LEVITICUS 25 - Edisana ñwed Abasi Ibom

Ɔyɔhɔ Isua Itiaba ye Ɔyɔhɔ Isua Abayeduob

¹ NDIEN Jehovah ɔdɔhɔ Moses ke obot Sinai, ete,

² Dɔhɔ nditɔ Israel, ete mmɔ, Ke ini mbufo edidukde ke isɔŋ emi ami mmɔŋ nnɔ mbufo, yak isɔŋ oro onim ndien sabbath ɔnɔ Jehovah.

³ Tɔtɔ iŋwaŋ fo ke ofuri isua itiokiet, nyuŋ diɔŋ iŋwaŋ vine fo ke ofuri isua itiokiet, nyuŋ tet mbuŋwum esie;

⁴ edi yak isɔŋ adia sabbath nduɔk-odudu, sabbath Jehovah, ke ɔyɔhɔ isua itiaba: ke otu iŋwaŋ fo, kunyuŋ udiɔŋ iŋwaŋ vine fo.

⁵ Kukpeŋe se mkpasip eke ɔkɔbɔhɔde ɔduɔŋɔ ke ini ukpeŋe fo, oŋwumde; kunyuŋ utet etuek vine eke mudiɔŋke: yak isɔŋ enyene isua nduɔk-odudu.

⁶ Ndien sabbath isɔŋ edidi udia mbufo; ke okuo, ye ke eke ofin eren fo, ye ke eke ofin aŋwan fo, ye ke eke owo eke afo ekpede enye utom, ye ke eke esen owo eke oduŋde ye afo,

⁷ kpukpru se enye eŋwumde eyenyuŋ edi udia ufene fo, ye eke unam eke odude ke isɔŋ fo.

⁸ Ndien bat sabbath isua itiaba ke idem fo tutu, osim ke utim ikatiaba: ndien ini sabbath isua itiaba eyewɔrɔ fi isua aba ye usukkiet.

⁹ Ndien nam ukorowo Jubilee osioro uyo, ke ɔyɔhɔ usen duop ke ɔyɔhɔ ɔfiɔŋ itiaba; ke usen usio-isop ke mbufo edinam ukorowo osioro uyo ke ofuri edem mbufo.

¹⁰ Mbufo enyuŋ edianare ɔyɔhɔ isua aba ye duop enim, enyuŋ etaŋa ubɔhɔ ke isɔŋ enɔ kpukpru mme andiduŋ enye: mbufo enim enye ke jubilee; ndien kpukpru mbufo efiak ke udeme mbufo, kpukpru enyuŋ efiak ke oruk mbufo.

¹¹ Mbufo enim ɔyɔhɔ isua aba ye duop ke isua jubilee; ekutɔ, ekunyuŋ ekpeŋe se mkpasip eke ɔkɔbɔhɔde ɔduɔŋɔ ke esit oŋwumde, ekunyuŋ etet mfri vine esie eke midiɔŋke.

¹² Koro enye edide jubilee; mbufo enim enye ke edisana: mbufo edia se enye oŋwumde ke iŋwaŋ.

¹³ Kpukpru mbufo efiak ke udeme mbufo ke isua jubilee emi.

¹⁴ Ndien edieke afo anyamde ŋkpɔ ɔnɔ mbɔhiduŋ fo, mme onyuŋ edepde ŋkpɔ ye mbɔhiduŋ fo, yak kiet okufik kiet.

¹⁵ Dep ŋkpɔ ye mbɔhiduŋ fo, nte asaŋade ye ibat isua emi ebede nte jubilee ekebe; yak enye anyam ɔnɔ fi nte asaŋade ye ibat isua eke isɔŋ ediŋwumde.

¹⁶ Adaŋa nte isua ewakde ke afo edimen urua esie, ndien adaŋa nte isua ekpride ke afo edinyuŋ ɔsuhɔre urua esie; koro enye edinyamde ɔnɔ fi ke adaŋa ibat nte enye ediŋwumde.

¹⁷ Ndien mbufo kiet okufik kiet; edi bak Abasi fo: koro ami ndide Jehovah Abasi mbufo.

