LUKE 11 - Edisana ñwed Abasi Ibom

Jesus Ekpep Ŋkpɔ Abaŋa Akam

¹ EDIKEM, nte Enye ɔbɔŋde akam ke ebiet kiet, ke ini Enye odopde, kiet ke otu mbet Esie ɔdɔhɔ Enye ete, Ɔboŋ, kpep nnyin ndibɔŋ akam, kpa nte John onyuŋ ekpepde mbet esie.

² Edi Enye ɔdɔhɔ mmɔ ete, Ke ini mbufo ebɔŋde akam, edɔhɔ ete, Ete, yak ikpono enyiŋ Fo. Yak Ubɔŋ Fo edi.

³ Nɔ nnyin udia eke ekemde nnyin ke usen ke usen. Nyuŋ dahado ke mme idiɔk-ŋkpɔ nnyin,

⁴ Koro nnyin ke idem nnyin idahadedo inɔ kpukpru owo emi ekamade nnyin isɔn. Kunyuŋ uda nnyin usin ke idomo.

⁵ Ndien Enye ɔdɔhɔ mmɔ ete, Anie ke otu mbufo edinyene ufan, edinyuŋ adaha etiene enye ke ufɔt okoneyo, onyuŋ ɔdɔhɔ enye ete,

⁶ Ufan, buɔt mi uyo ita; koro ufan mi kiet, emi asaŋade isaŋ, ama edi ke ufɔk mi, ndien nnyeneke se nnimde enye ke iso:

⁷ ndien enye emi odude ke esit ufɔk edibɔrɔ ete, Kunɔ mi afanikɔŋ: mmesesin usuŋ; ami ye nditɔ mi imoduk; ŋkemeke ndidaha nnɔ fi.

⁸ Ndɔhɔ mbufo nte, okposuk edi nte enye mididahake inɔ enye ke ntak ufan, edi koro owo eyirede, enye ke ntak ufan, enye eyedaha ke enyɔŋ ɔnɔ enye adaŋa nte enye oyomde.

⁹ Ntre ke ndɔhɔ mbufo nte, Ebeŋe, ndien eyenɔ mbufo; eyom, ndien mbufo eyekut; etuak, ndien eyesio usuŋ enɔ mbufo.

¹⁰ Koro kpukpru owo eke ebeŋede ebɔde; owo eke oyomde okutde; edinyuŋ esiode usuŋ enɔ owo eke atuakde.

¹¹ Ewe ete odu ke otu mbufo eke edinɔde eyen itiat, ke ini eyen ebeŋede enye uyo; mme edinɔde eyen urukikɔt ke ibuot iyak ke ini eyen ebeŋede enye iyak;

¹² mme edinɔde eyen ikpeyen, ke ini eyen ebeŋede enye nsen-unen?

¹³ Mmɔdo edieke mbufo emi ediɔkde efiɔkde ndinɔ nditɔ mbufo nti enɔ, adaŋa didie akan oro ke Ete mbufo ke heaven ediyak Edisana Spirit ɔnɔ mmɔ eke ebeŋede Enye?

¹⁴ Ndien Enye ebin demon emi edide imum ɔduɔk. Edikem ke ini demon ɔwɔrɔde, imum etiŋ ikɔ ndien idem akpa mme otu owo.

¹⁵ Edi ndusuk mmɔ edɔhɔ ete, Enye ada Belzebub, ɔbɔŋ mme demon, ebin mme demon ɔduɔk.

¹⁶ Owo efen enyuŋ edomo Enye, eyom ete Enye owut mme imɔ idiɔŋɔ emi otode ke enyɔŋ.

¹⁷ Edi ke Enye ɔdiɔŋɔde ekikere mmɔ, ɔdɔhɔ mmɔ ete, Kpukpru obio edidem eke abaharede ada aŋwana ye idem esie oduk ke ŋwure, ufɔk kiet kiet ke obio oro onyuŋ ɔduɔ.

¹⁸ Edieke Satan ŋko abaharede ada aŋwana ye idem esie, obio esie edikeme didie ndisɔŋɔ nda? koro mbufo edɔhɔde ete, nda Beelzebub mbin mme demon nduɔk.

