MARK 15 - Edisana ñwed Abasi Ibom

Eda Jesus Eka Ke Iso Pilate

¹ EKEM eyo ekesesiere, ikpɔ oku ye mbiowo ye mme scribe ye ofuri esop esobo ibuot, ebɔp Jesus, eda Enye edaha ekeyak enɔ Pilate.

² Ndien Pilate obup Enye ete, Nte Afo edi Edidem mme Jew?

³ Jesus ɔbɔrɔ ete, Ndi Enye.

⁴ Edi ikpɔ oku edori Enye ediwak ikɔ. Pilate ɔtɔŋɔ ntak obup Enye ete, Nte Afo ubɔrɔke baba ikɔ kiet? se adaŋa ediwak ŋkpɔ ke mmɔ edori Fi.

⁵ Edi Jesus ibɔrɔke aba baba ŋkpɔ kiet; emi esin idem akpa Pilate eti-eti.

⁶ Edi ke kpukpru usɔrɔ andikara akam esisana owo-ŋkpɔkɔbi kiet, eke mmɔ ebeŋede, ayak ɔnɔ mbio-obio.

⁷ Ndien owo kiet emi ekerede Barabbas ke ana ke ebuka ye mmɔ emi ekesinde ndutime ke obio, kpa mbon emi ekowotde owo ke ndutime oro.

⁸ Ekem otu owo edɔk etiene Pilate, etɔŋɔ ndibeŋe enye ete anam nte akam anamde ye mme imɔ.

⁹ Edi Pilate ɔbɔrɔ mmɔ ete, Nte mbufo eyom ete nsana Edidem mme Jew nyak nnɔ mbufo?

¹⁰ Koro enye ɔfiɔk ete ikpɔ oku ekayak Jesus esin imɔ ke ubɔk ke ntak ufup.

¹¹ Edi ikpɔ oku edemere otu owo ndibeŋe ete enye akpakam ayak Barabbas ɔnɔ mme imɔ.

¹² Edi Pilate ɔtɔŋɔ ntak ɔbɔrɔ mmɔ ete, Eyom ami nnam ndien didie ye Enye emi mbufo ekotde Edidem mme Jew?

¹³ Mmɔ etɔŋɔ ntak efiori ete, Wot Enye ke cross.

¹⁴ Edi Pilate ɔdɔhɔ mmɔ ete, Ntak-e? nso idiɔk ŋkpɔ ke Enye akanam?

¹⁵ Edi mmɔ edɔdiɔŋ efiori ete, Wot Enye ke cross. Ekem ke eriyom ndinem otu owo esit, Pilate asana Barabbas ayak ɔnɔ mmɔ, ndien ke enye ama akamia Jesus, ayak Enye esin mmɔ ke ubɔk ete, Eda eka ekowot ke cross.

¹⁶ Ekem mbon-ekɔŋ eda Enye eduk ke esit okure, emi edide akwa ufɔk andikara; enyuŋ ekot ofuri ŋka mmɔ ebon.

¹⁷ Ndien mmɔ esine Enye ididuot ekura, enyuŋ edɔk anyanya ŋkukim eyara Enye ke ibout;

¹⁸ mmɔ enyuŋ etɔŋɔ ndikɔm Enye, ete, Etia, Edidem mme Jew.

¹⁹ Mmɔ enyuŋ eda eto emia Enye ke ibuot, ekɔk Enye etap, enyuŋ etɔŋɔ edɔŋ etuak ibuot enɔ Enye.

²⁰ Ndien ke ini mmɔ ema ekasak Enye ema, mmɔ efɔrɔre Enye ididuot ekura ke idem, enyuŋ esine Enye edisine-ŋkpɔ Esiemɔ, enyuŋ eda Enye ewɔrɔ eka ndiwot ke cross.

²¹ Ndien mmɔ enyik owo kiet emi ebede, Simon owo Cyrene, ete Alexander ye Rufus, emi otode ke iŋwaŋ ete asaŋa ye mme imɔ obiom cross Esie.

²² Mmɔ enyuŋ eda Enye edi ke ebiet Golgotha, emi ɔwɔrɔde Ebiet mkpɔkpɔrɔ.

²³ Mmɔ enyuŋ enɔ Enye wine emi esinde myrrh ke esit: edi Enye ibɔhɔ

²⁴ Ndien mmɔ ekɔŋ Enye ke cross, enyuŋ edeme edisine-ŋkpɔ Esie, esin afia ebaŋa mmɔ, ndifiɔk se mmɔ kiet kiet ekpadade.

