LEVITICUS 26 - Edisana ñwed Abasi Ibom

Mme Edidiɔŋ Emi Esaŋade ye Ŋkopitem

¹ MBUFO ekunam ndem enɔ idem mbufo, ekunyuŋ enim edisɔi mbiet, ye adaha enɔ idem mbufo, ekunyuŋ eda itiat eke esɔide ewuk ke isɔŋ mbufo, man enuhɔ enɔ enye: koro ami ndide Jehovah Abasi mbufo.

² Mbufo enim mme sabbath mi, enyuŋ eteŋe edisana ebiet mi: ami ndi Jehovah.

³ Edieke mbufo edisaŋade ke mme ewuhɔ mi, edinyuŋ enimde mbet mi, enyuŋ enam mmɔ:

⁴ ndien nyenɔ mbufo edim ke ekem ini, isɔŋ eyenyuŋ oduk ekese, mme eto iŋwaŋ eyenyuŋ esioŋo mfri mmɔ.

⁵ Ndien ini emi mbufo etimde ibokpot eyesim ini utet vine, utet vine eyenyuŋ osim ini usuan mkpasip: mbufo eyenyuŋ edia udia mbufo eyuhɔ, enyuŋ etie ke ifure ke isɔŋ mbufo.

⁶ Nyenyuŋ nnam isɔŋ ofure, mbufo eyenyuŋ esuhɔre ena, ndien baba ndutime ididuhe: nyenyuŋ nnam mme idiɔk unam etre ke isɔŋ; ndien ofut idisaŋake ke isɔŋ mbufo ibe.

⁷ Mbufo eyenyuŋ ebine mme asua mbufo, ndien mmɔ eyeduɔŋɔ ke ofut ke iso mbufo.

⁸ Mbufo owo ition eyebine ikie, mbufo owo ikie eyenyuŋ enam tɔsin duop efeŋe; ndien mme asua mbufo eyeduɔŋɔ ke ofut ke iso mbufo.

⁹ Ndien nyese mbufo, nnyuŋ nnam mbufo ewak, enyuŋ etɔt, nnyuŋ nnam ediomi mi ɔsɔŋ ada ye mbufo.

¹⁰ Mbufo eyenyuŋ edia ukai ebem, ndien obufa eyesin mbufo eduɔk ukai.

¹¹ Ndien ami nyenyuŋ nnim ebiet-iduŋ mi ke otu mbufo: esit mi idinyuŋ isuaha mbufo.

¹² Nyeyuŋ nsaŋa ke otu mbufo, nnyuŋ ndi Abasi mbufo, mbufo eyenyuŋ edi ikɔt mi.

¹³ Ami ndi Jehovah Abasi mbufo, ami ŋkosio mbufo ke isɔŋ Egypt mfep, man mbufo ekudi ifin mmɔ: ŋkonyuŋ mbuŋ eto ɔkpɔnɔ mbufo, nnyuŋ nnam mbufo eneŋere esaŋa.

¹⁴ Edi edieke mbufo midikopke uyo mi, midinyuŋ inamke kpukpru mbet emi;

¹⁵ ema enyuŋ esin mme ewuhɔ mi ke ndek, mme item mi ema enyuŋ efek mbufo ukpɔŋ, nte mbufo midinimke kpukpru mbet mi, edi ebiat ediomi mi:

¹⁶ ami ŋko nyenam ŋkpɔ emi ye mbufo: nnyuŋ nda nnyek-idem, ye ndiɔkidem, ye ata ufiopidem ndori mbufo, ndien mmɔ eyetibi owo enyin, enyuŋ esin uduk ke esit: ndien mbufo eyetɔ mkpasip mbufo ke ikpikpu; ndien mme asua mbufo eyedia enye.

¹⁷ Nyenyuŋ ŋkwaŋa iso mi ye mbufo, ndien mbufo eyesuana ke iso mme asua mbufo; mme mmɔ emi esuade mbufo eyekara mbufo: ndien mbufo eyefeŋe itɔk, ke baba owo kiet mibineke mbufo.

¹⁸ Ndien edieke kpukpru ŋkpɔ emi misinke mbufo ekop uyo mi, nyekɔrɔ mbufo ufen utim ikatiaba mbaŋa mme idiɔk-ŋkpɔ mbufo.

¹⁹ Nyenyuŋ mbuŋ iseri odudu fo; nnyuŋ nnam ikpa-enyɔŋ mbufo etie nte ukwak, ye isɔŋ mbufo nte okpoho.

²⁰ Ndien ŋko nyema odudu mbufo ke ikpikpu: isɔŋ mbufo idinyuŋ inɔŋɔ mbufo eduek, eto iŋwaŋ idinyuŋ iŋwumke mfri mmɔ.

²¹ Ndien mbufo ema esaŋa ye ami ke ndusuara, midinyuŋ inyimeke ndikop uyo mi; ndien nyekɔrɔ mbufo ufen utim ikatiaba, nte mme idiɔk-ŋkpɔ mbufo edide.

²² Nnyuŋ ndɔŋ mme unam ikɔt ke otu mbufo, eke edibɔde mbufo nditɔ, enyuŋ esobo ufene mbufo, enyuŋ enam mbufo ekpri; ndien ɔkpɔ-usuŋ mbufo eyedobo.

²³ Ndien edieke ŋkpɔ emi midisinke mbufo ekabare etiene mi, edi esaŋa ke ndusuara ye ami;

²⁴ ndien ami nde nyesaŋa ke ndusuara ye mbufo, nyenyuŋ ŋkɔrɔ mbufo ufen utim ikatiaba mbaŋa mme idiɔk-ŋkpɔ mbufo.