¹⁹ Edi edieke Ami ndade Beelzebub mbin mme demon nduɔk, nditɔ mbufo eda anie ebin mmɔ eduɔk? Mmɔdo mmɔ edidi mme ebierikpe enɔ mbufo.

²⁰ Edi edieke ndade nnuen-ubɔk Abasi mbin mme demon nduɔk, Ubɔŋ Abasi ama osim mbufo.

²¹ Ke adaŋemi ɔkpɔsɔŋ owo ɔbɔbɔde ofuri mbɔbɔ-ekɔŋ ekpeme ufɔk esiemɔ, ŋkpɔ esie edu ke ifure;

²² edi ke ini owo emi okopde idem akan enye edide eŋwan ye enye onyuŋ akande enye, owo oro ɔbɔ enye kpukpru ŋkpɔ-ekɔŋ esie eke enye ɔkɔbuɔtde idem ke esit, onyuŋ edeme mbume esie.

²³ Owo eke midaha ye Ami aŋwaŋwana ye Ami; owo eke minyuŋ ibokke ye Ami asasuan.

²⁴ Ke ini edidehe spirit ɔwɔrɔde owo ke idem, enye asaŋa oyo ke edisat ebiet, oyom nduɔk-odudu; ndien ke adaŋemi enye mikwe, enye ɔdɔhɔ ete, Nyefiak nnyɔŋ ufɔk mi emi ŋkotode ke esit ŋwɔrɔ.

²⁵ Ke ini enye edide, enye okut ete, ema ekpɔri enyuŋ ebana ufɔk oro.

²⁶ Ekem enye aka akada spirit itiaba efen, emi ediɔkde ekan enye; mmɔ enyuŋ eduk ekeduŋ do: ndien ukperedem itie owo oro ɔdiɔk akan mbemiso.

²⁷ Ekem nte Enye etiŋde mme ikɔ oro, ŋwan kiet ke otu mbio-obio emenere uyo, ɔdɔhɔ Enye ete, Ɔfɔfɔn ɔnɔ idibi eke akamamde Fi, ye eba eke Afo akawapde.

²⁸ Edi Enye ete, Akam ɔfɔn akan ye mmɔ emi ekopde ikɔ Abasi, enyuŋ ekpemede ndinam.

²⁹ Edi ke adaŋemi otu owo ekebonode ewak, Enye ɔtɔŋɔ ndidɔhɔ ete, Emana emi edi idiɔk emana eke eyomde idiɔŋɔ; ndien idinɔŋɔ enye idiɔŋɔ, ke mibɔhɔke idiɔŋɔ Jonah.

³⁰ Koro kpa nte Jonah ekedide idiɔŋɔ ɔnɔ mbon Nineveh, kpa ntre ke Eyen Owo edidi idiɔŋɔ ɔnɔ emana emi.

³¹ Ɔbɔŋ-aŋwan usuk eyedaha ada ke ikpe ye mbon emana emi, onyuŋ obiom mmɔ: koro enye okotode ke mme utit ererimbot edi ndikop ɔniɔŋ Solomon, ndien sese, Enye emi okponde akan Solomon odu mi.

³² Mbon Nineveh eyedaha eda ke ikpe ye emana emi, enyuŋ ebiom enye; koro mmɔ ekakabarede esit ke erikwɔrɔ Jonah; ndien sese, Enye emi okponde akan Jonah odu mi.

Utuenikaŋ Ikpɔhidem

³³ Baba owo kiet idomoke utuen-ikaŋ, inim ke ubet-unim-ŋkpɔ mme ke idak abaŋ, edi ɔdiɔk ke uwuk-utuenikaŋ, man mmɔ emi edukde ekut uŋwana.

³⁴ Utuenikaŋ ikpɔhidem fo edi enyin fo; ke ini enyin fo eneŋerede ese, ofuri ikpɔhidem fo ayayama; edi ke ini enyin fo ɔdiɔkde ofuri ikpɔhidem fo okokim.

³⁵ Kpeme ndien mbak uŋwana eke odude fi ke idem edidi ekim.

³⁶ Edi edieke ofuri idem fo ɔyɔhɔde ye uŋwana baba ŋkim-ŋkim ubak kiet minyuŋ iduhe ke esit, enye eyeyama ofuri-ofuri, kpa nte emi utuen-ikaŋ ayamade ɔnɔ fi uŋwana.

