LUKE 3 - Edisana ñwed Abasi Ibom

Ukwɔrɔ Ikɔ John

¹ KE ɔyɔhɔ isua efut emi Tiberius Caesar adade ubɔŋ, ke ini Pontius Pilate edide andikara Judaea, Herod onyuŋ edide tetrarch Galilee, Philip eyen-ete esie onyuŋ edide tetrarch edem Ituraea ye Trachonitis, Lysanias onyuŋ edide tetrarch Abilene;

² ke ini Annas ye Caiaphas edide ikpɔ oku; uyo Abasi osim John eyen Zechariah ke desert.

³ Ndien enye asaŋa ke ofuri ŋkan-ŋkuk Jordan edikwɔrɔ baptism erikabare esit, man efen mme idiɔk-ŋkpɔ;

⁴ nte ewetde ke ŋwed prophet Isaiah, ete, Uyo andifiori ke desert, ete, Mbufo ediɔŋ usuŋ Jehovah, Eneŋere ɔkpɔusuŋ Esie.

⁵ Eyemenere kpukpru itihere ebiet ke enyɔŋ, Eyenyuŋ enam kpukpru ikpɔ ye ŋkpri obot esuhɔre, Se ikwaŋade eyekabare enen, Ŋkputuk-ŋkputuk usuŋ eyedɔnɔ;

⁶ Kpukpru owo eyenyuŋ ekut erinyaŋa Jehovah.

⁷ Ntre ke enye ɔdɔhɔ mme otu owo emi ewɔŋɔde edi edina baptism ke ubɔk esie, ete, Mbufo nditɔ urukikɔt, anie eketeme mbufo efeŋe ebɔhɔ iyaresit eke edide?

⁸ Esioŋo naŋa ndien mfri eke odotde erikabare esit; ekunyuŋ etɔŋɔ ndidɔhɔ ke esit mbufo ete, Ŋkɔm imenyene Abraham ke ete: koro ndɔhɔ mbufo nte, Abasi emekeme ndinam mme itiat emi edaha eda edi nditɔ Abraham.

⁹ Edi kpa idahemi emenim ekudi ke etak eto: ntre ke ekpi kpukpru eto eke miŋwomke eti mfri eduɔk, emen, esin ke ikaŋ.

¹⁰ Mme otu owo ebup enye ete, Nnyin inyene ndinam nso?

¹¹ Enye ɔbɔrɔ mmɔ ete, Yak owo eke enyenede ɔfɔŋidem iba ada kiet ɔnɔ owo eke minyeneke; yak owo eke enyenede udia onyuŋ anam kpa ntre.

¹² Edi mme publican nde edi ndina baptism, mmɔ enyuŋ edɔhɔ enye ete, Andikpep, nnyin inyene ndinam nso?

¹³ Enye ete mmɔ, Ekubɔ owo ŋkpɔ ekan se ekonimde enɔ mbufo ndibɔ.

¹⁴ Mbonekɔŋ nde ebup enye ete, Nnyin inyene ndinam nso? Enye ete mmɔ, Ekutuk owo, ekunyuŋ edori owo ikɔ ke nsu, enyuŋ enemesit ye ŋkpɔ-eyen-utom mbufo.

¹⁵ Edi ke ini mbio-obio etiede ke idori-enyin, kpukpru owo enyuŋ enenide ebaŋa John ke esit mmɔ ete, me enye ekpedi Christ;

¹⁶ John ɔbɔrɔ mmɔ kpukpru ete, Ami nda mmɔŋ nnim mbufo baptism; edi Enye emi enyenede odudu akan mi ɔmɔŋ edi, emi mmendotke nditat ikpaukot Esie: Enye eyenim mbufo baptism ke Edisana Spirit ye ikaŋ.

¹⁷ Usak-ŋkpɔ Esie odu Enye ke ubɔk, ndida nnam itie-ubek-ibokpot Esie otim asana, Enye eyenyuŋ obon ibokpot Esie ke ubet; edi eyefɔp mbio ke ikaŋ eke midinimeke.

¹⁸ Ntem ke John ada ediwak ikɔ item eŋwen ekpe ye mbio-obio, onyuŋ ɔkwɔrɔ gospel ɔnɔ mmɔ; edi,

¹⁹ sia enye asuade ɔnɔ Herod terarch abaŋa Herodias, ŋwan eyen-ete esie, ye kpukpru mme idiɔk-ŋkpɔ eke enye akanamde,

²⁰ Herod ɔkɔrɔ idiɔk-ŋkpɔ emi ke kpukpru mmɔ eken, ɔkɔbi John abaha ke ufɔk-ŋkpɔkɔbi.

John Ɔduɔk Jesus Mmɔŋ

²¹ Edikem, ke ini kpukpru owo enade baptism ema, Jesus onyuŋ anade baptism onyuŋ ɔbɔŋde akam,

²² enyɔŋ eberere, ndien Edisana Spirit ɔsuhɔre ke mbiet ibiom edidoro Enye ke idem: ndien uyo oto ke enyɔŋ, ete, Afo edi edima eyen Mi; mmenem esit eti-eti ye Afo.

Mme Ete Ete Jesus

²³ Ndien Jesus ke Idem Esie edi ŋkpɔ nte isua edip ye duop ke ini ɔtɔŋɔde ndikpep owo ŋkpɔ; owo enyuŋ ese ete, Enye edi eyen Joseph, eyen Heli,

²⁴ eyen Matthat, eyen Levi, eyen Melchi, eyen Jannai, eyen Joseph,

²⁵ eyen Mattathias, eyen Amos, eyen Nahum, eyen Esli, eyen Naggai,

²⁶ eyen Maath, eyen Mattathias, eyen Semein, eyen Josech, eyen Joda,

²⁷ eyen Joanan, eyen Rhesa, eyen Zerubbabel, eyen Shealtiel, eyen Neri,

²⁸ eyen Melchi, eyen Addi, eyen Cosam, eyen Elmadam, eyen Er,

²⁹ eyen Jesus, eyen Eliezer, eyen Jorim, eyen Matthat, eyen Levi,

³⁰ eyen Simeon, eyen Judah, eyen Joseph, eyen Jonam, eyen Eliakim,

³¹ eyen Melea, eyen Menna, eyen Mattatha, eyen Nathan, eyen David,

³² eyen Jesse, eyen Obed, eyen Boaz, eyen Sala, eyen Nahshon,

³³ eyen Amminadab, eyen Admin, eyen Arni, eyen Hezron, eyen Perez, eyen Judah,

³⁴ eyen Jacob, eyen Isaac, eyen Abraham, eyen Terah, eyen Nahor,

³⁵ eyen Serug, eyen Rue, eyen Peleg, eyen Eber, eyen Sala,

³⁶ eyen Cainan, eyen Arphaxad, eyen Shem, eyen Noah, eyen Lamech,

³⁷ eyen Methuselah, eyen Enoch, eyen Jared, eyen Mahalaleel eyen Cainan,

³⁸ eyen Enos, eyen Seth, eyen Adam, eyen Abasi.