LUKE 16 - Edisana ñwed Abasi Ibom

Ukwaŋ Akama-Ukpɔhɔre

¹ ENYE ɔdɔhɔ mbet Esie ŋko ete, Owo inyene kiet okodu emi enyenede akama-ukpɔhɔre; ndien etiŋ enɔ enye ete, akama-ukpɔhɔre oro ke asuan inyene esie.

² Ntre ke enye okot owo oro onyuŋ ɔdɔhɔ enye ete, Nso idi emi ke ŋkop mbaŋa fi? nɔ mi ibat ŋkpɔ eke afo akamade, koro mudukaha iso aba ndikama ukpɔhɔre.

³ Ekem akama-ukpɔhɔre ɔdɔhɔ ke esit esie ete, Ndinam didie, koro ete ɔbɔde mi itie-akama-ukpɔhɔre? nnyeneke idem ndifuŋ isɔŋ; ndibeŋe ebeŋe edi mi ŋkpɔ but.

⁴ Mmɔfiɔk se ndinamde, man ke adaŋemi edibɔde mi ukpɔhɔre, owo ekpeda mi esin ke ufɔk mmɔ.

⁵ Ntre enye okot kpukpru mme akama-isɔn ete esie, onyuŋ ɔdɔhɔ akpa owo ete, Akama ete mi ifaŋ?

⁶ Enye oro ete, Abaŋ aran ikie. Akama-ukpɔhɔre ɔdɔhɔ enye ete, Bɔ ŋwed isɔŋ fo, tetie ini kiet, wet aba ye duop.

⁷ Enye onyuŋ ɔdɔhɔ owo eŋwen ete, Afo akama ifaŋ? Enye ɔdɔhɔ ete, Ekebe ibokpot ikie. Enye ɔdɔhɔ owo oro ete, Bɔ ŋwed isɔŋ fo, wet anaŋ.

⁸ Ndien ɔbɔŋ oro otoro ukwaŋ akama-ukpɔhɔre, koro enye anamde ɔniɔŋ-ɔniɔŋ: koro mbon eyo emi edi ɔniɔŋ ke mbubehe mmɔ ye mbio emana mmɔ, ekan nte nditɔ uŋwana edide.

⁹ Mmonyuŋ ndɔhɔ mbufo nte, eda mammon ukwaŋido ekɔ mme ufan enim enɔ idem mbufo; man kini oro ebede efep, mmɔ oro ekpada mbufo eduk ke nsinsi iduŋ.

¹⁰ Owo eke anamde akpanikɔ ke ata ekpri ŋkpɔ onyuŋ anam akpanikɔ ke akamba ŋkpɔ; owo eke akwaŋade ke ata ekpri ŋkpɔ onyuŋ akwaŋa ke akamba ŋkpɔ.

¹¹ Ntem edieke mbufo midaha ukwaŋ mammon inam akpanikɔ, anie edisin mbufo ata inyene ke ubɔk?

¹² Onyuŋ edieke mbufo minamke akpanikɔ ye se idide eke owo eŋwen, anie edinɔ mbufo se idide eke idem mbufo?

¹³ Baba eyen -ufɔk kiet ikemeke ndisaŋa utom mme ete iba: koro enye eyesua kiet, ama eken; midige ntre, enye eyesɔŋɔ ada ye kiet, esin enye eken ke ndek. Mbufo ikemeke ndisaŋa utom Abasi ye eke mammon.

¹⁴ Mme Pharisee emi edide mme ama-inyene ekop kpukpru ikɔ emi, enyuŋ esak Enye nsahi.

¹⁵ Ndien Enye ɔdɔhɔ mmɔ ete, Mbufo edi mmɔ emi enamde owo ebat mbufo ke nti owo, edi Abasi ɔmɔfiɔk esit mbufo: koro se ikponde owo ke enyin edi mbubiam ke iso Abasi.

¹⁶ Ibet ye mme prophet ekedu tutu osim ini John: tɔŋɔ ke ini oro ekwɔrɔ eti mbuk Obio Ubɔŋ Abasi, kpukpru owo enyuŋ enam unyaŋa eduk ke esit.

¹⁷ Emem enyɔŋ ye isɔŋ ndibe mfep akan ekpri ntɔi kiet ke ibet nditre ndisu.

¹⁸ Owo ekededi eke osiode ŋwan esie ndɔ, onyuŋ ɔdɔde efen, esin efibe: owo eke ɔdɔde ŋwan emi esiode ndɔ onyuŋ esin efibe.

Owo Inyene Kiet Ye Lazarus

¹⁹ Owo inyene kiet okodu emi esinede eti ididuot ɔfɔŋ-idem ye eti ɔfɔŋ linen, onyuŋ adiade edinem udia kpukpru usen.

²⁰ Edi esimen ebeŋe-ebeŋe kiet emi ekerede Lazurus, emi inia eyɔhɔde enye ke idem, ekenim ke inua-otop esie;

²¹ enye onyuŋ oyom eda mbubek udia eke eduɔŋɔde ke okpokoro owo inyene oro ebɔk enye; edi kpa mme ebua esidedi edidei inia esie.

²² Ekem ebeŋe-ebeŋe oro akpa, ndien mme angel emen enye ekonim ke ikpanesit Abraham. Owo inyene oro onyuŋ akpa ŋko, ndien ebuk enye.

²³ Ndien ke Hades enye odu ke ndutuhɔ, onyuŋ emenere enyin esie okut Abraham anyan ebiet, ye Lazarus ke ikpanesit esie.

²⁴ Enye onyuŋ ofiori ete, Ete Abraham, tua mi mbɔm, nyuŋ dɔŋ Lazarus ekedebi iso nnuen ubɔk esie ke mmɔŋ, edibit edeme mi; koro ndude ke ndutuhɔ ke ikaŋ emi.

²⁵ Edi Abraham ɔdɔhɔ enye ete, Eyen mi, ti nte afo okokutde ufɔn fo ke ini uwem fo, ye nte Lazarus okonyuŋ okutde idiɔk: edi kemi enye ke okop idɔŋesit mi, edi afo ke odu ke ndutuhɔ.

²⁶ Akan oro, akamba ukpe odu ke ufɔt nnyin ye mbufo, man mmɔ eke eyomde ndito mi ntiene mbufo ekukeme, owo okunyuŋ ekeme ndito do ndi mi.

²⁷ Edi enye ɔdɔhɔ ete, Mmekpe fi ubɔk ndien, ete, nte ɔdɔŋ Lazarus aka naŋa ke ufɔk ete mi,

²⁸ koro mmenyene nditɔ-ete iren ition, man enye asian mmɔ se idude ke edem emi, mbak mmɔ ŋko edidi ke itie ndutuhɔ emi.

²⁹ Edi Abraham ete enye, mmɔ enyene Moses ye mme prophet; yak mmɔ ekpaŋ utɔŋ enɔ mmɔ.

³⁰ Edi enye ɔdɔhɔ ete, Baba, ete Abraham, edi owo ama oto ke otu mme akpa-mkpa aka ke ɔtɔ mmɔ, mmɔ ekpakabare esit.

³¹ Edi enye ɔdɔhɔ ete, Edieke mmɔ mikpaŋke utɔŋ inɔ Moses ye mme prophet, mmɔ idinimke ke akpanikɔ owo okpototo ke otu mme akpa-mkpa eset.