MATTHEW 12 - Edisana ñwed Abasi Ibom

Jesus Edi Edidem Sabbath; Mme Owo Eyom Idiɔnɔ.

¹ KE ini oro Jesus asaŋa ebe ke iŋwaŋ ibokpot ke usen sabbath; edi biɔŋ ɔdɔŋ mbet esie, mmɔ enyuŋ etɔŋɔ ndikibi ibotkpot nta.

² Edi ke ini mme Pharisee ekutde, mmɔ edɔhɔ Enye ete, Sese, mbet Fo ke enam se minenke owo ndinam ke usen sabbath.

³ Edi Enye ɔdɔhɔ mmɔ ete, Nte mbufo ikokotke se David akanamde, ke ini biɔŋ ɔdɔŋde enye ye mmɔ emi edude ye enye:

⁴ nte enye odukde ke ufɔk Abasi, onyuŋ adiade uyo-iso-Abasi, emi minenke enye ye mmɔ emi edude ye enye ndidia, ke mibɔhɔke mme oku ikpɔŋ?

⁵ Nte mbufo inyuŋ ikotke ke ibet nte mme oku emi edude ke temple ebiatde sabbath ke usen sabbath, ndien minyeneke ndudue?

⁶ Edi ndɔhɔ mbufo nte, Owo emi okponde akan temple odu mi.

⁷ Edi edieke mbufo ekpɔfiɔkde se ikɔ emi ɔdɔhɔde ete, Edi mbɔm ke nyom, idige uwa, ɔwɔrɔde, mbufo ikpobiomke mmɔ emi miduehe.

⁸ Koro Eyen Owo edi Ɔbɔŋ usen sabbath.

Owo Emi Ubɔk Esie Akpade

⁹ Ekem enye adaha ke ebiet oro oduk ke synagogue mmɔ;

¹⁰ ndien sese, owo emi ubɔk esie akpade odu do. Mmɔ ebup Enye ete, Nte enen ndinam udɔŋɔ okure ke usen sabbath? kpaŋ mmɔ ekpe-nyene se edoride Enye.

¹¹ Edi Enye ete mmɔ, Anie owo ke otu mbufo, emi enyenede erɔŋ kiet, editre ndimum enye nsio ke obube eke ɔduɔde ke esit ke usen sabbath?

¹² Owo ɔmɔsɔŋ urua akan erɔŋ adaŋa didie ndien! Mmɔdo enen ndinam ufɔn ke usen sabbath.

¹³ Ekem Enye ɔdɔhɔ owo oro ete, Nyanare ubɔk fo. Ndien enye anyanare ubɔk; ubɔk esie onyuŋ akabare ɔfɔn nte enye eken.

¹⁴ Edi mme Pharisee ewɔŋɔ ekoduk odu ebaŋa Jesus, eyom usuŋ nte idisaŋade iwot Enye.

¹⁵ Edi Jesus ɔfiɔk, onyuŋ adaha ke ebiet oro: ndien ediwak owo etiene Enye;

¹⁶ Enye onyuŋ anam udɔŋɔ mmɔ kpukpru okure, onyuŋ akpan mmɔ ete ekuyarare Imɔ:

¹⁷ man osu nte prophet Isaiah eketiŋde, ete,

¹⁸ Sese owo Mi emi ŋkemekde; Ama Mi emi nnemde esit ye Enye: Nyedori Enye Spirit Mi ke idem, Ndien Enye eyenam ikpe ɔwɔrɔ ɔnɔ mme Gentile.

¹⁹ Enye iditɔhɔke, idinyuŋ ifiorike: Baba owo kiet idinyuŋ ikopke uyo Esie ke efak.

²⁰ Enye idibuŋke nyanyaŋa eke anuahade, Idinyuŋ inimeke ɔfɔŋ-utuenikaŋ eke osiode nsuŋikaŋ, Tutu Enye edinam ubiere-ikpe ɔwɔrɔ ada onyuŋ akan.

²¹ Ndien mme Gentile eyedori enyin ke enyiŋ Esie.

²² Ekem eda owo kiet emi enyenede demon, emi edide nnan ye imum, esɔk Enye: ndien enye anam udɔŋɔ esie okure, esin owo imum oro etiŋ ikɔ onyuŋ okut usuŋ.

²³ Ndien idem akpa kpukpru mme otu owo oro, mmɔ enyuŋ edɔhɔ ete, Ndi Enye emi edi Eyen David?

²⁴ Edi ke adaŋemi mme Pharisee ekopde, mmɔ edɔhɔ ete, Owo emi ibinke demon iduɔk, ke mitoho Beelzebub, ɔbɔŋ mme demon.

²⁵ Edi sia Enye ɔdiɔŋɔde ekikere mmɔ, ɔdɔhɔ mmɔ ete, kpukpru obio edidem eke abaharede ada aŋwana ye idem esie oduk nditaha; kpukpru obio mme ufɔk eke onyuŋ abaharede aŋwana ye idem esie idisɔŋɔke ida.

²⁶ Ndien edieke Satan ebinde Satan ɔduɔk, enye abahare ada aŋwana ye idem esie; didie ndien ke obio ubɔŋ esie edisɔŋɔ ida?

²⁷ Ndien edieke Ami ndade Beelzebub mbin mme demon nduɔk, nditɔ mbufo eda anie ebin mmɔ eduɔk? Mmɔdo mmɔ edidi mme ebierikpe enɔ mbufo.