¹⁸ Mbufo enam ndien mme ewuhɔ mi, enyuŋ enim mbet mi, enyuŋ enam mmɔ: man mbufo eduŋ ke isɔŋ ke ifure.

¹⁹ Ndien isɔŋ eyeŋwum mfri esie, mbufo edia eyuhɔ, enyuŋ eduŋ ke esit ke ifure.

²⁰ Ndien ke ini mbufo edidɔhɔde, ete, Nnyin ididia nso ke ɔyɔhɔ isua itiaba? sese, nnyin itɔhɔ (iŋwaŋ), inyuŋ itaŋke mbuŋwum ŋkpɔ nnyin:

²¹ ndien nyewuk ufɔn mi nte etiene mbufo ke ɔyɔhɔ isua itiɔkiet, ndien enye eyeŋwum se ikemde ye isua ita.

²² Ndien ke ɔyɔhɔ isua itiaita, mbufo etɔ iŋwaŋ, enyuŋ edia akani mbuŋwum tutu ɔyɔhɔ ke isua usukkiet; mbufo eyedia akani tutu isɔŋ ediŋwum mfri esie.

²³ Ekunyam isɔŋ ke tak-tak: koro isɔŋ edide okimmɔ; koro mbufo edide isen owo ye mme oduduŋ eke eduŋde ye ami.

²⁴ Mbufo enim ndien usuŋ nte efakde isɔŋ ke ofuri isɔŋ emi mbufo enyenede.

²⁵ Edieke eyen-usɔ akabarede ubuene, onyuŋ anyamde ubak udeme esie, owo oruk esie amadi ndifak, yak enye afak se eyen-ete esie akanyamde.

²⁶ Edi ke adaŋemi owo oro mikwe owo eke afakde enye, ndien ubɔk esiemɔ ekem enye nte afakde enye;

²⁷ yak enye abat ndien isua adaŋa nte enye akanyamde isɔŋ, ndien ada se isuhɔde ayak ɔnɔ owo oro enye akanyamde ɔnɔ enye; ndien afiak ke udeme esie.

²⁸ Edi ubɔk mikemke enye nte ayakde (ekɔm-urua) ɔnɔ enye, yak se enye akanyamde ana andidep enye ke ubɔk tutu osim isua jubilee, owo oro onyuŋ afiak ke udeme esie.

²⁹ Ndien ŋko ke adaŋemi owo anyamde ufɔk iduŋ ke obio ibibene, yak ufak esie odu osim utit isua nte akanyam enye; yak ufak esie okure isua kiet.

³⁰ Edi mifakke enye tutu ofuri isua kiet ebe, ndien ufɔk eke odude ke obio ibibene ada ɔnɔ andidep enye, ke ofuri emana esie; idiwɔrɔke ke jubilee.

³¹ Edi yak ebat ufɔk obio iŋwaŋ eke ibibene eke akande mmɔ okuk miduhe, edian ke isɔŋ iŋwaŋ: enen nte efakde mmɔ, mmɔ enyuŋ ewɔrɔ ke jubilee.

³² Edi ama edi obio mme Levite, kpa ufɔk ke obio eke enyenede mmɔ, enen nte mme Levite efakde mmɔ ke ini ekededi.

³³ Ndien edieke owo edepde ye mme Levite, ufɔk eke enyamde, ke idem obio udeme esie, eyewɔrɔ ke jubilee: koro ufɔk ke obio mme Levite edide udeme mmɔ ke otu nditɔ Israel.

³⁴ Edi ifɔnke ndiynam iŋwaŋ emi akande obio mmɔ okuk: koro enye edide nsinsi udeme mmɔ.

³⁵ Ndien ŋko ke ini eyen-usɔ akpade ubuene ke ebiet fo, ubɔk minyuŋ isɔŋke enye mum enye kama ndien; ye idem esen owo, ye oduduŋ: man enye odu uwem ke ebiet fo.

³⁶ Kudia enye udori ke nnama: edi bak Abasi fo: ndien eyen-usɔ odu uwem ke ebiet fo.

³⁷ Kunɔ enye okuk fo ubɔ akwa udori, kunyuŋ unɔ enye udia fo uyom udori.