³⁷ Ke ini Enye osuk etiŋde ikɔ oro, Pharisee kiet okot Enye ete edidia ŋkpɔ ye imɔ: ndien Enye oduk ɔsuhɔre etetie ke itie-udia.

³⁸ Edi ke ini Pharisee okutde, idem akpa enye koro Jesus mibemke iso iyet idem, ndien edidia ŋkpɔ.

³⁹ Edi Ɔbɔŋ ɔdɔhɔ enye ete, Ke emi ke mbufo mme Pharisee enanam edem cup ye usan asana; edi esit mbufo ɔyɔhɔ ye ŋwo ye udu.

⁴⁰ Mbufo mme anana-ibuot, nte idige Enye emi akanamde edem mmɔ anam esit mmɔ ŋko?

⁴¹ Ekam eda mme ŋkpɔ eke edude ke esit mmɔ enɔ mme ubuene, ndien sese, kpukpru ŋkpɔ esana enɔ mbufo.

⁴² Edi eyedɔdiɔk ɔnɔ mbufo mme Pharisee, koro mbufo esiode ubak ikɔŋ ye etidot ye kpukpru oruk ikɔŋ udia kiet ke itie duop enɔ Abasi, enyuŋ ekaŋade edinen ikpe ye ima Abasi: mbufo ekpanam ŋkpɔ emi, ikponyuŋ itreke ndinam mmɔ eken.

⁴³ Eyedɔdiɔk ɔnɔ mbufo mme Pharisee! koro mbufo emade ikpɔ itie ke synagogue, ye ekɔm ke aŋwa-urua.

⁴⁴ Eyedɔdiɔk ɔnɔ mbufo! koro mbufo ebietde udi eke edibede, eke owo emi esaŋade ke enyɔŋ mmɔ midiɔŋɔke.

⁴⁵ Edi owo kiet ke otu mme ɔfiɔk-ibet ɔbɔrɔ Enye ete, Andikpep, ke eridɔhɔ ŋkpɔ emi ntem, emesuene nnyin ŋko.

⁴⁶ Edi Enye ete, Eyedɔdiɔk ɔnɔ mbufo, mme ɔfiɔk-ibet ŋko! koro mbufo ebɔpde edidobi mbiomo ebiom owo ke idem, edi mbufo ke idemmbufo idaha nuen-ubɔk kiet ituk mbiomo oro.

⁴⁷ Eyedɔdiɔk ɔnɔ mbufo! koro mbufo ebotde mme udi mme prophet, ndien mme ete mbufo ekewot mmɔ.

⁴⁸ Ntre ke mbufo edi ntiense edian utom mme ete mbufo, enyuŋ eda ye se mmɔ ekanamde: koro mmɔ ekowot mmɔ, ndien mbufo ebot udi mmɔ.

⁴⁹ Mmɔdo Eti Ibuot Abasi ama ɔdɔhɔ ete, Nyedɔŋ mme prophet ye mme apostle etiene mmɔ;

⁵⁰ ndien mmɔ eyewot enyuŋ ekɔbɔ ndusuk mmɔ; man ekpe-kpak iyip kpukpru mme prophet eke ekeduɔkde toto ke eritɔŋɔ ererimbot, ke ubɔk emana emi;

⁵¹ ɔtɔŋɔde ke iyip Abel tutu osim iyip Zechariah, emi ekowotde ke ufɔt itie-uwa ye esit-esit Ufɔk Abasi: ke akpanikɔ ke ndɔhɔ mbufo, eyekpak iyip mmɔ ke ubɔk emana emi.

⁵² Eyedɔdiɔk ɔnɔ mbufo mme ɔfiɔk-ibet! koro mbufo ememen ukpɔhɔre ifiɔk efep: mbufo ikodukke ke idem mbufo, mbufo enyuŋ ebiɔŋɔ mmɔ eke eyomde ndiduk.

⁵³ Ndien ke ini Enye otode do ɔwɔrɔ mme scribe ye mme Pharisee etɔŋɔ ndiyire Enye, ndinyuŋ mfaha Enye ke mbume mbaŋa ediwak ŋkpɔ;

⁵⁴ mmɔ etie ekpeme, ete imum Enye uyo ke inua.