LUKE 22 - Edisana ñwed Abasi Ibom

Ikpɔ oku ye mme scribe Eyom usuŋ Ndiwot Jesus

¹ EKEM usɔrɔ uyo eke leaven miduhe, emi ekerede passover, ekpere.

² Ndien ikpɔ oku ye mme scribe ekeyom usuŋ nte mmɔ ekpasaŋade ewot Enye, koro mmɔ efehede mbio-obio.

Judas Ada Jesus Ayak Ɔnɔ Mme Ikpɔ Oku Ye Mme Etubom Mbon-Ekɔŋ

³ Edi Satan oduk ke esit Judas, emi ekotde ekadian Iscariot, emi edide owo kiet ke otu mbet duopeba.

⁴ Ndien enye adaha aka ekeneme nneme ye ikpɔ oku ye mme etubom mbon-ekɔŋ, abaŋa nte edisaŋade ada Enye ayak ɔnɔ mmɔ.

⁵ Mmɔ edat esit, enyuŋ ediomi ndinɔ enye okuk.

⁶ Enye onyime, onyuŋ oyom eti ifet ndida Enye nyak nnɔ mmɔ, ke ini mbio-obio miduhe.

⁷ Ekem osim usen uyo eke leaven miduhe, eke enyenede ndiwot passover ke esit.

⁸ Ndien Jesus osio Peter ye John ɔdɔŋ, ete, Eka ekenam passover ebeŋe enim enɔ nnyin, man nnyin idia.

⁹ Edi mmɔ ete Enye, Ke mmɔŋ ke oyom inam ŋkpɔ ebeŋe inim?

¹⁰ Enye ɔdɔhɔ mmɔ ete, Sese, ke ini mbufo edidukde ke obio, owo eke obiomde abaŋ mmɔŋ eyesobo ye mbufo; etiene enye eduk ke ufɔk eke enye edidukde.

¹¹ Enyuŋ edɔhɔ enyene-ufɔk ete, Andikpep ɔdɔhɔ fi ete, Ubet isen odu mmɔŋ, eke ndidiade passover ye mbet Mi?

¹² Ndien enye eyewut mbufo akwa ubet enyɔŋ, emi ema ekediɔŋ ema: etim ŋkpɔ do ebeŋe.

¹³ Mmɔ eka, enyuŋ ekut nte Enye ɔkɔdɔhɔde mmɔ; ndien etim passover ebeŋe.

¹⁴ Ndien ke ini ekemde, Enye ɔsuhɔre etetie ye mme apostle.

¹⁵ Ndien enye ɔdɔhɔ mmɔ ete, Ke ɔkɔdɔŋ Mi ɔkpɔsɔŋ ndidia passover emi ye mbufo, ndien ndikpa mkpa:

¹⁶ koro mmɔdɔhɔ mbufo nte, Ndidiaha enye aba, tutu enye ɔwɔrɔ osu ke Obio Ubɔŋ Abasi.

¹⁷ Ekem Enye emen cup, ndien ke ama ɔkɔnɔ ekɔm, ɔdɔhɔ ete, Eda emi edeme ke otu idem mbufo:

¹⁸ koro mmɔdɔhɔ mbufo nte, Ɔtɔŋɔde ke emi ndiwɔŋke aba mfri vine tutu Ubɔŋ Abasi edi.

¹⁹ Enye onyuŋ emen uyo, ndien ke ama ɔkɔnɔ ekɔm, obuŋ, ɔnɔ mmɔ, ete, Emi edi ikpɔhidem Mi eke enɔde kabaŋa mbufo: enam emi nditi Mi.

²⁰ Enye anam kpa ntre ye cup, ke ini mmɔ ediade ema, ete, Cup emi edi Obufa Ediomi ke iyip Mi, emi eduɔkde kabaŋa mbufo.

²¹ Edi sese, ubɔk andida Mi nnɔ odu ye Ami ke okpokoro.

²² Koro Eyen Owo ke ɔnyɔŋ kpa nte ekenimde: edi eyedɔdiɔk ɔnɔ owo oro edidade Enye ɔnɔ.

²³ Ndien mmɔ etɔŋɔ ndineni eneni ke otu idem mmɔ, ete, mme anie owo ke otu mme imɔ edinam ŋkpɔ emi.

²⁴ Ndomo-idem onyuŋ otibe ke otu mmɔ, ete, mme ekpebat anie ke otu mme imɔ nte andikpon-ŋkan.

²⁵ Edi Jesus ɔdɔhɔ mmɔ ete, Ndidem mme Gentile ekara mmɔ; enyuŋ ekot mmɔ emi enyenede odudu ndikara mmɔ, ete Mme anam-ufɔn.

²⁶ Edi inyeneke ndidi ntre ye mbufo: yak enye emi okponde akan ke otu mbufo akabare etie nte eyenɔwɔŋ; enye emi onyuŋ edide etubom akabare etie nte anam-utom.