²⁸ Edi edieke Ami ndade Spirit Abasi mbin mme demon nduɔk, Ubɔŋ Abasi ama osim mbufo.

²⁹ Ŋko, owo ekeme didie ndiduk ke ufɔk ɔkpɔsɔŋ owo mbume ŋkpɔ esie, ke enye mibemke iso ibɔp ɔkpɔsɔŋ owo oro? Adaŋoro ndien ke enye edibume ŋkpɔ ufɔk esie.

³⁰ Owo eke midaha ye Ami aŋwaŋwana ye Ami; owo eke minyuŋ ibokke ye Ami asasuan.

³¹ Mmɔdo ndɔhɔ mbufo nte, Eyefen mme owo kpukpru idiɔk-ŋkpɔ ye ikɔ isuŋi; edi ikɔ isuŋi eke owo etiŋde adian Edisana Spirit, idifenke enye.

³² Ndien owo ekededi eke editiŋde ikɔ adian Eyen Owo, eyefen enye; edi owo ekededi eke editiŋde ikɔ adian Edisana Spirit, idifenke enye, ye edide ke eyo emi ye onyuŋ edide ke eyo emi edidide.

³³ Enam eto ɔfɔn, enyuŋ enam mfri esie ɔfɔn; midige ntre, enam eto edi mbiara, enyuŋ enam mfri esie edi mbiara ŋko: koro eda mfri efiɔk eto.

³⁴ Mbufo ubon urukikɔt, mbufo emi ediɔkde ekeme didie nditiŋ nti ŋkpɔ? Koro oto ke uyɔhɔ esit ke inua osio etiŋ.

³⁵ Eti owo osioŋo nti ŋkpɔ ke nti ŋkpɔ eke enye okobonde; idiɔk owo ŋko osioŋo mme idiɔk ŋkpɔ ke mme idiɔk ŋkpɔ eke enye okobonde.

³⁶ Mmonyuŋ ndɔhɔ mbufo nte, Ke usen ikpe mme owo eyenɔ mbuk ebaŋa kpukpru ikpikpu ikɔ eke mmɔ etiŋde.

³⁷ Koro edito ikɔ fo ke ikpe etebe fi, edinyuŋ oto ikɔ fo ke ikpe obiom fi.

Idiɔk Emana Oyom Idiɔŋɔ

³⁸ Ekem ndusuk mme scribe ye mme Pahrisee ebɔrɔ Enye ete, Andikpep, nnyin iyom ite Afo owut nnyin idiɔnɔ.

³⁹ Edi Enye ɔbɔrɔ mmɔ ete, Idiɔk emana eke amade efibe oyom idiɔŋɔ; ndien idinɔŋɔ enye idiɔŋɔ, ibɔhɔke idiɔŋɔ prophet Jonah.

⁴⁰ Koro nte Jonah okodude ke idibi akamba iyak uwemeyo ita ye okoneyo ita, ntre ke Eyen Owo eyedu ke esit isɔŋ uwemeyo ita ye okoneyo ita.

⁴¹ Mbon Nineveh eyedaha eda ke ikpe ye emana emi, enyuŋ ebiom enye; koro mmɔ ekakabarede esit ke erikwɔrɔ Jonah: ndien sese, Enye emi okponde akan Jonah odu mi.

⁴² Ɔbɔŋ-aŋwan usuk eyedaha ada ke usen ikpe ye emana emi, onyuŋ obiom enye: koro enye okotode ke mme utit isɔŋ edi edikop ɔniɔŋ Solomon: ndien sese, Enye emi okponde akan Solomon odu mi.

⁴³ Edi ke ini edidehe spirit ɔwɔrɔde owo ke idem, enye asaŋa oyo ke edisat ebiet, oyom nduɔk-odudu, ndien ikwe.

⁴⁴ Ekem enye ete, Nyefiak nnyɔŋ ufɔk mi emi ŋkotode ke esit ŋwɔrɔ; ndien ke ini enye edide, okut ete ufɔk oro ana ukpɔk, ema ekpɔri enyuŋ ebana enye.

⁴⁵ Ekem enye aka akada spirit itiaba efen eke ediɔkde ekan idem esie adian idem, ndien mmɔ eduk ekoduŋ do: ndien ukperedem itie owo oro akabare ɔdiɔk akan mbemiso. Kpa ntre ke edidi ye idiɔk emana emi.

⁴⁶ Nte Enye osuk eteiŋ ikɔ ye mme otu owo, sese, eka Esie ye nditɔ-eka Esie edida ke aŋwa, eyom nditiŋ ikɔ ye Enye.

⁴⁷ Ndien owo kiet ɔdɔhɔ Enye ete, Sese, uka ye nditɔ-uka ke eda ke aŋwa, eyom Fi, ndineme ye Afo.

⁴⁸ Edi Enye ɔbɔrɔ owo emi ɔdɔhɔde ntem ye Enye, ete, Anie edi eka Mi? mme anie enyuŋ edi nditɔ-eka Mi?

⁴⁹ Ndien Enye anyan ubɔk owut mbet esie, onyuŋ ɔdɔhɔ ete, sese, eka Mi ye nditɔ-eka Mi!

⁵⁰ Koro owo ekededi eke anamde se Ete Mi emi odude ke heaven amade, enye edi eyen-eka Mi eren ye eyen-eka Mi aŋwan, ye eka Mi.