MATTHEW 10 - Edisana ñwed Abasi Ibom

Enyiŋ Mme Mbet Jesus Duopeba

¹ NDIEN Enye okot mbet Esie duopeba edi, ɔnɔ mmɔ odudu ndibin ndedehe spirit nduɔk, ndinyuŋ nnam kpukpru oruk udɔŋɔ ye kpukpru oruk mmemidem ekure.

² Enyiŋ mme apostle duopeba edi emi: akpa owo edi Simon, emi ekerede Peter, ye Andrew eyen-eka esie; ye James eyen Zebedee ye John eyen-eka esie;

³ Philip ye Bartholomew; Thomas ye Matthew emi edide publican; James eyen Alphaeus ye Thaddaues;

⁴ Simon emi edide Zealot, ye Judas Iscariot, emi onyuŋ adade Jesus ɔnɔ.

⁵ Jesus osio owo duopeba emi ɔdɔŋ mmɔ utom, onyuŋ eteme mmɔ ete, Ekuwaha eduk ke usuŋ mme Gentile, ekunyuŋ eduk ke obio mbon Samaria baba kiet;

⁶ edi ekam etiene mme erɔŋ ufɔk Israel emi esopde.

⁷ Edi nte mbufo ekade, ekwɔrɔ ete, Ubɔŋ Heaven ke ekpere.

⁸ Enam mbon udɔŋɔ ekop nsɔŋidem, enam mme akpa-mkpa eset, enam mme ɔdɔŋɔ akpa-mfia esana, enyuŋ ebin mme demon eduɔk; mbufo ekebɔ ke ikpikpu, enɔ ŋko ke ikpikpu.

⁹ Ekukama gold, me silver, me okpoho okuk ke ekpat okuk mbufo;

¹⁰ ekunyuŋ ekama ekpat isaŋ, me ɔfɔŋidem iba, me ikpa-ukot, me esaŋ: koro eyen-utom odot udia esie.

¹¹ Ndien obio ekededi me obio-iŋwaŋ ekededi eke mbufo edidukde, eyom owo eke odotde ke esit; enyuŋ edaŋ ye enye tutu mbufo ewɔŋɔ enyɔŋɔ.

¹² Ke ini mbufo edukde ke ufɔk, enɔ ekɔm.

¹³ Ndien edieke ufɔk oro odotde, yak emem mbufo odoro ke esit; edi edieke ufɔk oro midotke, yak emem mbufo afiak etiene mbufo.

¹⁴ Owo ekededi eke minyimeke ndidara mbufo, nnyuŋ ŋkop ikɔ mbufo, ke ini mbufo ewɔŋɔde ke ufɔk me ke obio oro, ekeŋ ntan ikpat mbufo eduɔk.

¹⁵ Ke akpanikɔ ke ndɔhɔ mbufo, Ŋkpɔ eyefɔn ye isɔŋ Sodom ye Gomorrah ke usen ikpe akan ye obio oro.

¹⁶ Sese, mmosio mbufo ndɔŋ nte mme erɔŋ ke ufɔt mme ekpe ikɔt; mmɔdo mbufo enyene ibuot nte urukikɔt, enyuŋ efure nte ibiom.

¹⁷ Edi ekpeme idem ye owo; koro mmɔ eyeyak mbufo esin ke ubɔk mme esop, ndien eyemia mbufo ke mme synagogue mmɔ;

¹⁸ eyenyuŋ eda mbufo ewɔrɔ ke iso mme andikara ye ndidem kabaŋa Mi, kpaŋ mbufo edi ntiense enɔ mmɔ ye mme Gentile.

¹⁹ Edi ke ini ediyakde mbufo enɔ, ekutimere esit ekere, me edidɔhɔ didie, me editiŋ nso; koro kpa idaha oro ke eyenɔ mbufo se editiŋde.

²⁰ Koro idige mbufo etiŋ ikɔ, edi Spirit Ete mbufo esine mbufo ke esit etiŋ.

²¹ Eyen-eka enyeyuŋ ada eyen-eka ɔnɔ mkpa, ete eyenyuŋ ɔnɔ eyen esie: nditɔ eyenyuŋ edaha eŋwana ye mme ete ye mme eka mmɔ, enyuŋ esin ewot mmɔ.

