MATTHEW 14 - Edisana ñwed Abasi Ibom

Mkpa John

¹ KE iduɔk ini oro Herod tetrarch okop etop Jesus.

² Enye onyuŋ ɔdɔhɔ ikɔt esie ete, Emi edi John Baptist; enye ama eset ke mkpa; mmɔdo mme odudu emi enamde utom enye ke idem.

³ Koro Herod okomum John, esin ke ebuka, otop ɔduɔk ke ufɔk-ŋkpɔkɔbi, kabaŋa Herodias, ŋwan eyen-ete esie Philip.

⁴ Koro John ɔkɔdɔhɔ enye ete, inenke afo ndida enye ndɔ.

⁵ Ndien ke ini Herod oyomde ndiwot enye, efehe mbio-obio, koro mmɔ edade John ke prophet.

⁶ Edi ke adaŋemi osimde usen emana Herod, eyen Herodias aŋwan enek unek ke ufɔt mmɔ kpukpru, onyuŋ enem Herod esit:

⁷ ntre ke enye otomo ŋkpɔ, onyuŋ ɔŋwɔŋɔ ete, iyenɔ eyen-aŋwan oro se ededi eke enye edibeŋede.

⁸ Ndien nte eka esie eketemede enye, eyen-aŋwan ete, Sin ibuot John Baptist ke usan nɔ mi.

⁹ Ndien edidem ayat esit; edi ke ntak uŋwɔŋɔ esie, ye mmɔ emi etiede ke itie-udia ye enye, enye ɔnɔ uyo ete eda esɔk enye:

¹⁰ onyuŋ ɔdɔŋ eka ekebigi John ke ufɔk-ŋkpɔkɔbi.

¹¹ Ndien eda ibuot esie ke usan edi edinɔ eyen-aŋwan oro; ndien enye emen ɔsɔk eka esie.

¹² Ekem mbet John edi, emen okpo esie ekebuk, enyuŋ edaha eketiŋ enɔ Jesus.

Jesus Ɔnɔ Akwa Otu Owo Udia

¹³ Edi ke ini Jesus okopde ŋkpɔ emi, Enye ediere ke ubom, adaha ke ɔtɔ oro, aka ke ebiet eke edide desert ye mbet Esie ikpɔŋ; ndien ke adaŋemi mme otu owo ekopde, mmɔ eto ke mme obio esaŋa ukot-ukot etiene Enye.

¹⁴ Ndien Enye ɔwɔrɔ ke ubom okut akamba otu owo, onyuŋ atua mmɔ mbɔm, onyuŋ anam mbon-udɔŋɔ mmɔ ekop nsɔŋidem.

¹⁵ Edi ke ini osimde mbubreyo, mbet etiene Enye edɔhɔ Enye ete, Ebiet emi edi desert, ini ama onyuŋ ebe; dɔŋ mme otu owo enyɔŋɔ, man mmɔ eka ke obio-iŋwaŋ ekedep udia enɔ idem mmɔ.

¹⁶ Edi Jesus ɔdɔhɔ mmɔ ete, Mmɔ ekukpa ndinyɔŋɔ; mbufo enɔ mmɔ ŋkpɔ edia.

¹⁷ Edi mmɔ ete Enye, Nnyin inyene mi uyo ition ye iyak iba ikpɔŋ.

¹⁸ Enye ete mmɔ, Eda mmɔ esɔk Mi mi.

¹⁹ Ndien Enye ɔnɔ mme otu owo uyo, ete, esuhɔre etetie ke mbiet; onyuŋ emen uyo ition ye iyak iba oro, emenere enyin ese enyɔŋ, ɔdiɔŋ mmɔ, onyuŋ obuŋ uyo, ayak ɔnɔ mbet, mbet enyuŋ eyak enɔ mme otu owo.

²⁰ Ndien mmɔ kpukpru edia eyuhɔ, mmɔ enyuŋ etaŋ mbubek uyo eke esuhɔde, edɔŋ ke akpan duopeba eyɔhɔ.

²¹ Ibat mmɔ emi ediade ŋkpɔ ekpere thousand owo ition, isinke iban ye nditɔwɔŋ.

²² Ekem Enye enyik mbet Esie ediere ke ubom, ete, ebem Imɔ iso eka ke edem eken, tutu Imɔ idɔŋ mme otu owo enyɔŋɔ.

²³ Ekem ke ini Enye ama ɔkɔdɔŋ mbio-obio enyɔŋɔ, Enye ɔdɔk ke edikoŋ obot ke Idem Esie ikpɔŋ ndibɔŋ akam: edi ke ini osimde mbubreyo, Enye odu do ikpɔŋ.

²⁴ Edi ubom odu ke emi ke ufɔt inyaŋ, mbufut onyuŋ esiŋere enye; koro ofim ɔbiɔŋɔde mmɔ ke iso.

²⁵ Ekem ke ɔyɔhɔ efen inaŋ ke okoneyo, Jesus asaŋa ke enyɔŋ inyaŋ etiene mmɔ.

²⁶ Edi ke ini mbet ekutde Enye asaŋade ke enyɔŋ inyaŋ, esit otimere mmɔ, ete, Edi ekpo: ndien mmɔ esio mkpo ɔnɔ ndik.

²⁷ Edi idaha oro Jesus etiŋ ikɔ ye mmɔ ete, Esɔŋ esit; edi Ami; ekufehe ndik.

²⁸ Edi Peter ɔbɔrɔ Enye ete, Ɔbɔŋ, edieke edide Afo, kot mi nsaŋa ke enyɔŋ mmɔŋ ntiene Fi.

²⁹ Jesus ete enye, Di. Ndien Peter ɔsuhɔre ke ubom, onyuŋ asaŋa ke enyɔŋ mmɔŋ, ete itiene Jesus.

³⁰ Edi ke ini enye esede ofim, ndik anam enye: enye onyuŋ ɔtɔŋɔ ndideŋ, onyuŋ ofiori ete, Ɔbɔŋ, nyaŋa mi.

³¹ Edi idaha oro Jesus anyanare ubɔk omum enye, onyuŋ ɔdɔhɔ enye ete, O afo owo ekpri mbuɔtidem, nsidi ntak afo eyikde?

³² Ndien ke ini mmɔ edukde ke esit ubom, ofim odobo.

³³ Edi mmɔ emi edude ke ubom etuak ibuot enɔ enye, ete, Ke akpanikɔ Afo edi Eyen Abasi.

³⁴ Ekem ke ini mmɔ ebede inyaŋ esim obot, mmɔ ebehe ke isɔŋ Gennesaret.

³⁵ Ndien ke adaŋemi mbon edem oro ediɔŋɔde Enye, mmɔ edɔŋ eka ke kpukpru ŋkan ŋkuk itie ekada kpukpru mmɔ emi edɔŋɔde esɔk Enye;

³⁶ enyuŋ ekpe Enye ubɔk ete mmɔ oro etuk ekpedi nnyeriye ɔfɔŋidem Esie ikpɔŋ: ndien adaŋa ibat owo nte etukde ekop nsɔŋidem.