MARK 1 - Edisana ñwed Abasi Ibom

Ukwɔrɔ ikɔ John

¹ ERITƆŊƆ gospel Jesus Christ, Eyen Abasi.

² Kpa nte ewetde ke ŋwed prophet Isaiah, ete, Sese, mmɔdɔŋ isuŋutom Mi ebem Fi iso, Emi edinamde usuŋ Fo;

³ Uyo andifiori ke desert, ete, Mbufo ediɔŋ usuŋ Jehovah, Eneŋere ɔkpɔusuŋ Esie;

⁴ John oto edi edinim owo baptism ke desert, edinyuŋ ɔkwɔrɔ baptism erikabare esit, man efen mme idiɔk-ŋkpɔ.

⁵ Ndien mbio ofuri edem Judea, ye kpukpru mme andiduŋ Jerusalem ewɔŋɔ etiene enye, enyuŋ ena baptism ke ubɔk esie ke akpa Jordan, ke eyararede mme idiɔk-ŋkpɔ mmɔ.

⁶ John esine edisine-ŋkpɔ idet camel, onyuŋ ɔbɔbɔ mbɔbɔ ikpa-unam ke isin, onyuŋ adia ŋkukuŋkpɔyɔriyɔ ye aranɔkwɔk-ikɔt.

⁷ Ndien enye ɔkwɔrɔ ete, Enye emi enyenede odudu akan mi etiene mi ke edem edi, emi mmendotke ndinuhɔ ntat uruk ikpa-ukot Esie.

⁸ Ami nda mmɔŋ nnim mbufo baptism; edi Enye eyenim mbufo baptism ke Edisana Spirit.

⁹ Edikem ke mme usen oro, Jesus oto ke Nazareth obio Galilee, onyuŋ ana baptism ke ubɔk John ke akpa Jordan.

¹⁰ Ndien kpa idaha oro Enye ɔwɔrɔde ke mmɔŋ ɔdɔk, Enye okut nte enyɔŋ asiahade, ye nte Spirit ɔsuhɔrede nte ibiom edidoro Enye ke idem:

¹¹ uyo onyuŋ oto ke enyɔŋ, ete, Afo edi edima Enyen Mi; mmenem esit eti-eti ye Afo.

¹² Ekem idaha oro Spirit ebin Enye esin ke desert.

¹³ Ndien Enye odu ke desert usen aba, Satan onyuŋ odomo Enye; ndien Enye odu ye mme unam ikɔt; mme angel enyuŋ enam ŋkpɔ enɔ Enye.

¹⁴ Edi ke ema ekayak John enɔ, Jesus aka ke Galilee ɔkɔkwɔrɔ gospel Abasi, ete,

¹⁵ Ini emekem, Ubɔŋ Abasi ke ekpere: mbufo ekabare esit enyuŋ enim gospel ke akpanikɔ.

¹⁶ Ekem nte Enye asaŋade ke mben Inyaŋ Galilee, Enye okut Simon ye Andrew eyen-eka Simon, nte eduɔŋɔde iyire ke inyaŋ; koro mmɔ edide mme ɔkɔ-iyak.

¹⁷ Ndien Jesus ɔdɔhɔ mmɔ ete, Etiene Mi, ndien nyenam mbufo ekabare edi mme ɔkɔ-owo.

¹⁸ Ndien ndo-ndo oro mmɔ edaha ekpɔŋ iyire, etiene Enye.

¹⁹ Nte Enye ebede asaŋa ke iso esisit, Enye okut James eyen Zebedee ye John eyen-eka esie; mmɔ enyuŋ etie ke ubom ediɔŋ iyire mmɔ.

²⁰ Idaha oro Enye okot mmɔ; ndien mmɔ edaha ekpɔŋ ete mmɔ Zebedee ye mbio ukpe-utom ke ubom, etiene Enye.

²¹ Ekem mmɔ eduk ke Capernaum: ndien idaha oro ke usen sabbath Jesus oduk ke synagogue ekpep owo ŋkpɔ.

²² Ndien erikpep Esie enyene mmɔ ndyɔ; koro Enye ekpepde mmɔ nte owo emi enyenede odudu, idige nte mme scribe.

²³ Ndien idaha oro owo emi enyenede edidehe spirit odu ke synagogue mmɔ:

²⁴ enye onyuŋ ofiori ete, Isaŋa nso ye Afo, Jesus eyen Nazareth? Nte emedi ndisobo nnyin? mmɔdiɔŋɔ owo eke Afo edide, Edisana Eyen Abasi.

