MATTHEW 13 - Edisana ñwed Abasi Ibom

Jesus Etiŋ Ikɔ ke Ŋke

¹ KE usen oro Jesus ɔwɔrɔ ke ufɔk eketie ke mben akwa inyaŋ.

² Ndien ediwak otu owo ewɔrɔ etiene enye tutu esin Enye oduk ke ubom eketie; ofuri otu oro enyuŋ eda ke esuk.

³ Ndien Enye etiŋ ediwak ŋkpɔ ɔnɔ mmɔ ke ŋke, ete, Sese, asuan-mkpasip ɔwɔrɔ aka ndisuan;

⁴ ndien nte enye asuande, nusuk mkpasip eduɔŋɔ ke mben ɔkpɔusuŋ, mme inuen enyuŋ edi nditaŋ mmɔ eta.

⁵ Ndusuk eduɔŋɔ ke isɔŋ itiat, ke ɔtɔ eke mmɔ minyeneke uwak ntan:

⁶ enyuŋ etibe idaha oro, koro ntan mituŋɔke: edi ke ini utin asiahade, ɔfɔp mmɔ; ndien sia minyeneke oruŋ, eyemere.

⁷ Ndusuk eduɔŋɔ ke ikɔt ŋkukim, ndien ŋkukim oro ekɔri ebaha mmɔ ewot.

⁸ Mmɔ eken eduɔŋɔ ke eti isɔŋ, enyuŋ efiari mfri, ndusuk eŋwum ikikie, ndusuk ikaata, ndusuk ikedip ye duop.

⁹ Owo eke enyenede utɔŋ, yak okop.

Ntak Jesus Etiŋde Ikɔ ke Ŋke

¹⁰ Ndien mbet Esie edi edidɔhɔ Enye ete, Nsinam Afo etiŋde ikɔ ye mmɔ ke ŋke?

¹¹ Enye ɔbɔrɔ ete, Eyak enɔ mbufo ndifiɔk ndibe ŋkpɔ Obio Ubɔŋ Heaven, edi iyakka inɔ mmɔ.

¹² Koro eyenɔ owo ekededi eke enyenede ekɔrɔ, ndien enye eyenyene uwak-uwak; edi owo ekededi eke minyeneke, eyebɔ enye kpa se enye enyenede.

¹³ Mmɔdo ntiŋde ikɔ nnɔ mmɔ ke nke: koro ke erise, mmɔ ikwe ŋkpɔ; ye ke erikop, mmɔ ikopke inyuŋ ifiɔkke nte ɔwɔrɔde.

¹⁴ Ndien prophecy Isaiah osu ɔnɔ mmɔ, emi ɔdɔhɔde ete, mbufo esuk ekop, edi idifiɔkke se ɔwɔrɔde; mbufo esuk ese ŋko, edi ididiɔŋɔke se edide:

¹⁵ Koro esit mbon emi ama akabare odobi, Utɔŋ mmɔ onyuŋ ɔsɔŋ ndikop ikɔ, Mmɔ enyuŋ ebɔp enyin; Mbak mmɔ edida enyin mmɔ ekut usuŋ, Enyuŋ eda utɔŋ mmɔ ekop ikɔ, Enyuŋ eda esit mmɔ efiɔk ŋkpɔ, Enyuŋ etɔŋɔ ntak ekabare, Ndien Ami nnam udɔŋɔ okure mmɔ.

¹⁶ Edi ɔfɔfɔn ɔnɔ enyin mbufo, koro mmɔ ekutde ŋkpɔ; onyuŋ ɔfɔfɔn ɔnɔ utɔŋ mbufo, koro mmɔ ekopde ikɔ.

¹⁷ Ke akpanikɔ ke ndɔhɔ mbufo nte, ediwak mme prophet ye ndinen owo ema eyom ndikut mme ŋkpɔ eke mbufo ekutde, ndien ikekwe; ndiyuŋ ŋkop mme ŋkpɔ eke mbufo ekopde, ndien ikokopke.

¹⁸ Mbufo ekop ndien ŋke asuan-mkpasip.

¹⁹ Ke ini owo ekededi okopde ikɔ Obio Ubɔŋ Heaven, minyuŋ ifiɔkke se ɔwɔrɔde, andidiɔk edi editaŋ se ekasuande ke esit owo oro. Emi edi enye emi esuande mkpasip ke mben ɔkpɔusuŋ.

