MARK 8 - Edisana ñwed Abasi Ibom

Jesus Ɔnɔ Owo Tosin Inaŋ Udia

¹ KE mme usen oro, ke ini akwa otu etɔŋɔde ntak edu, mmɔ minyuŋ inyeneke se ediade, Enye okot mbet Esie, onyuŋ ɔdɔhɔ mmɔ ete,

² Mmatua otu owo emi mbɔm, koro ke emi mmɔ etiede ye Ami ke usen ita, minyuŋ inyeneke se ediade:

³ ndien edieke nnamde mmɔ esaŋa ye biɔŋ enyɔŋɔ ufɔk, mmɔ eyekpa mba ke usuŋ; ndusuk mmɔ enyuŋ eto anyan ebiet.

⁴ Ndien mbet Esie ebɔrɔ Enye ete, Owo edikeme ndida uyo ke mmɔŋ nyuhɔ mme owo emi mi ke ebiet desert?

⁵ Enye obup mmɔ ete, Enyene uyo ifaŋ? Mmɔ ete, Itiaba.

⁶ Ndien Enye ɔnɔ otu owo uyo ete, Esuhɔre etetie ke isɔŋ; onyuŋ emen uyo itiaba oro, ndien, ke Enye ama ɔkɔnɔ ekɔm, obuŋ, ayak ɔnɔ mbet, ete enim ke iso mbio-obio: mmɔ enim uyo ke iso otu owo.

⁷ Mmɔ enyuŋ enyene ndusuk ŋkpri iyak: ndien ke ini Enye ama ɔdiɔŋ mmɔ, Enye ɔdɔhɔ ete, enim mmɔ emi ŋko ke iso mbio-obio.

⁸ Ndien mmɔ edia eyuhɔ; mmɔ enyuŋ etaŋ mbubek uyo eke esuhɔde, akpasa itiaba.

⁹ Ibat mmɔ ekpere thousand owo inaŋ; ndien Enye anam mmɔ enyɔŋɔ.

¹⁰ Idaha oro Enye ediere ke ubom ye mbet Esie, edi ke edem Dalmanutha.

¹¹ Ekem mme Pharisee ewɔŋɔ edi, etɔŋɔ ndineni eneni ye Enye; mmɔ edodomo Enye ete, Enye ɔnɔ mme imɔ idiɔŋɔ eke otode ke heaven.

¹² Edi Enye omum mmum ɔkpɔsɔŋ ke spirit, onyuŋ ɔdɔhɔ ete, Nsinam emana emi eyomde idiɔŋɔ? Ke akpanikɔ ke ndɔhɔ mbufo, Idinɔŋɔ emana emi baba idiɔŋɔ kiet.

¹³ Ndien Enye ɔkpɔŋ mmɔ, ɔtɔŋɔ ntak ediere ke ubom, ebe aka ke edem oko.

¹⁴ Mbet ekefre ndida uyo; mmɔ inyuŋ inyeneke uyo ibe kiet ye mmɔ ke ubom.

¹⁵ Ndien Jesus ɔsɔŋɔ ɔdɔhɔ mmɔ, ete, Etiŋ enyin ekpeme idem mbak leaven mme Pharisee ye leaven Herod.

¹⁶ Ndien mmɔ eneni ye kiet eken ete, Nnyin inyeneke uyo.

¹⁷ Edi ke ini Jesus ɔfiɔkde, Enye ɔdɔhɔ mmɔ ete, Nsinam enenide eneni ke ntak emi mbufo minyeneke uyo? Nte mbufo ifiɔkke ŋkpɔ kaŋa, inyuŋ inyeneke ibuot?

¹⁸ Nte esit mbufo amakabare ɔsɔŋ? Ke enyenede enyin, nte mbufo ikwe usuŋ? ke enyuŋ enyenede utɔŋ, nte mbufo ikopke ikɔ? nte mbufo inyuŋ itihi?