²⁵ Nyenyuŋ nda ofut eke edisiode usiene ediomi mi, ntiene mbufo: ndien adaŋemi mbufo ebonode ke obio mbufo, nyedɔŋ idiɔk udɔŋɔ utom ke otu mbufo; ndien mbufo eyesine mme asua mbufo ke ubɔk.

²⁶ Ke adaŋemi ami mbuŋde esaŋ uyo nnɔ mbufo, iban duop eyesaŋ uyo mbufo ke usaŋ-uyo kiet, enyuŋ edomo uyo enɔ mbufo: ndien mbufo eyeta, edi idiyuhɔke.

²⁷ Ndien edieke kpukpru ŋkpɔ emi misinke mbufo ekop uyo mi, edi esaŋa ke ndusuara ye ami;

²⁸ ndien ami nyesaŋa ke ifuresit ye mbufo; ami ŋko nyemia mbufo utim ikatiaba mbaŋa mme idiɔk ido mbufo.

²⁹ Ndien mbufo eyeta obukidem nditɔ-iren mbufo, enyuŋ eta obukidem nditɔ-iban mbufo.

³⁰ Nyenyuŋ nsobo mme edikoŋ ebiet mbufo, nnyuŋ nsobo mbiet-utin mbufo mfep, nnyuŋ mmen mbukpit mbufo nduɔŋɔ ke mbukpit owo eto mbufo, mbufo eyenyuŋ etek mi esit.

³¹ Nyenyuŋ ŋwuri mme obio mbufo, nnyuŋ nnam mme edisana ebiet mbufo ekabare ndon, ndinyuŋ ŋŋwuneke edinem utebe mbufo.

³² Ami nyenyuŋ nnam isɔŋ odobo; ndien oro eyesin idem akpa mme asua mbufo eke eduŋde ke esit.

³³ Nyenyuŋ nsuan mbufo ke otu mme idut, nnyuŋ ndabare ofut mbine mbufo; ndien isɔŋ mbufo eyedobo, mme obio mbufo eyenyuŋ ewure.

³⁴ Ndien isɔŋ eyedia mme sabbath esie, ke ofuri ini emi enye etiede ke ndobo, mbufo enyuŋ edude ke isɔŋ mme asua mbufo;

³⁵ enye eyenim sabbath ke ofuri ini emi enye etiede ke ndobo; koro enye mikɔduɔkke odudu ke mme sabbath mbufo, ke adaŋemi mbufo eduŋde ke esit.

³⁶ Ndien ama edi mme mmɔ emi edisuhɔde ke otu mbufo, nyesin mmɔ esit ufep ke mme idut mme asua mmɔ, ndien uyom ikɔŋ eke enyeŋede eyenam mmɔ efeŋe itɔk, ndien mmɔ eyefeŋe, nte emi efeŋede ofut; enyuŋ eduɔŋɔ ke baba owo kiet mibineke.

³⁷ Ndien mmɔ eyeduɔŋɔ kiet ke enyɔŋ eken, nte ke iso ofut, ke ini owo mibineke: mbufo idinyuŋ inyeneke ukeme nte edade ke iso mme asua mbufo.

³⁸ Mbufo eyenyuŋ etak ke otu mme idut, isɔŋ mme asua mbufo eyenyuŋ adia mbufo.

³⁹ Ndien mme mmɔ emi edisuhɔde ke otu mbufo eyeyemere ke idiɔk ido mmɔ ke isɔŋ mme asua mbufo; ndien mmɔ eyenyuŋ eyemere ke idiɔk-ŋkpɔ mme ete mmɔ ŋko.

⁴⁰ Edieke mmɔ esemede mme idiɔk ido idem mmɔ, ye mme idiɔk ido mme ete mmɔ, ye mme oburobut ido emi mmɔ ekenamde ye ami, ye nte mmɔ esaŋade ŋko ke ndusuara ye ami;

⁴¹ ye nte ami ŋko ŋkasaŋade ke ndusuara ye mmɔ, ŋkonyuŋ nda mmɔ nsin ke isɔŋ mme asua mmɔ; edieke edut esit mmɔ ɔsuhɔde ndien mmɔ enyuŋ enem esit ke ufen ukwaŋ-ŋkpɔ mmɔ:

⁴² nyeti ndien ediomi mi emi ŋkodiomide ye Jacob, nyenyuŋ nti ediomi mi emi ŋkodiomide ye isaac, ye ediomi mi emi ŋkodiomide ye Abraham; nyenyuŋ nti isɔŋ oro.

⁴³ Mmɔ eyenyuŋ ekpɔŋ isɔŋ, ndien isɔŋ eyedia mme sabbath esie, ke adaŋemi enye etiede ke ndobo, ke mmɔ miduhe: ndien ufen mme idiɔk ido mmɔ eyenem mmɔ esit; oto ke oro mmɔ ekesinde item mi ke ndek, mme ewuhɔ mi ekenyuŋ etekde mmɔ esit.

⁴⁴ Edi okposuk edidi ntre, ke ini mmɔ edidude ke isɔŋ mme asua mmɔ, ndiduɔkke mmɔ, ndinyuŋ nsuaha mmɔ, nte nsobode mmɔ fap-fap, nte nnyuŋ mbiatde ediomi emi ŋkodiomide ye mmɔ: koro ami ndide Jehovah Abasi mmɔ.

⁴⁵ Ndien nyeti ediomi mme ete mmɔ mbaŋa mmɔ, Koro ŋkosiode mmɔ ke isɔŋ Egypt ke iso mme idut, kpaŋ ŋkpedi Abasi mmɔ: Ami ndi Jehovah.

⁴⁶ Mme mmɔ emi edi mme ewuhɔ ye mme item, ye mbet, emi Jehovah okonimde ke ufɔt idem esie ye nditɔ Israel, ke obot Sinai, ke ubɔk Moses.