²⁰ Enye emi esuande mkpasip ke isɔŋ itiat edi owo emi okopde ikɔ, onyuŋ ɔbɔde enye ini kiet ke idaresit;

²¹ edi enye inyeneke oruŋ ke idem esie; ntre ke enye ebigi ke ini esisit; edi ke adaŋemi ukut mme isin-enyin otibede ke ntak ikɔ oro, idaha oro enye ɔduɔ.

²² Enye emi esuande mkpasip ke ufɔt ikɔt ŋkukim, edi owo emi okopde ikɔ; ndien ekikere ŋkpɔ eyo emi ye abiaŋa inyene ababa ikɔ oro owot, ntre ke enye akabare anana mfri.

²³ Enye emi esuande mkpasip ke eti isɔŋ, edi owo emi okopde ikɔ onyuŋ ɔfiɔkde se enye ɔwɔrɔde; emi onyuŋ osioŋode mfri ke akpanikɔ, onyuŋ oŋwumde idem, ndusuk utim ikikie, ndusuk utim ikaata, ndusuk utim ikedip ye duop.

²⁴ Enye emen ŋke efen onim ke iso mmɔ ete, Edomo Obio Ubɔŋ Heaven ye owo eke asuande eti mkpasip ke iŋwaŋ esie:

²⁵ edi ke adaŋemi owo edede idap, owo usua esie edi edisuan idiɔk mkpasip esin ke otu ibokpot, ndien adaha ɔnyɔŋ.

²⁶ Edi ke ini mkpasip etibede esioŋo mfri, ke ini oro idiɔk mkpasip enyuŋ ewut idem.

²⁷ Edi mbon-utom enyene-ebiet oro edi edidɔhɔ enye ete, Ete, nte idige eti mkpasip eke afo akasuande ke iŋwaŋ fo? Enye asaŋa didie ndien otibe idiɔk mkpasip?

²⁸ Enye ɔdɔhɔ mmɔ ete, owo-usua akanam emi. Edi mbon-utom ete enye, Nte amama nnyin ika naŋa ikataŋ mmɔ?

²⁹ Edi enye ete, Baba, mbak ndusuk, ke ini mbufo etaŋde idiɔk mkpasip, mbufo edidibere ibokpot ekɔrɔ ye mmɔ.

³⁰ Eyak mmɔ mbiba ekɔri ɔtɔ kiet tutu osim ini ukpeŋe; ndien ke ini ukpeŋe nyenɔ mbom ukpeŋe uyo, nte, Ebem iso etaŋ idiɔk mkpasip ebɔp ke ebek, man efɔp ke ikaŋ; edi editaŋ ibokpot ekonim ke ubet-udia mi.

Jesus Etiŋ Ikɔ ke Ŋke abaŋa mkpasip mustard

³¹ Enye emen ŋke efen onim ke iso mmɔ, ete, Obio Ubɔŋ Heaven ebiet mkpasip mustard, eke owo emende ɔtɔ ke iŋwaŋ esie;

³² emi ke akpanikɔ ekpride akan kpukpru mkpasip; edi ke ini ɔkɔride, okpon akan mbiet, onyuŋ akabare edi eto, mme inuen enyɔŋ enyuŋ edi edikubɔ ke ŋkɔk esie.

³³ Enye otop ŋke efen ɔnɔ mmɔ ete, Obio Ubɔŋ Heaven ebiet leaven, eke ŋwan emende esin ke udomo ndom-uyo ita, tutu leaven asuana ɔyɔhɔ ofuri ndom-uyo.

³⁴ Jesus etiŋ kpukpru ŋkpɔ emi ɔnɔ mme otu owo ke ŋke: minyuŋ idige ke ŋke, Enye itiŋke baba ŋkpɔ kiet inɔ mmɔ:

³⁵ man osu nte prophet ekewetde, ete, Nyetat inua Mi ntiŋ ikɔ ke ŋke, Nyetiŋ ŋkpɔ eke ekodibede toto ke eritɔŋɔ ererimbot.

³⁶ Ekem Jesus ɔkpɔŋ mme otu owo okoduk ufɔk; ndien mbet Esie etiene Enye, ete, Siak ŋke idiɔk mkpasip iŋwaŋ nɔ nnyin.