¹⁹ Ke ini ŋkebuŋde uyo ition ndeme thousand owo ition, akpan mbubek uyo ifaŋ ke mbufo ekataŋ eyɔhɔ

²⁰ Mmɔ ete Enye, Duopeba. Ke ini ŋkenyuŋ mbuŋde uyo itiaba ndeme thousand owo inaŋ, ɔyɔhɔ akpasa ifaŋ ke mbufo ekataŋ mbubek uyo ke esit? Mmɔ ebɔrɔ Enye ete, Itiaba.

²¹ Ndien Enye ete mmɔ, Nte mbufo inyeneke ibuot kaŋa?

²² Ekem mmɔ edi ke Bethsaida. Ndien mmɔ eda owo nnan esɔk Enye, enyuŋ ekpe Enye ubɔk ete otuk enye.

²³ Ndien Enye omum nnan oro ke ubɔk, onyuŋ ada enye ɔwɔrɔ ke obio-iŋwaŋ; ndien ke Enye ama akafiari enye etap ke enyin, onyuŋ odori enye ubɔk, obup enye ete, Nte omokut ŋkpɔ?

²⁴ Owo oro emenere enyin ese, onyuŋ ɔdɔhɔ ete, Mmokut owo; koro ŋkut mmɔ esaŋade nte edide eto.

²⁵ Jesus ɔtɔŋɔ ntak odori enye ubɔk ke enyin; ndien enye owuk enyin ese ŋkpɔ, enyin esie ekabare efɔn, enye onyuŋ eneŋere okut kpukpru ŋkpɔ.

²⁶ Ekem Jesus ɔdɔŋ enye ɔnyɔŋ ufɔk, onyuŋ ɔdɔhɔ enye ete, Kuduk ke obio-iŋwaŋ oro.

²⁷ Ekem Jesus ye mbet Esie ewɔŋɔ ekeduk ke mme obio-ŋwaŋ Caesarea Philippi: ndien ke usuŋ, Enye obup mbet Esie, ete mmɔ, Mme owo edɔhɔ ete Ami ndi anie?

²⁸ Mmɔ edɔhɔ Enye ete, John Baptist; mmɔ efen ete, Elijah, edi mmɔ efen ete Owo kiet ke otu mme prophet.

²⁹ Enye obup mmɔ ete, Edi mbufo edɔhɔ ete, Ami ndi anie? Peter ɔbɔrɔ Enye ete, Afo edi Christ.

³⁰ Ndien Enye owuk mmɔ ete ekudɔhɔ baba owo kiet ebaŋa Imɔ.

³¹ Ekem Enye ɔtɔŋɔ ndikpep mmɔ ete, Eyen owo enyene ndikut ediwak ukut; mbiowo, ye ikpɔ oku, ye mme scribe eyenyuŋ esin Enye, enyuŋ ewot Enye, ndien ke usen ita ema ebe, Enye eyeset ke mkpa.

³² Enye onyuŋ etiŋ ikɔ emi aŋwa-aŋwa. Edi Peter ada Enye, ɔtɔŋɔ ndisua nnɔ Enye.

³³ Edi Enye ɔwɔŋɔre ese mbet Esie, asua ɔnɔ Peter, ete enye, Da ke edem Mi, Satan: koro afo ukereke ŋkpɔ Abasi, edi ekere ŋkpɔ owo.

³⁴ Ekem Enye okot otu owo ye mbet Esie edi, onyuŋ ɔdɔhɔ mmɔ ete, Owo ekededi ama oyom nditiene Mi, yak Enye otuk idem esie, onyuŋ emen cross esie etiene Mi.

³⁵ Koro owo ekededi eke oyomde ndinyaŋa uwem esie eyeduɔk enye; edi owo ekededi eke ɔduɔkde uwem esie kabaŋa Mi ye gospel, eyenyaŋa enye.

³⁶ Koro edidori owo nso edieke enye adiade ɔfuri ererimbot, ndien ada uwem esie osio isop?

³⁷ Koro nso ke owo ɔkpɔnɔ ke ibuot uwem esie? Koro owo ekededi eke okopde but ye Ami ye ikɔ Mi ke idiɔk emana use emi,

³⁸ Eyen owo eyekop but ye enye, ke ini Enye edide ke ubɔŋ Ete Esie ye ndisana angel Esie.