MARK 7 - Edisana ñwed Abasi Ibom

Ukpep Ŋkpɔ Item Owo; Mbuɔtidem Aŋwan Syria Kiet

¹ EKEM mme Pharisee ye ndusuk mme scribe, emi ekotode ke Jerusalem, esop idem etiene Enye;

² mmɔ enyuŋ ekut ete ndusuk mbet Esie ke edia udia mmɔ ye edidehe ubɔk, oro edi, ye ubɔk eke miyetke.

³ Koro mme Pharisee ye kpukpru mme Jew idiaha ŋkpɔ, ibɔhɔke mmɔ etotim eyet ubɔk, man emum item mbiowo ekama:

⁴ ndien ke ini mmɔ etode ke urua edi, mmɔ idiaha ŋkpɔ ke miyereke mmɔŋ: ediwak ido efen enyuŋ edu eke mmɔ ebɔde emum ekama, nte eriyet cup ye eso ye ŋkpɔ okpoho.

⁵ Mme Pharisee ye mme scribe ndien ebup Enye ete, Nsinam mbet Fo misaŋake ke item mbiowo, edi ediade uyo ye ubɔk eke edehede?

⁶ Edi Enye ɔdɔhɔ mmɔ ete, Isaiah ototim etiŋ nte prophet abaŋa mbufo, mbon mbubik, nte ewetde ete, Mbio emi ekpono Mi ke mkpɔk-inua mmɔ, Edi esit mmɔ ada nsan-nsan ye Ami;

⁷ Edi mmɔ ekpono Mi ikpikpu, Sia ekpepde item owo ke ukpep-ŋkpɔ mmɔ.

⁸ Mbufo emɔkpɔŋ ibet Abasi edimum item owo ekama.

⁹ Enye onyuŋ ɔdɔhɔ mmɔ ete, mbufo etim esin ibet Abasi, man mbufo enim item mbufo.

¹⁰ Koro Moses ɔkɔdɔhɔ ete, Kpono usɔ ye uka; ŋko, Owo emi etiŋde idiɔk adian ete mme eka, okutre ndikpa:

¹¹ edi mbufo ete, Owo ama ɔdɔhɔ ete mme eka, ete, Se ŋkpadade mfɔn fi ufɔn edi Corban (oro edi, mmayak enye nnɔ Abasi),

¹² mbufo iyakke enye anam baba ŋkpɔ kiet ɔnɔ ete mme eka esie aba:

¹³ ntem ke mbufo enam ikɔ Abasi ɔwɔrɔ ikpikpu oto ke item eke mbufo ekɔnɔde; mbufo enyuŋ enanam ediwak nkpɔ emi etiede ntem.

¹⁴ Ndien Enye ɔtɔŋɔ ntak okot otu owo edi, onyuŋ ɔdɔhɔ mmɔ ete, Kpukpru mbufo ekop uyo Mi, enyuŋ etim efiɔk:

¹⁵ baba ŋkpɔ kiet eke otode to oduk owo ke idem ikemeke ndisabare owo:

¹⁶ edi ŋkpɔ eke ɔwɔrɔde owo ke idem, oro asabare owo.

¹⁷ Ekem ke ini Enye ama ɔkpɔŋ otu owo oduk ke ufɔk, mbet Esie ebup Enye ebaŋa ŋke emi.

¹⁸ Ndien Enye ɔdɔhɔ mmɔ ete, Nte mbufo nde emanana ifiɔk ntre? Nte mbufo ikwe ite ŋkpɔ ekededi, eke otode to oduk owo ke idem, ikemeke ndisabare enye;

¹⁹ koro midukke ke esit esie, edi oduk ke idibi esie, onyuŋ ɔwɔrɔ ke ufɔk ekwe? ntre ke Enye owut ete kpukpru udia esana.

²⁰ Enye onyuŋ ɔdɔhɔ ete, Se iwɔrɔde owo ke idem edi se isabarede owo.

²¹ Koro mme idiɔk ekikere eto ke esit owo ewɔŋɔ, ye use, inɔ,

²² ye obom, ye efibe, ye idiɔk itɔŋ, ye oburobut ido, ye abiaŋa, ye obukpo ido, ye erise owo idiɔk enyin, ye isuŋi, ye iseri, ye ndisime:

²³ kpukpru mme idiɔk ŋkpɔ emi eto owo ke esit ewɔŋɔ, enyuŋ esabare owo.

²⁴ Ekem Enye adaha do, aka ke adaŋa Tyre ye Sidon. Enye onyuŋ oduk ke ufɔk, iyomke owo ɔfiɔk: ndien Enye ikemeke ndidibe.

²⁵ Edi idaha oro ŋwan kiet, emi eyen esie aŋwan enyenede edidehe spirit, okop abaŋa Enye, onyuŋ oduk edi ediduɔ Enye ke ukot

²⁶ Ŋwan oro edi Greek, oto idut Syrophoenicia. Enye ekpe ye Jesus ete ebin demon osio ke idem eyen imɔ

²⁷ Edi Jesus ɔdɔhɔ enye ete, Yak nditɔ ebem iso edia eyuhɔ: koro idotke ndimen uyo nditɔ nduɔk nnɔ mme ebua.

²⁸ Edi ŋwan ɔbɔrɔ Enye ete, Omodot, Ɔbɔŋ; kpa mme ebua ke idak okpokoro edadia ŋkeŋe udia nditɔ.

²⁹ Jesus ete enye, Kabaŋa ikɔ oro nyɔŋ ufɔk; demon ɔmɔwɔrɔ eyen fo ke idem.

³⁰ Ndien enye adaha ɔnyɔŋ ufɔk, okut eyen esie anade ke mkpana, ye nte demon ama ɔkɔwɔrɔ.

³¹ Ekem Jesus ɔtɔŋɔ ntak adaha ɔkpɔŋ adaŋa Tyre, asaŋa ke Sidon ebe ke ufɔt adaŋa Decapolis, edi ke Inyaŋ Galilee.

³² Ndien mmɔ eda owo inan, emi mikemeke nditim ntiŋ ikɔ esɔk Enye; enyuŋ ekpe Enye ubɔk ete edidori enye ubɔk ke idem.

³³ Jesus ɔkpɔŋ otu owo, ada owo oro ke idem esie ikpɔŋ, esin enye nnuenubɔk ke utɔŋ, onyuŋ ɔkɔk etap, otuk enye ke edeme;

³⁴ onyuŋ emenere enyin ese enyɔŋ, omum mmum, onyuŋ ɔdɔhɔ enye ete, Ephphatha, oro edi, Yak esirere.

³⁵ Ndien utɔŋ esie esirere, uruk edeme esie onyuŋ atara, ndien enye etiŋ ikɔ iŋwaŋ-iŋwaŋ.

³⁶ Edi Enye ɔsɔŋɔ ɔnɔ mmɔ uyo ete, Ekutiŋ enɔ ndomo owo kiet, edi adaŋa nte Enye ɔnɔnɔ uyo, ntre ke mmɔ edɔdiɔŋ esuan mbuk oro ekan.

³⁷ Ndien enyene mmɔ ndyɔ ebe adaŋa, mmɔ enyuŋ edɔhɔ ete, Enye ototim anam kpukpru ŋkpɔ; Enye anam kpa mme inan ekop ikɔ, mme imum enyuŋ etiŋ ikɔ.