²⁷ Koro anie owo edi andikpon-ŋkan? ndi enye emi etiede ke itie-udia, mme enye emi adade mbet? nte idige enye emi etiede ke itie-udia okpon akan? edi Ami ndu ke otu mbufo nte enye emi adade mbet.

²⁸ Mbufo edi mmɔ emi ekesɔŋɔde eda ye Ami ke idomo Mi;

²⁹ kpa nte Ete Mi okonimde Obio Ubɔŋ ɔnɔ Mi,

³⁰ kpasuk ntre ke Ami nnyuŋ nnim nnɔ mbufo nte edia ŋkpɔ enyuŋ eŋwɔŋ ŋkpɔ ke okpokoro Mi ke Obio Ubɔŋ Mi; mbufo eyenyuŋ etie ke ebekpo ekpe ikpe enɔ mme esien Israel duopeba.

Jesus Ɔdɔhɔ Ke Peter Eyekaŋ Enye

³¹ Simon, Simon, sese, Satan ekebeŋe mbufo ɔbɔ, man asak mbufo nte ibokpot: edi ŋkekpe ubɔk nnɔ fi,

³² nte mbuɔt-idem okubɔhɔ fi: ndien afo ŋko, ke ini editɔŋɔde ntak akabare, sɔŋɔ nditɔ-ete fo idem.

³³ Edi Peter ɔdɔhɔ Enye ete, Ɔbɔŋ, mmonyime nditiene Fi ŋka ke ŋkpɔkɔbi ye mkpa.

³⁴ Edi Jesus ete, Peter, ndɔhɔ fi nte, Ekikɔ idikpɔkke mfin emi tutu afo akaŋ utim ikata ete imɔ idiɔŋɔke Mi.

³⁵ Enye onyuŋ ɔdɔhɔ mmɔ ete, Ke ini ŋkosioŋode mbufo ndɔŋ utom nte, ekukama ekpat-okuk ye ekpat-udia ye ikpa-ukot, nte ŋkpɔ ama anana mbufo? Mmɔ ebɔrɔ ete, Ŋkpɔ inanake.

³⁶ Ndien Enye ɔdɔhɔ mmɔ ete, Edi ke emi, owo eke enyenede ekpat-okuk emen, onyuŋ ada ekpat-udia ŋko; owo eke minyuŋ inyeneke ofut, yak enye anyam ekura edep.

³⁷ Koro ndɔhɔ mbufo nte, Se ekewetde ete, Ebat Enye esin ke otu mme abiat-ibet, enyene ndiwɔrɔ nnɔ Mi: koro mme ŋkpɔ eke eketiŋde ebaŋa Mi enyene ndisu.

³⁸ Ndien, mmɔ edɔhɔ Enye ete ɔbɔŋ sese, ofut iba mi, ndien Enye ɔdɔhɔ mmɔ ete, Ekem adaŋoro.

³⁹ Ekem Enye ɔwɔrɔ aka ke Obot Olive nte ido Esie edide; mbet Esie enyuŋ etiene Enye.

⁴⁰ Ndien ke ini osimde ebiet oro, Enye ɔdɔhɔ mmɔ ete, Ebɔŋ akam ebeŋe ete mme imɔ ikuduk ke idomo.

⁴¹ Ndien Enye esehere ɔkpɔŋ mmɔ adaŋa nte ubɔk iyurɔ kiet; onyuŋ ɔtɔŋɔ edɔŋ ɔbɔŋ akam ete,

⁴² Ete, edieke Afo onyimede, men Mi cup emi fep: edi okudi nte Ami nnyimede, yak edi nte Afo oyimede.

⁴³ Edi angel oto ke heaven ɔbiɔŋɔre Enye ke iso ndisɔŋɔ Enye idem.

⁴⁴ Ndien Enye oduk ke ɔkpɔsɔŋ eŋwan, onyuŋ ɔdɔdiɔŋ ɔsɔŋɔ ɔbɔŋ akam: ndien ibibiak Esie etie nte mme ntɔi iyip eke etɔide ke isɔŋ.

⁴⁵ Ndien Enye adaha ke akam etiene mbet Esie okut nte mmɔ edede ɔnɔ mfuhɔ, onyuŋ ɔdɔhɔ mmɔ ete, Nsinam mbufo edede?

⁴⁶ Edaha ke enyɔŋ ebɔŋ akam, mbak mbufo ediduk ke idomo.

Mbon Ekɔŋ Emum Jesus

⁴⁷ Ke adaŋemi Enye osuk etiŋde ntem, sese, otu owo edi, ndien owo kiet ke otu mbet duopeba, emi ekerede Judas, ada mmɔ usuŋ: ndien enye asaŋa ekpere Jesus, ete itim Enye inua.

