LUKE 23 - Edisana ñwed Abasi Ibom

Eda Jesus Eka Ke Iso Pilate

¹ EKEM mmɔ kpukpru edaha, eda Enye eka ke iso Pilate.

² Mmɔ enyuŋ etɔŋɔ ndidori Enye ikɔ, ete, Nnyin imokut owo emi nte abiatde mbio-obio ibuot, akpan ete ekunɔ Caesar utomo, onyuŋ ɔdɔhɔ ete, Imo ke Idem Imɔ idi Christ Edidem.

³ Edi Pilate obup Enye ete, Nte Afo edi Edidem mme Jew? Jesus ɔbɔrɔ enye ete, Ndi Enye.

⁴ Pilate ɔdɔhɔ ikpɔ oku ye mme otu owo, ete, Ŋkwe idiɔk ke idem owo emi.

⁵ Edi mmɔ edɔdiɔŋ esɔŋɔ eyire ete, Enye obubere mbio-obio, ekpep mmɔ ŋkpɔ ke ofuri Judaea, ɔtɔŋɔ ke Galilee osim ebiet emi.

⁶ Ke adaŋemi Pilate okopde emi, obup mme owo oro edi eyen Galilee.

⁷ Ndien ke adaŋemi enye ɔfiɔkde ete Enye odu ke idak erikara Herod, ɔnɔ Enye esɔk Herod; emi nde odude ke Jerusalem ke mme usen oro.

⁸ Ke adaŋemi Herod okutde Jesus esit adat enye eti-eti; koro enye okoyoyom anyan ini ndikut Enye, koro okokopde abaŋa Enye: onyuŋ odori enyin ete iyekut Enye anamde utibe ŋkpɔ kiet.

⁹ Enye obup Jesus ediwak mbume; edi Jesus ibɔrɔke baba ikɔ kiet.

¹⁰ Ndien ikpɔ oku ye mme scribe eda do, edori Enye ikɔ adaŋa nte mmɔ ekekeme.

¹¹ Herod ye mbon-ekɔŋ esie enyuŋ esak Enye nsahi, enyuŋ ebiaŋa Enye; ndien esine Enye ɔfɔŋidem edidem, ɔnɔ Enye efiak esɔk Pilate.

¹² Edi Herod ye Pilate ekabare mme ufan kpa usen oro, koro mmɔ ekedide usua ke mbemiso.

¹³ Ndien Pilate, ke okotde ikpɔ oku ye mbon esop ye mbio-obio obon ɔtɔ kiet, ɔdɔhɔ mmɔ ete,

¹⁴ Mbufo ekeda owo emi esɔk mi nte owo eke abiatde mbio-obio ibuot: ndien sese, ŋkodomo Enye ke iso mbufo, edi ŋkwe baba idiɔk-ŋkpɔ kiet ke idem esie mbaŋa mme ikɔ eke mbufo edoride Enye.

¹⁵ Herod inyuŋ ikwe: koro ɔnɔ Enye efiak esɔk nnyin; ndien sese, Enye inamke baba ŋkpɔ kiet eke odotde mkpa.

¹⁶ Mmɔdo nyemia Enye, nnyuŋ nsana Enye nyak.

^17-18 Edi kpukpru mmɔ efiori ete, Men owo emi fep; sana Barabbas yak nɔ nnyin:

¹⁹ Barabbas edi owo emi ekesinde ke ufɔk-ŋkpɔkɔbi kabaŋa ndutime emi enye okobuberede ke obio, owot owo.

²⁰ Edi Pilate ɔtɔŋɔ ntak ekpe ye mmɔ, sia ɔdɔŋde enye ndisana Jesus nyak:

²¹ edi mmɔ esio mkpo, wot, wot Enye ke cross.

²² Ndien enye ekpe ye mmɔ ɔyɔhɔ utim ikata, ete Ntak-e? Owo emi akanam nso idiɔk ŋkwe baba ŋkpɔ kiet emi odotde mkpa ke Enye: ntre nyemia Enye, nsana Enye nyak.

²³ Edi mmɔ esɔŋ uyo eyire ete, Ewot Enye ke cross.

²⁴ Ndien uyo mmɔ akan. Pilate ɔnɔ uyo ete enam nte mmɔ ebeŋede.

²⁵ Ntre ke enye asana owo emi ebeŋede ayak, kpa owo emi ekesinde ke ufɔk-ŋkpɔkɔbi ebaŋa ndutime ye obom, onyuŋ ayak Jesus ɔnɔ mmɔ ete enam ye Enye nte mmɔ emade.

²⁶ Ndien nte mmɔ edade Enye edaha, mmɔ emum simon, owo Cyrene, emi otode ke iŋwaŋ, emen cross edori enye ke edem, ete ada etiene Jesus.

²⁷ Ndien ata ediwak owo etiene Enye, ye ata ediwak iban emi etuaŋade enyuŋ esemede Enye.

²⁸ Edi Jesus ɔwɔŋɔre ese mmɔ, onyuŋ ɔdɔhɔ mmɔ ete, Nditɔ-iban Jerusalem, ekutua Mi; etua idem mbufo ye nditɔ mbufo.