²⁵ Ekedi ɔyɔhɔ hour usukkiet ke usenubɔk, ndien ekɔŋ Enye ke cross.

²⁶ Ndien mmɔ ewet ŋwed eridori-ikɔ edian ke enyɔŋ, ete, EDIDEM MME JEW.

²⁷ Mmɔ enyuŋ ekɔŋ mbon ŋwo iba ke cross ye Enye,

²⁸ kiet ke ubɔk nasia Esie, enye eken ke ufien.

²⁹ Mmɔ eke esaŋade ebe esuene Enye, enyeŋe ibuot ete, Ha! Afo emi owuride temple, onyuŋ ɔbɔpde enye ke usen ita,

³⁰ nyaŋa idem fo, nyuŋ suhɔre ke cross. Kpasuk ntre ŋko ikpɔ oku ye mme scribe esak

³¹ Enye nsahi ke otu idem mmɔ, ete, Enye akanyaŋa owo efen; ikemeke ndinyaŋa Idem Esie.

³² Yak Christ, Edidem Israel, ɔsuhɔre ke cross naŋa, man nnyin ikut inyuŋ inim ke akpanikɔ. Mmɔ emi ekɔkɔŋde ye Enye ke cross enyuŋ etɔk Enye.

³³ Ndien ke ini osimde ufɔt uwemeyo, ekim ofuk ofuri isɔŋ tutu osim ɔyɔhɔ hour ita ke uwemeyo.

³⁴ Ndien ke ɔyɔhɔ hour ita ke uwemeyo, Jesus ofiori ke ɔkpɔsɔŋ uyo, ete, Eloi, Eloi, lama sabachthani? emi ɔwɔrɔde, ete, Abasi Mi, Abasi Mi, nsinam Afo ɔkpɔŋde Mi?

³⁵ Ndien ke ini ndusuk mmɔ emi edade ekpere ekopde, mmɔ edɔhɔ ete, Sese, Enye ke okot Elijah.

³⁶ Ndien owo kiet efehe ekedebi ndɔbɔ ke vinegar owuk ke eto, ɔnɔ Enye ɔŋwɔŋ, onyuŋ ɔdɔhɔ ete, Yak etie; nnyin ise mme Elijah ke edi edikɔŋɔre Enye.

³⁷ Ndien Jesus osio ɔkpɔsɔŋ mkpo, onyuŋ ayak ukpɔŋ Esie.

³⁸ Ndien ukara temple asiaha mbak iba, ɔtɔŋɔde ke enyɔŋ, tutu osim isɔŋ.

³⁹ Ekem ke ini centurion, emi adade ekpere ekem iso ye Enye, okutde nte Enye ayakde ukpɔŋ Esie ntem, enye ete, Ke akpanikɔ owo emi ekedi Eyen Abasi.

⁴⁰ Iban ŋko edu do, eda nsan-nsan ese; Mary Magdalene odu ke otu mmɔ, ye Mary eka James ekpri ye Joses, ye salome,

⁴¹ emi ekasaŋade ye Enye ese ebaŋa Enye, ke adaŋemi Enye okodude ke Galilee, ye ediwak iban eŋwen, emi ekasaŋade ye Enye edɔk edi ke Jerusalem.

⁴² Ekem ke ini osimde mbubreyo, sia edide ini mbeŋe-idem, oro edi, usen emi ebemde sabbath iso,

⁴³ Joseph, owo Arimathaea, owo akwa esop emi enyenede ukpono, emi ke idem esie etiede ebet Ubɔŋ Abasi, edi; enye onyuŋ oduk etiene Pilate uko-uko ekebeŋe okpo Jesus.

⁴⁴ Ndien Pilate eyik mme Enye akpakpa ama; onyuŋ okot centurion, obup mme Enye ama akpa ebigi esisit.

⁴⁵ Ekem ke ini enye okopde uyo centurion, enye ayak okpo ɔnɔ Joseph.

⁴⁶ Enye oro onyuŋ edep ɔfɔn linen ɔkɔŋɔre okpo ada ɔfɔŋ linen oro ɔbɔp Enye ke idem, onyuŋ onim Enye ke udi emi eketuŋde ke itiat: onyuŋ akpat itiat eberi ke inua udi.

⁴⁷ Ndien Mary Magdalene ye Mary eka Joses ekut ɔtɔ nte enimde Enye.