enyene-iŋwaŋ oro edidide, nso ke edinam mme ekpeme-iŋwaŋ oro?

⁴¹ Mmɔ ete Enye, enye eyeda idiɔk nsobo osobo mme idiɔk owo oro, onyuŋ ayak iŋwaŋ-vine oro ɔnɔ mme ekpeme-iŋwaŋ efen, emi edinɔde enye mbuŋwum ke edikem ini.

⁴² Jesus ɔdɔhɔ mmɔ ete, Nte akanam mbufo ikotke ŋwed, ete, Itiat emi mme ɔbɔp-ufɔk esinde Amakabare edi etubom inuk: Emi oto Jehovah, Nnyin inyuŋ ise enye ke utibe?

⁴³ Mmɔdo ndɔhɔ mbufo nte, Eyebɔ mbufo Obio Ubɔŋ Abasi, eyak enɔ idut emi ediŋwumde mfri esie.

⁴⁴ Ndien owo eke ediduɔde ke itiat emi eyenuaha mbak-mbak: edi owo ekededi eke itiat emi ediduɔde ɔtɔ enye, eyekɔk enye nte obu.

⁴⁵ Ke adaŋemi ikpɔ oku ye mme Pharisee ekopde mme ŋke Esie, mmɔ efiɔk ete Enye etiŋ abaŋa mme imɔ.

⁴⁶ Edi ke ini mmɔ eyomde ndimum Enye mmɔ efehe mme otu owo, koro mmɔ oro edade Enye ke prophet.