⁴⁸ Edi Jesus ɔdɔhɔ enye ete, Judas, nte ada ntim-inua ada Eyen Owo ɔnɔ?

⁴⁹ Edi ke ini mmɔ emi edude ye Enye ekutde se iyomde ndiwɔrɔ, mmɔ ete Enye, Ɔbɔŋ me nnyin isio ofut?

⁵⁰ Ndien owo kiet ke otu mmɔ ekpi owo akwa oku, osibe enye utɔŋ nnasia efep.

⁵¹ Edi Jesus ɔbɔrɔ ete, Eyak etre adaŋa oro. Ndien Enye otuk utɔŋ owo oro, anam enye ɔfɔn,

⁵² Edi Jesus ɔdɔhɔ ikpɔ oku, ye mme etubom temple, ye mbiowo emi edide ndimum Enye, ete, Nte mbufo emewɔŋɔ edi, ye ofut ye eto nte ŋkpɔ eke ebinede owo ŋwo?

⁵³ Ke adaŋemi ŋkodude ye mbufo ke temple ke usen ke usen, mbufo inyanakere ubɔk iyom ndinam Mi ŋkpɔ: edi emi edi ifet mbufo ye eke odudu ekim.

Peter Akaŋ Jesus

⁵⁴ Edi mmɔ emum Enye, eda eka ekoduk ke ufɔk akwa oku.

⁵⁵ Edi Peter etiene nsan-nsan. Ke adaŋemi mmɔ ema ekabara ikaŋ ke ufɔt esit okure, enyuŋ esuhɔre etie ɔtɔ kiet, Peter etetie ke ufɔt mmɔ.

⁵⁶ Ndien eyen-aŋwan kiet okut nte enye etiede ewebe ikaŋ, onyuŋ owuk enyin ese enye, ete, Owo emi okonyuŋ odu ye Enye.

⁵⁷ Edi enye akaŋ, ete, Ŋwan owo, ndiɔŋɔke Enye.

⁵⁸ Ndien ke ekpri ini ebede, owo eŋwen okut enye, onyuŋ ɔdɔhɔ ete, afo nde edi owo mmɔ kiet. Edi Peter ɔdɔhɔ ete, Owo, ndige.

⁵⁹ Ekem ke adaŋa nte hour kiet ama ekebe, owo eŋwen ɔsɔŋɔ uyo ɔdɔhɔ ete, Ke akpanikɔ owo emi okonyuŋ odu ye Enye: koro enye edide eyen Galilee.

⁶⁰ Edi Peter ɔdɔhɔ ete, Owo, mfiɔkke se afo ɔdɔhɔde. Ndien idaha oro, kpasuk ke adaŋemi enye osuk etiŋde ntem, ekikɔ ɔkpɔk.

⁶¹ Ndien Ɔbɔŋ ɔwɔŋɔre ese Peter, Peter onyuŋ eti ikɔ Ɔbɔŋ, adaŋa nte Enye ɔkɔdɔhɔde ete, afo eyekaŋ Mi utim ikata mfin, ndien ekikɔ edikpɔk.

⁶² Ndien enye adaha ɔwɔrɔ akatua eyet eti-eti.

Mme Mmɔ Emi Ekpemede Jesus Esak Enye Nsahi, Enyuŋ Emia Enye

⁶³ Ekem mmɔ emi ekpemede Jesus esak Enye nsahi, enyuŋ emia Enye.

⁶⁴ Mmɔ eda ŋkpɔ ebɔp Enye enyin, enyuŋ ebup Enye ete, Siak enyiŋ owo eke oyibide Fi.

⁶⁵ Mmɔ enyuŋ etiŋ ediwak ikɔ esuene efen edian Enye.

⁶⁶ Ndien ke ini eyo esierede, mbiowo obio esop idem ɔtɔ kiet ye ikpɔ oku ye mme scribe; mmɔ enyuŋ eda Enye eduk ke akwa esop mmɔ, ete,

⁶⁷ Edieke Afo edide Christ, sian nnyin. Edi Enye ɔdɔhɔ mmɔ ete, Ŋkpetetiŋ nnɔ mbufo, mbufo idinimke ke akpanikɔ;

⁶⁸ onyuŋ edieke mbupde mbufo mbume, mbufo idibɔrɔke.

⁶⁹ Edi ɔtɔŋɔde ke ŋkpɔ emi ama ebe, Eyen Owo eyetie ke ubɔk nnasia odudu Abasi.

⁷⁰ Ndien mmɔ kpukpru ete, Nte Afo edi Enye Abasi naŋa? Enye ete mmɔ, mbufo emetim etiŋ ete ndi Enye.

⁷¹ Mmɔ ete, Nnyin iyom nso ye ntiense efen? nnyin ke idem nnyin imokop ikɔ ke inua Esie.