LUKE 2 - Edisana ñwed Abasi Ibom

Emana Jesus

¹ EDIKEM ke mme usen oro, Caesar Augustus owuk ewuhɔ, ete, ewet enyiŋ kpukpru ekondo esin ke ŋwed.

² Emi edi akpa eriwet enyiŋ owo nsin ke ŋwed, ke ini Quirinius edide andikara Syria.

³ Ndien kpukpru owo eka ke obio mmɔ kiet kiet ndisin enyiŋ ke ŋwed.

⁴ Joseph ŋko oto ke obio Nazareth, ke Galilee, ɔdɔk aka ke Judaea, ke obio David emi ekerede Bethlehem, koro enye edide owo ufɔk ye oruk David, ndisin enyiŋ esie ke ŋwed;

⁵ Mary emi ekadade enɔ enye ke ndɔ, emi ekperede ndiman eyen, onyuŋ asaŋa ye enye.

⁶ Edikem, ke adaŋemi mmɔ edude do, ekem usen eke enye edimande eyen.

⁷ Ndien enye aman akpan esie; onyuŋ ada ɔfɔŋ awaŋ Enye ke idem, onyuŋ onim Enye ke usin-udia ufene; koro itie miduhe inɔ mmɔ ke ufɔk-isen-owo.

⁸ Ndien mme ekpemerɔŋ edu ke edem oro, emi etiede ke iŋwaŋ ekpeme erɔŋ mmɔ ke okoneyo.

⁹ Ndien angel Jehovah edi edikpere mmɔ, ubɔŋ Jehovah onyuŋ ayama akan mmɔ okuk: ndien ndik anam mmɔ eti-eti.

¹⁰ Angel onyuŋ ɔdɔhɔ mmɔ ete, Ekufehe ndik; koro sese, mmada eti mbuk akwa idaresit, eke edinyenede kpukpru owo, nsɔk mbufo;

¹¹ koro Andinyaŋa, emi edide Christ Ɔbɔŋ, amana ɔnɔ mbufo mfin ke obio David.

¹² Emi onyuŋ edi idiɔŋɔ eke enɔde mbufo; mbufo eyekut nsek-eyen emi ewaŋde ke ɔfɔŋ nte anade ke ebiet usin-udia ufene.

¹³ Ndien idaha oro udim mbon heaven edu ye angel oro; mmɔ enyuŋ etoro Abasi, ete,

¹⁴ Uboŋ enyene Abasi ke ata enyɔŋ. Emem onyuŋ odu ke isɔŋ ke otu owo emi Enye enende iso ye mmɔ.

¹⁵ Edikem ke ini mme angel ema ekadaŋa ekpɔŋ mmɔ enyɔŋ ke heaven, mme ekpemerɔŋ edɔhɔ kiet eken ete, Eyak nnyin ika ke Bethlehem ikese ŋkpɔ emi okotibede, emi Jehovah asiande nnyin.

¹⁶ Mmɔ enyuŋ ewara eka, enyuŋ ekut Mary ye Joseph, ye nsek-eyen nte anade ke usin-udia ufene.

¹⁷ Edi ke ini mmɔ ekutde ŋkpɔ emi, mmɔ ebuk se eketiŋde enɔ mmɔ ebaŋa eyen emi.

¹⁸ Ndien kpukpru mmɔ emi ekopde edu ke mkpa-idem kabaŋa ŋkpɔ eke mme ekpemerɔŋ etiŋde enɔ mmɔ.

¹⁹ Edi Mary omum kpukpru ŋkpɔ emi akama, onyuŋ ekere mmɔ ke esit esie.

²⁰ Ndien mme ekpemerɔŋ efiak enyɔŋɔ, ekpono enyuŋ etoro Abasi kabaŋa kpukpru ŋkpɔ oro mmɔ ekokopde enyuŋ ekutde, kpa nte eketiŋde enɔ mmɔ.

²¹ Ke ini ekemde usen itiaita emi enyenede ndinim Eyen mbobi, mmɔ esio Enye enyiŋ Jesus, kpa enyiŋ oro angel okosiode Enye ke mika-iyomoke Enye kaŋa.

²² Ke adaŋemi mme usen erinam mmɔ esana ekemde, nte ibet Moses etemede, mmɔ eda Eyen edi ke Jerusalem, ndiyak nnɔ Jehovah (nte ewetde ke ibet Jehovah ete,

²³ Kpukpru eyeneren emi esirerede itie-uman edikere se edianarede enɔ Jehovah),

²⁴ ndinyuŋ ŋwa uwa, nte ibet Jehovah etemede, mbomo ŋkuku iba, me nditɔ ibiom iba.

²⁵ Ndien sese, owo kiet odu ke Jerusalem emi ekerede Simeon; owo emi edi edinen owo emi eteŋede Abasi, onyuŋ etiede ebet ndɔŋesit Israel: ndien Edisana Spirit odoro enye ke idem.

²⁶ Edisana Spirit ama onyuŋ ayarare ɔnɔ enye ete enye idikpaha tutu enye okut Christ emi Jehovah ɔdɔŋde.

