LUKE 20 - Edisana ñwed Abasi Ibom

Mme Ikpɔ Oku Ye Mme Scribe Ye Mbiowo Ebup Ebaŋa Odudu Jesus

¹ EDIKEM ke mme usen oro kiet, nte Enye ekpepde mbio-obio ŋkpɔ ke temple, onyuŋ ɔkwɔrɔde gospel, ikpɔ oku ye mme scribe ye mbiowo etiene Enye;

² enyuŋ edɔhɔ Enye ete, Sian nnyin; ada odudu ewe anam mme ŋkpɔ emi? mme, anie ɔnɔ Fi odudu emi?

³ Edi Enye ɔbɔrɔ mmɔ ete, Ami nde nyebup mbufo mbume; ebɔrɔ Mi:

⁴ baptism John, mme oto heaven, mme oto owo?

⁵ Edi mmɔ eneni ke otu idem mmɔ ete, Nnyin ima idɔhɔ ite, Oto heaven, Enye eyedɔhɔ ete, Nsinam mbufo mikonimke enye ke akpanikɔ ndien?

⁶ Edi ima idɔhɔ ite, Oto owo, kpukpru mbio-obio eyetɔŋɔ nnyin ke itiat: koro mmɔ eburede efiɔk ete John ekedi prophet.

⁷ Ntre ke mmɔ ebɔrɔ ete mme imɔ ifiɔkke ɔtɔ nte baptism John otode.

⁸ Ndien Jesus ɔdɔhɔ mmɔ ete, Ami nde nsianke mbufo odudu eke ndade nnam mme ŋkpɔ emi.

Mme Ekpeme-Iŋwaŋ Vine

⁹ Edi Enye ɔtɔŋɔ nditop ŋke emi nnɔ mbio-obio ete, Owo kiet ɔkɔtɔ iŋwaŋ-vine, onyuŋ ayak enye ɔnɔ mme ekpeme-iŋwaŋ, onyuŋ adaha aka idut efen ekebigi do.

¹⁰ Ndien ke edikem ini enye ɔdɔŋ isuŋutom ke ɔtɔ mme ekpeme-iŋwaŋ, man mmɔ enɔ enye udeme mfri iŋwaŋ-vine esie: edi mme ekpeme-iŋwaŋ emia enye, enyuŋ ebin enye ɔnyɔŋ ubɔk-ubɔk.

¹¹ Ndien enyene-iŋwaŋ-vine osio isuŋutom efen ɔdɔŋ; mmɔ emia enye ŋko, enyuŋ enam enye ido esuene, enyuŋ ebin enye ɔnyɔŋ ubɔk-ubɔk.

¹² Enye onyuŋ osio ɔyɔhɔ isuŋ-utom ita ɔdɔŋ: ndien mmɔ enɔ enye unan, esio enye ke iŋwaŋ eduɔk.

¹³ Enyene iŋwaŋ-vine ɔdɔhɔ ete, Ndinam didie? nyedɔŋ edima eyen mi; iso ɔfɔn mmɔ eyeteŋe enye.

¹⁴ Edi ke ini mme ekpeme-iŋwaŋ ekutde enye, mmɔ eneni ye kiet eken ete, Sese, emi edi andidia-ufɔk; ekam eyak iwot enye, man ŋkpɔ-akpa ekpenyene nnyin. Ndien mmɔ ebin enye esio ke iŋwaŋ-vine, ewot.

¹⁵ Nso ndien ke ete iŋwaŋ-vine edinam ye mmɔ?

¹⁶ Enye eyedi edisobo mme ekpeme-iŋwaŋ emi, onyuŋ ayak iŋwaŋ-vine ɔnɔ mmɔ eŋwen. Ke ini mmɔ ekopde, mmɔ ete, Idiɔk-ŋkpɔ aka nsan-nsan.

¹⁷ Edi Enye owuk enyin ese mmɔ, onyuŋ ɔdɔhɔ mmɔ ete, Ikɔ emi ewetde ɔwɔrɔ ndien didie ete, itiat emi mme ɔbɔp-ufɔk esinde Amakabare edi etubom inuk?

¹⁸ Kpukpru owo eke ediduɔde ke itiat oro eyenuaha mbak-mbak; edi owo ekededi eke itiat emi ediduɔde ɔtɔ, eyekɔk enye nte obu.

¹⁹ Ndien mme scribe ye ikpɔ oku eyom ndimum Enye ke ini oro; edi mmɔ efehe mbio-obio: koro mmɔ efiɔkde ete Enye okotop ŋke emi otuk mme imɔ.

²⁰ Ekem mmɔ etiŋ enyin ekpeme Enye, enyuŋ edɔŋ mbon-uyep, emi ewutde idem ete idi ndinen owo, man mmɔ emum Enye ikɔ inua, man oto do eyak Enye esin ke ubɔk andikara ndikpe ikpe ye Enye.

