LEVITICUS 2 - Edisana ñwed Abasi Ibom

Enɔ Inuak-udia

¹ NDIEN ke ini owo adade enɔ inuak-udia ɔsɔk Jehovah, enɔ esie edidi eti ndom-uyo: yak enye onyuŋ ɔtɔhɔ aran esin ke esit, onyuŋ adian frankincense ke esit:

² ndien ada enye ɔsɔk nditɔ Aaron, mme oku: ndien yak enye owobi ndom ubɔk esie kiet, ye aran esie, ye kpukpru frankincense esie; ndien yak oku osio ubak-eriti esie, ɔfɔp ke itie-uwa, uwa ikaŋ, edinem utebe, ɔnɔ Jehovah.

³ Ndien ubak inuak-udia eke ɔsuhɔde enyene Aaron ye nditɔ esie: enye edi ata edisana ubak uwa ikaŋ Jehovah.

⁴ Ndien adaŋemi afo edidade enɔ inuak-udia ke ŋkpɔ eke esaŋde ke usaŋ-uyo, ɔnɔ, edidi obukpa uyo eti ndom, eke leaven miduhe, mbuaha ye aran, mme mfefere uyo, eke leaven miduhe, eke eyetde aran.

⁵ Ndien edieke enɔ fo edide inuak-udia (eke esaŋde) ke usaŋ-uyo ukwak, enye edidi eti ndom-uyo mbuaha ye aran, eke leaven miduhe.

⁶ Bahare enye nsit-nsit, nyuŋ tɔhɔ enye aran ke esit: enye edi inuak-udia.

⁷ Ndien edieke enɔ fo edide edikaŋ inuak-udia, yak enam enye ke eti ndom-uyo ye aran.

⁸ Ndien da inuak udia eke enamde ntem, sɔk Jehovah: ndien adaŋemi owo adade enye ɔsɔk oku, yak oku emen enye asaŋa ekpere itie-uwa.

⁹ Ndien oku osio editi ubak inuak-udia oro, emen ɔfɔp ke itie-uwa, ke uwa ikaŋ eti utebe, ɔnɔ Jehovah.

¹⁰ Ndien ubak inuak-udia eke ɔsuhɔde enyene Aaron ye nditɔ esie: edi ata edisana ubak mme uwa ikaŋ Jehovah.

¹¹ Baba uwa udia eke mbufo edidade esɔk Jehovah, okusine leaven; koro mbufo ekufɔp baba leaven, mme aran-ɔkwɔk, ke uwa ikaŋ Jehovah.

¹² Ama edi enɔ akpa mfri, mbufo edida mmɔ esɔk Jehovah: edi ekudori mmɔ ke itie-uwa ke edinem utebe.

¹³ Nyuŋ sin inuŋ ke kpukpru enɔ inuak-udia fo; kunyuŋ uyak inuŋ ediomi Abasi anana ke inuak-udia fo; dori inuŋ ke kpukpru mme uwa fo emi afo adade edi.

¹⁴ Ndien edieke afo edidade uwa akpa mfri ɔsɔk Jehovah, da mbuot obufa ibokpot eke efɔpde ke ikaŋ, editim mbuŋwum iŋwaŋ, sɔk ke inuak-udia akpa mfri fo.

¹⁵ Nyuŋ sin aran ke esit: nyuŋ dori frankincense ke esit: enye edi inuak-udia.

¹⁶ Ndien oku ada editi ubak esie, ɔkɔrɔ ye kpukpru frankincense esie, ɔfɔp ke uwa ikaŋ Jehovah.