²⁷ Ndien enye asaŋa ke Spirit oduk ke temple: ekem ke adaŋemi ete ye eka edade Eyen, kpa Jesus, eduk, man enam ye Enye nte ido ibet edide,

²⁸ Simeon emen Enye akama ke ubɔk, onyuŋ otoro Abasi, ete,

²⁹ Ke emi, O; Obɔŋ, Afo ke ayak owo Fo ɔnyɔŋ ke ifure, Nte Afo ɔkɔdɔhɔde;

³⁰ Koro enyin mi emekut erinyaŋa Fo,

³¹ Eke afo okonimde ke iso kpukpru mme idut;

³² Ete, edi uŋwana eke ediyararede ŋkpɔ ɔnɔ mme Gentile, onyuŋ edi ubɔŋ ikɔt Fo Israel.

³³ Ndien idem akpa ete ye eka Jesus ke mme ŋkpɔ oro etiŋde ebaŋa Enye.

³⁴ Simeon onyuŋ ɔdiɔŋ mmɔ, onyuŋ ɔdɔhɔ Mary eka Esie ete, Sese, ema enim Eyen emi, man ediwak owo ke Israel eduɔŋɔ enyuŋ edaha eda; man Enye onyuŋ edi

³⁵ Idiɔŋɔ eke etiŋde ikɔ edian (ofut eyenyuŋ okim fi ukpɔŋ ŋko) man ekikere ediwak esit ekpeyarare.

³⁶ Prophet-aŋwan kiet onyuŋ odu, emi ekerede Anna, eyen Phanuel, emi otode ke esien Asher (enye edi ata ebiowo, emi okudude ye ebe isua itiaba tɔŋɔ enye ɔkɔdɔ ndɔ, enye ama onyuŋ edi ebe-akpa ke isua anaŋ ye inaŋ);

³⁷ enye ikpɔŋke temple, edi atuak ibuot ɔnɔ Abasi ke eritre udia ye mkpe-ubɔk okoneyo ye uwemeyo.

³⁸ Enye onyuŋ oduk edi kpa idaha oro, ɔkɔm Abasi, onyuŋ etiŋ abaŋa Eyen oro ɔnɔ kpukpru owo emi etiede ebet erifak Jerusalem.

Mary Ye Joseph Efiak Enyɔŋ Nazareth

³⁹ Ekem ke mmɔ ema ekanam kpukpru ŋkpɔ eke esaŋade ye ibet Jehovah ema, mmɔ efiak enyɔŋɔ ke Galilee, ke Nazareth obio mmɔ.

⁴⁰ Ndien Eyen oro ɔkɔri, onyuŋ okop idem, onyuŋ ɔyɔhɔ ye ɔniɔŋ: Abasi onyuŋ enen iso ye Enye.

Jesus Aka Itie Ntuakibuot Ke Jerusalem

⁴¹ Ndien ete ye eka Esie ekam ekaka Jerusalem kpukpru isua ke ini usɔrɔ passover.

⁴² Ekem ke ini Jesus osimde isua duopeba, mmɔ edɔk eka, nte ido usɔrɔ edide.

⁴³ Ndien ke ini mme usen usɔrɔ ekurede, nte mmɔ efiakde enyɔŋ, Jesus, Eyen mmɔ, ɔsuhɔ ke edem ke Jerusalem; edi ete ye eka Esie ifiɔkke.

⁴⁴ Mmɔ ese ete Enye odu ke otu mbon-isaŋ; ntre ke mmɔ esaŋa isaŋ usen kiet; ndien mmɔ eyom Enye ke otu iman mmɔ ye mme ɔdiɔŋɔ mmɔ.

⁴⁵ Edi ke ini mmɔ mikwe Enye, mmɔ efiak edi ke Jerusalem ndiyom Enye.

⁴⁶ Edikem ke usen ita ema ekebe, mmɔ ekut Enye ke temple, nte etiede ke ufɔt mme andikpep, akpaŋ utɔŋ okop se mmɔ etiŋde, onyuŋ obup mmɔ mbume:

⁴⁷ edi idem akpa kpukpru mmɔ emi ekopde ikɔ Esie, abaŋa ɔniɔŋ ye mme ibɔrɔ Esie.

⁴⁸ Ndien ke ini ete ye eka ekutde Enye, idem akpa mmɔ eti-eti: eka Esie onyuŋ ɔdɔhɔ Enye ete, Eyen mi, nsinam anamde ntem ye nnyin? Sese, usɔ ye ami imasaŋa iyom Fi ye mfuhɔ.

⁴⁹ Ndien Enye ete mmɔ,Nsidi ntak eke mbufo eyomde Mi? nte ifiɔkke ite, nnyene ndidu ke ufɔk Ete Mi?

⁵⁰ Edi mmɔ ifiɔkke se ikɔ oro Enye etiŋde ɔnɔ mmɔ ɔwɔrɔde.

⁵¹ Ekem Enye asaŋa ye mmɔ ɔsuhɔre edi ke Nasareth, onyuŋ osuk ibuot ɔnɔ mmɔ; edi eka Esie omum kpukpru mme ikɔ oro akama ke esit esie.

⁵² Ndien Jesus ɔkɔri ke eti ibuot ye idaha, onyuŋ ɔdɔdiɔŋ edi eyen mfɔn-iso ke iso Abasi ye ke iso owo.