²⁵ Edi Jesus asua ɔnɔ enye, ete, Kibi inua, nyuŋ wɔrɔ enye ke idem.

²⁶ Ndien ke edidehe spirit ama akawai enye, ofiori ke ɔkpɔsɔŋ uyo, onyuŋ ɔwɔrɔ enye ke idem.

²⁷ Idem akpa mmɔ kpukpru, tutu ebup kiet eken ete, Nso ŋkpɔ edi emi? Obufa ukpep-ŋkpɔ! Enye ada odudu owuk ndidehe spirit, ndien mmɔ ekop uyo Esie.

²⁸ Idaha oro etop Esie asuana ke kpukpru ebiet ke ŋkan-ŋkuk Galilee.

²⁹ Ekem idaha oro, ke ini mmɔ ewɔrɔde ke synagogue, mmɔ esaŋa ye James ye John eduk ke ufɔk Simon ye Andrew.

³⁰ Edi eka ŋwan Simon ana ɔdɔŋɔ ufiop-idem; ndien idaha oro mmɔ esian Jesus ebaŋa enye.

³¹ Ndien Jesus edi edimum enye ke ubɔk, emenere enye; ndien ufiop-idem ɔkpɔŋ enye, enye onyuŋ anam ŋkpɔ ɔnɔ mmɔ.

³² Ekem ke mbubreyo, ke ini utin ama okosop, eda kpukpru mbon udɔŋɔ ye mmɔ emi enyenede demon esɔk Enye.

³³ Ofuri obio enyuŋ ebono ɔtɔ kiet ke enyin-usuŋ.

³⁴ Ndien Enye anam ediwak owo emi edɔŋɔde nsio-nsio udɔŋɔ, ekop nsɔŋidem, onyuŋ ebin ediwak demon ɔduɔk; inyuŋ iyakke mme demon esioro uyo, koro mmɔ ediɔŋɔde Enye.

³⁵ Ekem ke ŋkim-ŋwaŋa usen-ubɔk, Enye adaha ke enyɔŋ ɔwɔrɔ aka ke ebiet desert, onyuŋ ɔbɔŋ akam do.

³⁶ Edi Simon ye mmɔ emi edude ye enye ebine Enye; ndien mmɔ ekut Enye,

³⁷ enyuŋ edɔhɔ Enye ete, Kpukpru owo ke eyom Fi.

³⁸ Edi Enye ɔdɔhɔ mmɔ ete, Eyak nnyin ika ebiet eŋwen iduk ke mme obio eke ekperede, man ŋkwɔrɔ ikɔ do ŋko; koro ŋkɔwɔrɔ ndi ke ntak emi.

³⁹ Ndien Enye asaŋa oduk ke mme synagogue mmɔ ke ofuri Galillee, ɔwɔrɔ ikɔ, onyuŋ ebin demon ɔduɔk.

⁴⁰ Ekem owo akpa-mfia edi edikpe Enye ubɔk, onyuŋ ɔtɔŋɔ edɔŋ, ete Enye, ke Afo onyimede, emekeme ndinam mi nsana.

⁴¹ Ndien mbɔm anam Jesus, Enye onyuŋ anyanare ubɔk otuk enye ete, Mmonyime, sana.

⁴² Ndien ndo-ndo oro akpamfia ɔkpɔŋ enye, enye onyuŋ akabare asana.

⁴³ Edi Jesus ɔsɔŋɔ owuk enye, anam enye ɔnyɔŋ ini kiet, onyuŋ ɔdɔhɔ enye ete,

⁴⁴ Kpeme, kutiŋ baba ikɔ kiet unɔ ndomo owo kiet: edi nyɔŋ kowut oku idem fo, nyuŋ wa se Moses eketemede baŋa erinam fi asana, man edi ŋkpɔ-ntiense ɔnɔ owo.

⁴⁵ Edi enye ɔwɔrɔ ɔtɔŋɔ nditaŋa ŋkpɔ emi eti-eti, ndinyuŋ nsuan ikɔ emi, tutu Jesus ikemeke aba ndiduk ke obio aŋwa-aŋwa, edi odu ke edem ke ebiet desert: ndien mmɔ eto ke kpukpru edem etiene Enye.