³⁷ Edi Enye ɔbɔrɔ ete, Asuan eti mkpasip edi Eyen Owo;

³⁸ iŋwaŋ edi ererimbot; eti mkpasip edi nditɔ Obio Ubɔŋ Heaven; idiɔk mkpasip edi nditɔ andidiɔk;

³⁹ owo-usua emi asuande mmɔ edi Satan; ini ukpeŋe edi akpatre ini eyo emi; ndien mbon-ukpeŋe edi mme angel.

⁴⁰ Mmɔdo nte etataŋ idiɔk mkpasip efɔp ke ikaŋ, ntre ke edidi ke akpatre ini eyo emi.

⁴¹ Eyen Owo eyesio mme angel Esie ɔdɔŋ, ndien mmɔ eyetaŋ kpukpru ŋkpɔ emi esinde owo eduɔ, ye mmɔ emi enamde ukwaŋido efep ke Obio Ubɔŋ Esie,

⁴² eyenyuŋ eduɔk mmɔ ke akwa ikaŋ emi asakde: do ke eritua eyet ye erita edet eyedu.

⁴³ Adaŋoro ndinen owo eyeyama nte utin ke Obio Ubɔŋ Ete mmɔ. Owo eke enyenede utɔŋ, yak okop.

⁴⁴ Obio Ubɔŋ Heaven ebiet inyene eke odibede ke iŋwaŋ; emi owo kiet okutde, emen, odip; ndien ke idaresit esie, aka akanyam kpukpru se enye enyenede, edep iŋwaŋ oro.

⁴⁵ Ŋko ŋko, Obio Ubɔŋ Heaven ebiet owo-urua eke oyomde ndiye pearl;

⁴⁶ ndien ke enye ama okut pearl kiet emi okponde ekɔm-urua, aka akanyam kpukpru se enyenede, edep pearl oro.

⁴⁷ Ŋko ŋko, Obio Ubɔŋ Heaven ebiet iyire eke eduɔkde ke inyaŋ, emi onyuŋ omumde kpukpru oruk iyak;

⁴⁸ ke ini ɔyɔhɔde, edudi enye edɔk ke esuk, esuhɔre etetie, etaŋ se ifɔnde edɔŋ ke ŋkpɔ, edi eduɔŋɔ se mifɔnke.

⁴⁹ Ntre ke edidi ke akpatre ini eyo emi; mme angel eyewɔŋɔ edi edidianare mme oburobut owo esio ke ndinen owo, enyuŋ eduɔŋɔ mmɔ ke akwa ikaŋ eke asakde.

⁵⁰ Do ke eritua eyet ye erita edet eyedu.

⁵¹ Nte mbufo emetim efiɔk se kpukpru ŋkpɔ emi ewɔrɔde?

⁵² Mmɔ ete Enye, Nnyin imɔfiɔk, Ɔbɔŋ. Edi Enye ɔdɔhɔ mmɔ ete, Kpukpru scribe ndien, emi enamde enye edi owo mbet ke Obio Ubɔŋ Heaven, ebiet enyene-ufɔk, eke osioŋode mbufa ŋkpɔ ye ŋkani ŋkpɔ ke ubet-unim-inyene esie.

Esin Jesus Ke Obio Nazareth

⁵³ Edikem ke ini Jesus ama eketiŋ mme ŋke emi ama, Enye adaha ɔkpɔŋ ɔtɔ oro.

⁵⁴ Ndien Enye edi ke obio Esiemɔ onyuŋ ekpep mmɔ ŋkpɔ ke synagogue mmɔ, tutu idem akpa mmɔ, mmɔ enyuŋ ete, Owo emi ada ɔniɔŋ emi ye utom odudu emi ke mmɔŋ?

⁵⁵ Nte Enye idige eyen anam-usɔ? Nte eka Esie ikereke Mary? nte nditɔ-eka Esie inyuŋ ikereke James, ye Joseph, ye Simon, ye Judas? nte kpukpru nditɔ-eka Esie iban inyuŋ iduhe ye nnyin?

⁵⁶ Ke mmɔŋ ndien ke owo emi ada kpukpru ŋkpɔ emi?

⁵⁷ Ndien mmɔ eduɔ ke ntak Esie. Edi Jesus ɔdɔhɔ mmɔ ete, Prophet inanake ukpono ke mibɔhɔke ke obio emana esie, ye ke ufɔk esie.

⁵⁸ Enye inyuŋ inamke ediwak utom odudu do oto ke ntak unana mbuɔtidem mmɔ.