²⁹ Koro sese, mme usen ke edi eke edidɔhɔde ete, Ɔfɔfɔn ye mme ada, ye mme idibi eke akanam mimanke eyen, ye mme eba eke akanam nditɔ miwapke.

³⁰ Adaŋoro mmɔ eyetɔŋɔ ndidɔhɔ ikpɔ obot ete, Eduɔ etɔ nnyin: eyenyuŋ edɔhɔ ŋkpri obot ete, Efuk nnyin.

³¹ Koro edieke enamde ŋkpɔ emi ye nsehe eto, edinam didie ye nsat eto?

³² Mmɔ enyuŋ eda mme anam-idiɔk iba eŋwen, esaŋa ye Enye eka ndiwot.

³³ Ke adaŋemi mmɔ esimde ebiet emi ekotde Calvary (mkpɔkpɔrɔ), mmɔ ekɔŋ Enye do ke cross, ye mme anam-idiɔk oro, owo kiet ke ubɔk nnasia, enye eken ke ufien.

³⁴ Edi Jesus ete, Ete, dahado nɔ mmɔ koro mmɔ mifiɔkke se mmɔ enamde. Mmɔ esin afia edeme edisine-ŋkpɔ Esie ke otu idem mmɔ.

³⁵ Mbio-obio edada ese. Mbɔŋ enyuŋ esak Enye nsahi ete, Akanyaŋa owo efen; yak Enye anyaŋa Idem Esie edieke Enye edide Christ Abasi, emi Abasi ekemekde.

³⁶ Mbonekɔŋ enyuŋ ebiaŋa Enye, esaŋa ekpere Enye, enɔ Enye vinegar, ete,

³⁷ Edieke Afo edide Edidem mme Jew, nyaŋa Idem Fo.

³⁸ Enyuŋ ewet ŋwed edian ke enyɔŋ ibuot Esie, ete, EMI EDI EDIDEM MME JEW.

³⁹ Ndien anam-idiɔk kiet emi ɔkɔŋɔde ke cross ɔtɔk Enye ete, Nte Afo udige Christ? nyaŋa Idem Fo ye nnyin.

⁴⁰ Edi anam-idiɔk eken ɔbɔrɔ, asua ɔnɔ enye, ete, Nte afo ufeheke Abasi, emi afo odude kpa ke ubiom-ikpe oro?

⁴¹ Ndien ke akpanikɔ nnyin ikut ufen eke enende: koro nnyin ibɔ utip eke odotde ke erinam nnyin: edi owo emi iduehe baba ŋkpɔ kiet.

⁴² Enye onyuŋ ɔdɔhɔ Jesus ete, Ɔbɔŋ, ti mi ke adaŋemi Afo edide ndida ubɔŋ.

⁴³ Ndien Jesus ɔbɔrɔ enye ete, Ke akpanikɔ ke ndɔhɔ fi, mfin emi afo eyedu ye Ami ke Paradise.

⁴⁴ Ekpere ufɔt uwemeyo ke emi, ndien ekim ofuk ofuri isɔŋ tutu osim ɔyɔhɔ hour ita ke uwemeyo; koro uŋwana utin onimede:

⁴⁵ ukara temple onyuŋ asiaha ke ufɔt.

⁴⁶ Ndien Jesus ofiori ke ɔkpɔsɔŋ uyo, ete, Ete, mmayak spirit Mi nsin Fi ke ubɔk; ndien ke Enye amaɔkɔdɔhɔ ntem, Enye ayak Spirit Esie.

⁴⁷ Ndien ke ini centurion okutde se itibede, enye ɔnɔ Abasi itoro ete, ke akpanikɔ owo emi ekedi edinen owo.

⁴⁸ Ke ini ofuri otu owo, emi ekedide ndise ŋkpɔ emi, ekutde mme ŋkpɔ eke etibede, mmɔ eyibi ubɔk ke ikpanesit, efiak enyɔŋɔ.

⁴⁹ Ndien kpukpru mme idiɔŋɔ Esie, ye iban emi eketode ke Galilee esaŋa ye Enye, eda do nsan-nsan ese mme ŋkpɔ emi.

⁵⁰ Ndien sese, owo kiet odu, emi ekerede Joseph, emi edide owo akwa esop, onyuŋ edide eti ye edinen owo (enye ikasaŋake do ke uduak ye erinam mmɔ)

⁵¹ enye edi eyen Arimathaea, obio mme Jew kiet, emi onyuŋ etiede ebet Ubɔŋ Abasi:

⁵² owo emi oduk etiene Pilate ekebeŋe okpo Jesus.

⁵³ Ndien enye ɔkɔŋɔre okpo, ada ɔfɔŋ linen ɔbɔp enye, onim ke udi emi eketuŋde ke itiat, eke akanam minimke owo ke esit.

⁵⁴ Ekedi usen mbeŋe-idem, sabbath ke onyuŋ ekpere ndisiere.

⁵⁵ Ndien iban, emi eketode ke Galilee esaŋa ye Jesus, etiene ke edem, enyuŋ ekut udi, ye adaŋa nte enimde okpo Esie.

⁵⁶ Ndien mmɔ efiak enyɔŋɔ eketim ufuɔ ŋkpɔ ye myrrh. Ndien ke sabbath mmɔ eduɔk odudu nte ibet etemede.