MARK 16 - Edisana ñwed Abasi Ibom

Jesus Eset Ke Ŋkpa

¹ EKEM ke ini sabbath ebede, Mary Magdalene, ye Mary eka Joses, ye Salome edep ufuɔŋkpɔ, man mmɔ edi ediyet Enye idem.

² Ndien ke ntuhube usenubɔk ke akpa usen urua, mmɔ edi ke udi ke ini utin asiahade.

³ Ndien mmɔ eneme ye kiet eken ete, Anie edikpat itiat ke inua udi osio ɔnɔ nnyin?

⁴ Edi ke ini mmɔ emenerede enyin, mmɔ ekut ete ekekpat itiat esio: koro enye okpon eti-eti.

⁵ Ke ini mmɔ edukde ke esit udi, mmɔ ekut akparawa kiet etiede ke ŋkaŋ nnasia, esine afia ɔfɔŋidem; ndien idem akpa mmɔ.

⁶ Edi enye ɔdɔhɔ mmɔ ete, Ekuyak idem akpa mbufo: mbufo eyom Jesus eyen Nazareth, emi ekewotde ke cross: Enye emeset Enye iduhe mi ese ebiet emi ekenimde Enye.

⁷ Edi eka ekedɔhɔ mbet Esie ye Peter, ete Enye ebem mbufo iso aka ke Galilee: mbufo edikut Enye do, nte Enye ɔkɔdɔhɔde mbufo.

⁸ Ndien mmɔ ewɔŋɔ efeŋe ekpɔŋ udi, koro nnyek-idem ye mkpa-idem omumde mmɔ: mmɔ inyuŋ itiŋke baba ikɔ kiet inɔ owo, koro ndik anamde mmɔ.

⁹ Ke ini Jesus abakde eset ke akpa usen urua, ebem iso ayarare idem owut Mary Magdalene, emi Enye okosiode enye demon itiaba ke idem.

¹⁰ Enye oro aka okobuk ɔnɔ mmɔ emi ekodude ye Enye, nte mmɔ efuhɔde enyuŋ etuaŋade.

¹¹ Ndien ke ini mmɔ ekopde ete, Enye odu ke uwem, Mary ama onyuŋ okut Enye, mmɔ inimke ke akpanikɔ.

¹² Ke ŋkpɔ emi ama ekebe, Enye ayarare Idem ke ido efen owut owo mmɔ iba, nte mmɔ esaŋade ke usuŋ eka iŋwaŋ.

¹³ Ndien mmɔ oro edaha ekobuk enɔ mmɔ eken, mmɔ inyuŋ inimke mmɔ ke akpanikɔ.

¹⁴ Ke ukperedem Enye ayarare Idem Esie ɔnɔ mbet Esie duop-ekiet ke idem mmɔ nte mmɔ etiede ke itie-udia; Enye onyuŋ asua unana mbuɔtidem ye nsɔŋesit mmɔ ɔnɔ mmɔ, koro mmɔ minimke mmɔ oro ekokutde Enye ke Enye ama ekeset ke akpanikɔ.

¹⁵ Enye onyuŋ ɔdɔhɔ mmɔ ete, Eka ke ofuri ererimbot ekekwɔrɔ gospel enɔ kpukpru owo.

¹⁶ Owo eke onimde ke akpanikɔ onyuŋ anade baptism, eyenyaŋa enye; edi enye eke etrede ndinim ke akpanikɔ, ikpe eyebiom enye.

¹⁷ Ndien mme idiɔŋɔ emi eyetiene mmɔ emi enimde ke akpanikɔ: ke enyiŋ Mi ke mmɔ eyebin mme demon; eyesem mbufa usem;

¹⁸ eyemen urukikot ke ubɔk; onyuŋ edieke mmɔ eŋwɔŋde ŋkpɔ ekededi eke abiatde uwem, ididiɔkke ye mmɔ; mmɔ eyedori mbon-udɔŋɔ ubɔk, ndien mmɔ oro eyekop nsɔŋidem.

Jesus Ɔdɔk Ke Enyɔŋ

¹⁹ Ntre ndien ke Ɔbɔŋ Jesus ama eketiŋ ntem ɔnɔ mmɔ, emen Enye edɔk ke heaven, Enye onyuŋ ɔsuhɔre etie ke ubɔk nnasia Abasi.

²⁰ Ndien mmɔ ewɔŋɔ ekekwɔrɔ ikɔ ke kpukpru ebiet, Ɔbɔŋ onyuŋ anam utom ye mmɔ, onyuŋ ada mme idiɔŋɔ eke esaŋade ye erikwɔrɔ ɔsɔŋɔ ikɔ mmɔ.