LUKE 19 - Edisana ñwed Abasi Ibom

Jesus Ye Zacchaeus

¹ EKEM Enye oduk ke Jericho asaŋa ebe.

² Ndien sese, owo kiet emi ekerede Zacchaeus odu do; enye edi etubom mme publican, onyuŋ edi owo inyene.

³ Owo oro oyom usuŋ ndikut Jesus, ndifiɔk oruk owo eke Enye edide, edi ikemeke ɔnɔ otu owo, koro enye ɔmuhɔde idaha.

⁴ Ntre ke enye ebem iso efehe ɔkɔdɔk eto sycamore, ete ikut Enye: koro Jesus ekenyene ndisaŋa ke usuŋ oro mbe.

⁵ Ndien ke ini Jesus osimbe ebiet oro, emenere enyin ɔdɔhɔ enye ete, Zacchaeus, wawara suhɔre di; koro mmenyene ndidaŋ ke ufɔk fo mfin.

⁶ Zacchaeus ɔsuhɔre iwiwa, onyuŋ ada Enye ɔnyɔŋ ufɔk ke idaresit.

⁷ Edi ke ini mmɔ ekutde, kpukpru mmɔ esuk uyo ete, Enye aka akadaŋ ye owo emi edide idiɔk owo.

⁸ Edi Zacchaeus adaha ada, onyuŋ ɔdɔhɔ Ɔbɔŋ ete, Ɔbɔŋ, ke nɔnɔ mme ubuene ubak inyene mi; onyuŋ edieke ŋkɔbɔde owo ŋkpɔ ke ŋkanubɔk, nsosio usiene utim ikanaŋ.

⁹ Edi Jesus ɔdɔhɔ enye ete, Erinyaŋa ama oduk ke ufɔk emi mfin emi, koro enye ŋko edide eyen Abraham.

¹⁰ Koro Eyen Owo ekedi ndiyom ndinyuŋ nnyaŋa se isopde.

¹¹ Edi nte mmɔ ekopde mme ŋkpɔ emi, Enye adian ikɔ do otop ŋke, koro Enye ekperede Jerusalem, mmɔ enyuŋ ekere ete Messiah ɔmɔŋ ada ubɔŋ idaha oro.

¹² Ntre ke Enye ɔdɔhɔ ete, Ɔbɔŋ kiet akaka anyan idut, ndibɔ ubɔŋ nda mfiak nnyɔŋ.

¹³ Ntem ke enye okot owo duop ke otu ikɔt esie, onyuŋ ɔnɔ mmɔ okuk duop, onyuŋ ɔdɔhɔ mmɔ ete, Eda emi enyam urua tutu ndi.

¹⁴ Edi mbio-obio esie esua enye, enyuŋ edɔŋ mme isuŋutom etiene enye ke edem, ete, Nnyin iyomke owo emi akara nnyin.

¹⁵ Edikem ke enye ama ɔkɔbɔ ubɔŋ oro ada, enye afiak edi, ɔnɔ uyo ete, ekot ikɔt imɔ oro imɔ ikayakde okuk inɔ mmɔ, man ɔfiɔk udori eke mmɔ ekekutde ke mbubine.

¹⁶ Akpa owo edi edidɔhɔ enye ete, Ɔbɔŋ okuk duop odoro ke iso-okuk fo.

¹⁷ Ndien ɔbɔŋ esie ɔdɔhɔ enye ete, Omotim anam, afo eti owo: sia afo akanamde akpanikɔ ke ekpri ŋkpɔ, di andikara obio duop.

¹⁸ Udiana edi edidɔhɔ ete, Ɔbɔŋ, okuk ition odoro ke iso-okuk fo.

¹⁹ Ndien ɔbɔŋ esie ɔdɔhɔ enye ŋko ete, Afo nde di andikara obio ition.

²⁰ Owo eŋwen edi edidɔhɔ ete, Ɔbɔŋ, sese, okuk fo mi, emi ŋkɔbɔpde ke ɔfɔŋ nnim:

²¹ koro mfefehe fi, koro afo edide owo nsɔŋ-ido: afo atataŋ se mukonimke, onyuŋ ɔdɔdɔk se mukɔtɔhɔ.

²² Ɔbɔŋ ɔdɔhɔ owo oro ete, Nyeda ikɔ-inua fo ŋkpe ikpe nnɔ fi, afo idiɔk owo. Ama ɔfiɔk ete ndi owo nsɔŋ-ido, emi ntaŋde se mmeŋkonimke, nnyuŋ ndɔkde se mme ŋkɔtɔhɔ;

²³ nsidi ndien ntak eke afo mukemenke okuk mi usin ke ubɔk mme akama-okuk, man ŋkpɔbɔ iso-okuk ye udori ke mma nnyɔŋ ndi?

