LEVITICUS 20 - Edisana ñwed Abasi Ibom

Usio Isop Nsɔŋibuot

¹ NDIEN Jehovah ɔdɔhɔ Moses, ete, Nyuŋ dɔhɔ Israel, ete,

² Owo ekededi ke otu nditɔ Israel, ye ke otu isen emi eduŋde ke Israel, eke adade eyen esie ɔnɔ Molech, enyene ndikpa: yak mbio-obio etɔŋɔ enye ke itiat.

³ Ami nyenyuŋ ŋwuk iso mi nse owo oro, nnyuŋ nsibe enye ke otu mbio-obio mmɔ mfep; koro enye akadade eyen esie ɔnɔ Molech, man enye asabare edisana ebiet mi, onyuŋ abiat edisana enyiŋ mi.

⁴ Ndien edieke mbio-obio emende enyin mmɔ ke idem owo oro efep, ke ini enye adade eyen esie ɔnɔ Molech, ndien miwotke enye;

⁵ ndien ami nyewuk iso mi nse owo oro, ye oruk esie, nnyuŋ nsibe enye, ye kpukpru mmɔ eke etienede enye enam use ye Molech, ke otu mbio-obio mmɔ mfep.

⁶ Ndien ŋko ama edi ukpɔŋ eke akabarede etiene ekpo, ye mbia-idiɔŋ, onyuŋ etienede mmɔ anam use, nyewuk iso mi nse ukpɔŋ oro, nnyuŋ nsibe enye ke otu mbio-obio mmɔ mfep.

⁷ Mbufo enyuŋ enam idem mbufo esana, enyuŋ edi edisana: koro ami ndide Jehovah Abasi mbufo.

⁸ Mbufo enyuŋ enim mme ewuhɔ mi, enyuŋ enam mmɔ: edi ami Jehovah nnam mbufo esana.

⁹ Owo ekededi eke osuŋide ete esie ye eka esie, enyene ndikpa: enye osuŋi ete esie ye eka esie; iyip esie ɔsɔp enye.

¹⁰ Ndien ŋko ama edi owo eke okotde ŋwan owo, eke okotde ŋwan mbɔhiduŋ esie, okot ŋwan ye ŋwan emi enye okotde enyene ndikpa.

¹¹ Ndien owo eke okotde ŋwan ete esie, ɔfuhɔre ete esie eferi: mmɔ mbiba enyene ndikpa; iyip mmɔ ɔsɔp mmɔ.

¹² Ndien edieke owo okotde ŋwan eyen esie, mmɔ mbiba enyene ndikpa: mmɔ emenam oburobut ŋkpɔ; iyip mmɔ ɔsɔp mmɔ.

¹³ Ndien edieke eren owo adaŋde ye eren owo, nte emi edaŋde ye ŋwan, mmɔ mbiba emenam ata oburobut ŋkpɔ: mmɔ enyene ndikpa: iyip mmɔ ɔsɔp mmɔ.

¹⁴ Ndien edieke owo ɔdɔde ŋwan ɔkɔrɔ ye eka esie, oburobut ŋkpɔ edi oro: yak efɔp eren ye iban oro ke ikaŋ; man oburobut ŋkpɔ okudu ke otu mbufo.

¹⁵ Ndien ekutre ndiwot owo eke adaŋde ye unam: mbufo enyuŋ ewot unam oro.

¹⁶ Ndien edieke ŋwan etienede unam ekededi ete idaŋ ye enye, wowot ŋwan ye unam oro: mmɔ enyene ndikpa; iyip mmɔ ɔsɔp mmɔ.

¹⁷ Ndien edieke owo adade eyen-ete esie aŋwan mme eyen-eka esie aŋwan, onyuŋ okutde enye iferi, enye (ŋwan) onyuŋ okutde enye eken iferi ŋko-ŋko; ke edi oburobut ŋkpɔ; yak ewot mmɔ ke iso nditɔ obio mmɔ: enye ɔmɔfuhɔre eyen-eka esie iferi: yak enye obiom idiɔk ido esie.

¹⁸ Ndien edieke owo okotde ŋwan eke odude ke esien, onyuŋ ɔfuhɔrede enye iferi, enye amayarare idim esie, ŋwan ɔmɔnyuŋ ɔfuhɔre idim iyip esiemɔ: ndien yak esibe mmɔ mbiba ke otu mbio-obio mmɔ efep.

¹⁹ Kunyuŋ ufuhɔre eyen-eka uka iferi, ye iferi eyen eka usɔ; koro enye ɔfuhɔrede oruk esiemɔ iferi: yak mmɔ ebiom idiɔk ido mmɔ.

²⁰ Ndien edieke owo okotde ŋwan eyen-eka ete esiemɔ, enye ɔmɔfuhɔre eyen-eka ete esiemɔ iferi: idiɔk-ŋkpɔ mmɔ obiomo mmɔ; mmɔ eyekpaŋa inyeneke eyen.

²¹ Ndien edieke owo adade ŋwan eyen-eka esie, oro edi ŋkpɔ ndek; enye ɔmɔfuhɔre eyen-eka esie iferi: mmɔ idinyeneke eyen.

²² Mbufo enim ndien kpukpru ewuhɔ mi, ye kpukpru item mi, enyuŋ enam mmɔ; mbak isɔŋ emi ami ndade mbufo nduk do nte eduŋ ke esit, edikpɔhi mbufo ɔduɔk.

²³ Mbufo ekusaŋa ndien ke ido idut emi ami mmɔŋ mbin mmɔ mfep ke iso mbufo: koro mmɔ enamde kpukpru ŋkpɔ emi, mmɔdo nsuade mmɔ.

²⁴ Ŋkonyuŋ ndɔhɔ mbufo, nte mbufo eyeda isɔŋ mmɔ enyene, ami nyenyuŋ nda enye nnɔ mbufo enyene, isɔŋ emi ɔfiɔrɔde mmɔŋ-eba ye aran-ɔkwɔk: ami ndi Jehovah Abasi mbufo, emi ndianarede mbufo ke mme idut efen.

²⁵ Mbufo enim ndien Unam emi asanade ye Unam emi misanake isio, ye inuen emi misanake ye inuen emi esanade; ekunyuŋ esabare idem mbufo ke unam, mme ke inuen, mme ke ŋkpɔ ekededi eke ɔnyɔnide ke isɔŋ, eke ndianarede ye mbufo nnim ke edidehe.

²⁶ Ndien mbufo edidi edisana ikɔt mi: koro ami Jehovah ndide edisana, nyenyuŋ ndianare mbufo ye mme idut efen, man mbufo edi okim.

²⁷ Ndien ŋko eren mme ŋwan, eke ekpo odude mmɔ ke idem, mme eke edide abia-idiɔŋ, enyene ndikpa mkpa: yak etɔŋɔ mmɔ ke itiat; iyip mmɔ ɔsɔp mmɔ.