³⁸ Ami ndi Jehovah Abasi mbufo, emi ŋkosiode mbufo ke isɔŋ Egypt mfep, man nnɔ mbufo isɔŋ Canaan, nnyuŋ ndi Abasi mbufo.

³⁹ Ndien ŋko adaŋemi eyen-usɔ akpade ubuene ke ebiet fo, onyuŋ anyam idem ɔnɔ fi; kunam enye anam utom nte ata ofin:

⁴⁰ edi enye etie ye afo nte owo eke ekpede enye utom, ye nte oduduŋ, onyuŋ anam utom ɔnɔ fi tutu ekem ke isua jubilee:

⁴¹ ndien enye ɔwɔrɔ ɔkpɔŋ fi, enye ye nditɔ esie ŋko, onyuŋ afiak ke ebiet oruk esiemɔ, onyuŋ afiak ke udeme mme ete esie.

⁴² Koro mmɔ edide ikɔt mi emi ŋkosiode ke isɔŋ Egypt mfep: kunyam mmɔ nte enyamde ofin.

⁴³ Kukan enye ke ufik; edi bak Abasi fo.

⁴⁴ Edi yak edi nditɔ mme idut emi ekande mbufo ekuk edi ofin eren fo ye ofin aŋwan fo emi afo edinyenede; mbufo edep ifin iren ye ifin iban ye mmɔ.

⁴⁵ Ndien ama onyuŋ edi nditɔ mme oduduŋ eke eduŋde ye mbufo, mmɔ ke mbufo edidep, ye oruk mmɔ eke edude ye mbufo, eke mmɔ ekebonde ke isɔŋ mbufo: mmɔ edinyuŋ edi se mbufo edinyenede.

⁴⁶ Mbufo enyuŋ eda mmɔ enɔ nditɔ mbufo emi etienede mbufo, enyene, mbufo ekeme ndinim mmɔ ke ifin ke nsinsi: edi ama edi nditɔ-ete mbufo, nditɔ Israel, kiet okukan kiet ke ufik.

⁴⁷ Ndien ŋko edieke ubɔk ekemde oduduŋ mme esen owo eke odude ye afo, ndien eyen-usɔ eke ekperede enye akabarede ubuene, onyuŋ anyam idem esie ɔnɔ esen owo mme oduduŋ eke odude ye afo, mme ɔnɔ owo eke otode ke oruk esen owo:

⁴⁸ ke enye ama akanyam idem esie ama, emekeme ndifak enye; eyen-ete esie kiet emekeme ndifak enye:

⁴⁹ edide eyen-eka ete esie, onyuŋ edide eyen eyen-eka ete esie, emekeme enye ndifak, mme edi iman emi otode ke oruk esie, emekeme enye ndifak; mme ubɔk ama onyuŋ ekem enye yak enye afak idem esie.

⁵⁰ Ndien yak enye abat ye andidep enye, ɔtɔŋɔde ke isua emi akanyamde idem esie ɔnɔ enye, tutu edisim isua jubilee, ndien yak ekɔm-urua esie asaŋa ye ibat isua, yak etie ye enye nte mme usen owo eke ekpede enye utom.

⁵¹ Edieke ediwak isua esuhɔde kaŋa, yak enye osio ke ekɔm-urua esie ɔnɔ ke ufak idem esie ke adaŋa nte ibat isua oro edide.

⁵² Edi misukke isua ediwak tutu edisim ke isua jubilee, ndien yak enye abat ye enye, onyuŋ ɔnɔ ke ufak idem esie ke adaŋa nte ibat isua oro edide.

⁵³ Yak enye odu ye enye eken nte owo eke ekpede enye utom ke isua ke isua: kuyak enye eken akan enye ke ufik ke iso fo.

⁵⁴ Ndien edieke mikafakke enye ntem, enye ye nditɔ esie ŋko ewɔrɔ ke isua jubilee.

⁵⁵ Koro nditɔ Israel edide ikɔt mi; mmɔ edi ikɔt mi, emi ŋkadade ke isɔŋ Egypt ŋwɔrɔ: ami ndi Jehovah Abasi mbufo.