²¹ Mmɔ oro enyuŋ ebup Enye ete, Andikpep, nnyin imɔfiɔk ite Afo etiŋ onyuŋ ekpep owo ŋkpɔ ke ido eke enende, unyuŋ uteŋeke owo enyin, edi eteme owo usuŋ Abasi ke akpanikɔ;

²² me enen ndinɔ Caesar utomo, mme inenke?

²³ Edi Enye okut ŋkari mmɔ, onyuŋ ɔdɔhɔ mmɔ ete,

²⁴ Ewut Mi okuk kiet. Mbiet ye ŋwed emi enyene anie? Mmɔ ete, Enyene Caesar.

²⁵ Edi Enye ɔdɔhɔ mmɔ ete, Enɔ Caesar ndien se inyenede Caesar, enyuŋ enɔ Abasi se inyenede Abasi.

²⁶ Ndien mmɔ ikemeke ndimum Enye uyo ke iso mbio-obio: idem akpa mmɔ ke ibɔrɔ Esie, mmɔ enyuŋ edop uyo.

²⁷ Edi ndusuk mme Sadducee enyuŋ etiene Enye, kpa mmɔ emi ekaŋde ete eriset ke mkpa iduhe;

²⁸ ndien mmɔ ebup Enye ete, Andikpep, Moses ekewet ɔnɔ nnyin ete, Edieke eyen-ete owo ɔdɔde ŋwan onyuŋ akpade, ndien minyeneke eyen, owo oro eyeda ŋwan eyenete ɔdɔ, onyuŋ asiak ubon ɔnɔ eyen-ete esie.

²⁹ Nditɔ-ete itiaba ekedu; akpa ɔdɔ ŋwaŋ, ndien akpa, ibonke eyen;

³⁰ udiana ye ɔyɔhɔ ita enyuŋ eda ŋwan oro edɔ;

³¹ kpasuk ntre ke mmɔ mbitiaba eda enye edɔ, enyuŋ ekpaŋa ikpɔŋke eyen.

³² Ke akpatre ŋwan oro nde akpa.

³³ Mmɔdo ke ini eriset enye eyedi ŋwan anie ke otu mmɔ? koro mmɔ mbitiaba ekadade enye nte ŋwan.

³⁴ Ndien Jesus ɔdɔhɔ mmɔ ete, Nditɔ eyo emi edɔ ndɔ, enyuŋ eda mmɔ enɔ ke ndɔ:

³⁵ edi ama edi mmɔ emi edibatde ete mmɔ edot ndinyene eyo oko ye eriset ke mkpa, mmɔ idɔhɔ ndɔ, inyuŋ idaha mmɔ inɔ ke ndɔ: koro mmɔ mikemeke ndikpa aba;

³⁶ koro mmɔ edi ukem-ukem ye mme angel; enyuŋ edi nditɔ Abasi, sia mmɔ edide nditɔ eriset.

³⁷ Edi kpa Moses etiŋ ke ibuot ŋwed emi otukde eto oro abaŋa ete enanam mme akpa-mkpa eset, Abasi Abraham, ye Abasi Isaac, ye Abasi Jacob.

³⁸ Enye idige Abasi mme akpa-mkpa, edi edi eke mme odu-uwem: koro kpukpru owo edu uwem enɔ Enye.

³⁹ Ndien ndusuk mme scribe ebɔrɔ ete, Andikpep, Afo omotim ɔdɔhɔ.

⁴⁰ Koro mmɔ midehede ibup Enye aba mbume kiet efen.

⁴¹ Edi Enye ɔdɔhɔ mmɔ ete, Nsidi ntak eke edɔhɔde ete Christ edi eyen David?

⁴² Koro David ke idem esie ɔdɔhɔ ke ŋwed mme Psalm, ete, Jehovah ɔdɔhɔ Ɔbɔŋ mi ete, Tie Mi ke ubɔk nnasia,

⁴³ Tutu nda mme asua Fo nnim Fi ke udorukot.

⁴⁴ Ntem ke David okot Enye ete, Ɔbɔŋ, didie ndien ke Enye edi eyen esie?

⁴⁵ Ndien Enye ɔdɔhɔ mbet Esie ke utɔŋ kpukpru owo ete,

⁴⁶ Ekpeme idem mbufo ye mme scribe, emi emade ndisaŋa ye nduɔ-nduɔ ɔfɔŋidem, enyuŋ emade ekɔm ke aŋwa-urua, ye ikpɔ itie ke mme synagogue, ye itie ukpono ke udia;

⁴⁷ mmɔ emi ediade ufɔk mme ebe-akpa, enyuŋ ebɔŋde nyan akam ke mbubik: mmɔ eyebɔ ubiom-ikpe emi okponde akan.