²² Ndien kpukpru owo eyesua mbufo ke abaŋa enyiŋ Mi: edi eyeŋyaŋa owo eke edimede ime tutu osim akpatre.

²³ Edi ke ini mmɔ ekɔbɔde mbufo ke obio emi, efehe eduk ke obio efen: koro ke akpanikɔ ke ndɔhɔ mbufo, nte, Ke mbufo mika-isaŋake ke kpukpru mme obio Israel ibe kaŋa, Eyen Owo eyedi.

²⁴ Eyen ukpep-ŋkpɔ ikponke ikan andikpep enye: asaŋa-utom inyuŋ ikponke ikan ete-ufɔk esie.

²⁵ Ekem eyen ukpep-ŋkpɔ nditie nte andikpep enye, asaŋa-utom ndinyuŋ ntie nte ete-ufɔk esie. Edieke mmɔ ema ekot ete-ufɔk ete, Beelzebub, ŋwaŋwaediso ke mmɔ edikot nditɔ ufɔk esie ntre.

²⁶ Ekufehe mmɔ ndien; koro ŋkpɔ iduhe eke efukde fuk emi midiyarakere; ŋkpɔ inyuŋ iduhe eke edipde dip emi owo midifiɔkke.

²⁷ Se ndɔhɔde mbufo ke ekim, emen etiŋ ke uŋwana; se mbufo enyuŋ ekopde ke utɔŋ, ekwɔrɔ ke ɔkɔm ufɔk.

²⁸ Ekunyuŋ efehe mmɔ emi ewotde ikpɔhidem, edi mikemeke ndiwot ukpɔŋ: edi ekam efehe Enye emi ekemede ndisobo ukpɔŋ ye ikpɔhidem ke hell.

²⁹ Nte inyamke ŋkpri inuen iba ke obubit okuk kiet? ndien baba mmɔ kiet iduɔhɔ ke isɔŋ ke mitoho Ete mbufo:

³⁰ edi emabat kpa kpukpru idet ibuot mbufo.

³¹ Ekufehe ndien; mbufo emesɔŋ urua ekan ediwak ŋkpri inuen.

³² Mmɔdo owo ekededi eke edinyimede ke iso owo ete, idi okim, Ami nyenyuŋ nnyime enye ke iso Ete Mi emi odude ke heaven.

³³ Edi owo ekededi eke edikaŋde Mi ke iso owo, ete, idige okim, Ami nyenyuŋ ŋkaŋ enye ke iso Ete Mi emi odude ke heaven.

³⁴ Ekuse ete ŋkedi ndisin emem ke isɔŋ: ŋkedige ndisin emem, edi ofut.

³⁵ Koro ŋkedi ndinam owo aŋwana ye ete esie, ndinyuŋ nnam eyen-aŋwan aŋwana ye eka, nnyuŋ nnam ŋwan eyen aŋwana ye eka ebe:

³⁶ ndien mme asua owo eyedi mbon ufɔk esie.

³⁷ Owo eke amade ete me eka akan Mi idotke ye Ami: owo eke onyuŋ amade eyen eren esie me eyen esie aŋwan akan Mi idotke ye Ami.

³⁸ Ndien owo eke mimenke cross esie itiene Mi idotke ye Ami.

³⁹ Owo eke anyaŋade uwem esie eyeduɔk enye; edi owo eke ɔduɔkde uwem esie ke abaŋa Mi eyenyaŋa enye.

⁴⁰ Owo eke onyimede mbufo onyime Mi, ndien owo eke onyimede Mi onyime Andidɔŋ Mi.

⁴¹ Owo eke onyimede prophet ke enyiŋ prophet eyebɔ utip prophet; owo eke onyimede edinen owo ke enyiŋ edinen owo eyenyuŋ ɔbɔ utip edinen owo.

⁴² Ndien owo ekededi eke edidade cup mbit-mbit mmɔŋ ɔnɔ kiet ke otu ŋkpri owo emi ɔŋwɔŋ ke enyiŋ mbet Mi, ke akpanikɔ ke ndɔhɔ mbufo, enye iditreketre ndibɔ utip esie.