LEVITICUS 22 - Edisana ñwed Abasi Ibom

Mme Enɔ Uwa Enyene Ndidi Edisana

¹ NDIEN Jehovah ɔdɔhɔ Moses, ete, Dɔhɔ Aaron ye nditɔ esie, ete,

² Ebet ndisana ŋkpɔ nditɔ Israel, emi mmɔ enimde enɔ mi ke ndisana, man ekubiat edisana enyiŋ mi: ami ndi Jehovah.

³ Dɔhɔ mmɔ ete, Owo ekededi ke ofuri ubon mbufo, ke emana mbufo, eke edisaŋade ekpere ndisana ŋkpɔ emi nditɔ Israel edidianarede enɔ Jehovah, ke ndek esie odude enye ke idem, yak esibe ukpɔŋ oro efep ke iso mi: ami ndi Jehovah.

⁴ Baba owo kiet ke otu ubon Aaron eke ɔdɔŋɔde akpa-mfia, mme eke ŋkpɔ ɔwɔrɔde enye ke idem, okudia ndisana ŋkpɔ, tutu enye akabare edisana. Ndien ŋko ama edi owo eke otukde ndek okpo ekededi, mme eke owo eke idem eren-owo ɔbɔhɔde enye;

⁵ mme owo eke otukde andinyɔŋi ekededi, eke edisabarede enye, mme otuk owo eke edisabarede enye ke mbubiam esie ekededi;

⁶ ukpɔŋ eke otukde oruk ŋkpɔ oro, eyedehe ndien tutu osim mbubreyo, enye okunyuŋ adia edisana ŋkpɔ, ke enye miyetke idem esie ke mmɔŋ.

⁷ Ndien adaŋemi eyo okutde, edi ndien edisana, yak enye adia ndien edisana ŋkpɔ: koro edide udia esie.

⁸ Enye okuta se ikpade ikpɔŋ, ye se unam awaide, mbak edisabare idem esie ke esit: ami ndi Jehovah.

⁹ Yak mmɔ enim ndien mme ewuhɔ mi, man ekubiom idiɔk-ŋkpɔ ke esit, ekunyuŋ ekpa ebaŋa enye; ami Jehovah nnim mmɔ ke edisana.

¹⁰ Baba esen owo kiet okudia edisana ŋkpɔ: kuyak owo eke oduŋde ye oku, ye owo eke enɔde enye ŋkpɔ-eyen-utom, adia edisana ŋkpɔ.

¹¹ Edi edieke oku adade inyene esie edep owo, yak enye ye emana ke ufɔk esie edia ke esit: yak mme mmɔ emi edia udia esie.

¹² Ndien ŋko edieke eyen oku aŋwan ɔdɔde esen owo, enye okudia edimenere uwa edisana ŋkpɔ.

¹³ Ama edi eyen oku aŋwan eke ebe esie akpade, mme eke esiode ke ndɔ, eke minyuŋ imanke eyen, onyuŋ afiakde ke ufɔk ete esie, yak enye adia udia ete esie, kpa nte ke ini uyen esie; edi baba esen kiet okudia enye.

¹⁴ Ndien edieke owo adiade edisana ŋkpɔ ke ndudue, yak enye ɔkɔrɔ ɔyɔhɔ ubak ition ke esit, ndien ada edisana ŋkpɔ oro ɔsɔk oku.

¹⁵ Ndien mmɔ ekubiat edisana ŋkpɔ nditɔ Israel, emi mmɔ emenerede enɔ Jehovah;

¹⁶ ekunyuŋ esin mmɔ ebiom ukwaŋ-ŋkpɔ isop, ke ini mmɔ ediade edisana ŋkpɔ mmɔ: koro edi ami Jehovah nnim mmɔ ke edisana.

¹⁷ Ndien Jehovah ɔdɔhɔ Moses, ete,

¹⁸ Dɔhɔ Aaron, ye nditɔ esie, ye kpukpru nditɔ Israel, ete mmɔ, Ama edi owo ufɔk Israel ekededi, ye eke isen owo ke Israel, eke edidade enɔ esie edi, edide akaŋa mmɔ ekededi, onyuŋ edide ŋkpɔ ima esit mmɔ ekededi, eke mmɔ edidade enɔ Jehovah ke edifɔp uwa;

¹⁹ mbufo enam ke ima esit mbufo ke eriwa ayara eke ɔfɔnde ama, edide enaŋ, onyuŋ edide erɔŋ, onyuŋ edide ebot.

²⁰ Mbufo ekuwa baba ŋkpɔ kiet eke obiomode ndo: koro midibɔhɔ mbufo ke ubɔk.

²¹ Ndien ke ini owo awade uwa emem ɔnɔ Jehovah ete isio ata akaŋa imɔ, mme uwa ima esit, edide enaŋ, onyuŋ edide eke ŋkpri ufene, yak edi se ifɔnde ima, man ebɔ enye ke ubɔk; baba ndo kiet okudu enye ke idem.

²² Edide nnan, onyuŋ edide mbuŋɔ, mme se idade unan, mme se inyuŋ itakde ndɔk, mme mfat, mme edide se idɔŋɔde mkpɔk, mbufo ekuwa mme mmɔ emi enɔ Jehovah, ekunyuŋ eda mmɔ enɔ Jehovah ke uwa ikaŋ ke itie-uwa.

²³ Edi afo emekeme ndida enaŋ, mme eyen erɔŋ eke edide utibe, ŋwa ke ŋkpɔ ima esit; edi ama edi akaŋa, idibɔhɔ fi.

²⁴ Ndien mbufo ekuda se etimde tim, mme se enuakde nuak, mme se esiode sio, mme se ekpide kpi, ewa enɔ Jehovah; ekunyuŋ enam (ŋkpɔ oro) ke isɔŋ mbufo.

²⁵ Mbufo ekunyuŋ ebɔ esen owo baba oruk ŋkpɔ emi kiet ke ubɔk, ewa uyo Abasi mbufo: koro mbiara odude ke esit, mmɔ ebiomo ndo: idibɔhɔ mbufo ŋkpɔ oro ke ubɔk.

²⁶ Ndien Jehovah ɔdɔhɔ Moses, ete,

²⁷ Ke adaŋemi enaŋ mme erɔŋ, mme ebot amanade, yak etie ye eka esie ke usen itiaba; ndien ɔtɔŋɔde ke ɔyɔhɔ usen itiaita, eyebɔ enye ke enɔ ikaŋ Jehovah.

²⁸ Mbufo ekunyuŋ ewot enaŋ mme erɔŋ, ye eyen esie ke usen kiet.

²⁹ Ndien adaŋemi mbufo ediwade uwa ekɔm Jehovah, ɔfɔn mbufo ewa ke ima esit mbufo.

³⁰ Ke suk usen oro ke mbufo edita enye; ekusuhɔ enye tutu eyo esiere: ami ndi Jehovah.

³¹ Mbufo enim ndien mme ewuhɔ mi, enyuŋ enam mmɔ: ami ndi Jehovah.

³² Mbufo ekunyuŋ ebiat edisana enyiŋ mi; edi yak enim mi ke edisana ke otu nditɔ Israel: edi ami Jehovah nnim mbufo ke edisana,

³³ ŋkonyuŋ nsioŋo mbufo ke isɔŋ Egypt mfep, kpaŋ ndi Abasi mbufo. Ami ndi Jehovah.