²⁴ Enye onyuŋ ɔdɔhɔ mmɔ emi edade ekperede ete, Ebɔ enye okuk oro, emen enɔ enye emi enyenede okuk duop.

²⁵ Ndien mmɔ ete enye, Ɔbɔŋ, edi enye emi enyene okuk duop.

²⁶ Ndɔhɔ mbufo nte, eyenɔ kpukpru owo eke enyenede; edi eyebɔ enye eke minyeneke kpa se enye enyenede.

²⁷ Edi ama edi mme asua mi emi mikoyomke ami ŋkara mmɔ, eda mmɔ edi mi, enyuŋ ewot mmɔ ke iso mi.

²⁸ Ndien ke Enye ama eketiŋ mme ikɔ emi ama, Enye ebem mmɔ iso ɔdɔk aka Jerusalem.

²⁹ Edikem, ke ini Enye ekperede Bethphage ye Bethany, ke obot emi ekerede Obot Olive, Enye osio mbet Esie iba ɔdɔŋ, ete,

³⁰ Eka ekeduk ke obio-iŋwaŋ emi asakde iso ese mbufo: ndien ke ini edukde, mbufo eyekut eyen ass emi eyiride, emi akanam baba owo kiet midoroke enye ke edem kaŋa: etat enye, eda edi.

³¹ Ndien owo ekededi ama obup mbufo ete, nsinam etatde enye, ntem ke mbufo edidɔhɔ ete, Ɔbɔŋ ke oyom enye.

³² Ndien mme isuŋutom oro eka, enyuŋ ekut kpa nte Jesus ɔkɔdɔhɔde mmɔ.

³³ Edi nte mmɔ etatde eyen ass, mme andinyene enye edɔhɔ mmɔ ete, Nsinam mbufo etatde eyen ass?

³⁴ Ndien mmɔ edɔhɔ ete, Ɔbɔŋ ke oyom enye.

³⁵ Ntre ke mmɔ eda enye esɔk Jesus; mmɔ enyuŋ eda ɔfɔŋidem mmɔ eduɔk eyen ass ke edem, enyuŋ emen Jesus edori.

³⁶ Ndien nte Enye odorode aka iso, mmɔ ebri ɔfɔŋidem mmɔ ke ɔkpɔusuŋ.

³⁷ Ekem ke adaŋemi Enye ekperede onyuŋ osimde ntɔ-nsuhɔre Obot Olive, ofuri otu mbet etɔŋɔ ndidara nnyuŋ ntoro Abasi ke ɔkpɔsɔŋ uyo, kabaŋa kpukpru utom odudu eke mmɔ ekekutde, ete,

³⁸ Itoro enyene Edidem emi edide ke enyiŋ Jehovah: Emem odu ke heaven, ubɔŋ odu ke ata enyɔŋ.

³⁹ Ndien ndusuk mme Pharisee, emi esaŋade ye otu owo, edɔhɔ Enye ete, Andikpep, kpan mbet Fo ete ekutiŋ ntre.

⁴⁰ Edi Enye ɔbɔrɔ mmɔ ete, Ndɔhɔ mbufo nte, Edieke mme mmɔ emi ekpedopde uyo, mme itiat ekposio mkpo.

Jesus Atua Ɔnɔ Jerusalem

⁴¹ Ke ini Enye asaŋade ekpere, Enye okut obio, onyuŋ atua eyet abaŋa enye, ete,

⁴² Afo ke idem fo akpakam ɔfiɔk ke usen emi mme ŋkpɔ eke ekpanamde fi odu ke emem! Edi ke emi mmɔ emedibe fi ke enyin.

⁴³ Koro mme usen eyesim fi eke mme asua fo edibotde ibombom ekanare fi, ekan fi ekuk, enyuŋ ebaha fi ke kpukpru ŋkaŋ;

⁴⁴ eyenyuŋ esuhɔre fi enim ke isɔŋ, ye nditɔ fo emi eduŋde fi ke esit; ndien idikpɔŋke itiat kiet ke enyɔŋ itiat eken ke esit fo; koro afo mukɔdiɔŋɔke ini eke Abasi edide edise fi.

Jesus Aka Itie Ntuakibuot

⁴⁵ Ndien Enye oduk ke temple, onyuŋ ɔtɔŋɔ ndibin mmɔ eke enyamde ŋkpɔ mfep, onyuŋ ɔdɔhɔ mmɔ ete,

⁴⁶ Ewet ete, Ufɔk Mi edidi ufɔk akam, edi mbufo emanam enye akabare edi itie mbon ŋwo.

⁴⁷ Ndien Enye ekekpep mmɔ ŋkpɔ ke usen ke usen ke temple. Edi ikpɔ oku ye mme scribe ye mme etubom-mbio-obio eyom usuŋ nte ekpowotde Enye;

⁴⁸ edi mmɔ ikwe nte ekpanamde; koro kpukpru owo eyirede Enye, ndikop ikɔ Esie.