LEVITICUS 18 - Edisana ñwed Abasi Ibom

Abasi Asua Ɔnɔ Owo Ndisabare Idem

¹ EKEM Jehovah ɔdɔhɔ Moses, ete, Dɔhɔ nditɔ Israel, ete,

² Ami ndi Jehovah Abasi mbufo.

³ Mbufo ekunam nte isɔŋ Egypt, emi mbufo ekeduŋde ke esit, enamde: ekunyuŋ enam nte isɔŋ Canaan, emi ami ndade mbufo nduk do, enamde: ekunyuŋ esaŋa ke mme ewuhɔ mmɔ.

⁴ Mbufo enim ido mi, enyuŋ ekpeme mme ewuhɔ mi, enyuŋ esaŋa ke mmɔ: ami ndi Jehovah Abasi mbufo.

⁵ Mbufo enim ndien mme ewuhɔ mi ye item mi: emi owo eke edinamde mmɔ edidude uwem ke esit: ami ndi Jehovah.

⁶ Baba owo mbufo kiet okutiene owo oruk esie ekededi, ndifuhɔre mmɔ iferi: ami ndi Jehovah.

⁷ Kufuhɔre usɔ iferi, kunyuŋ ufuhɔre uka iferi: enye edi uka; kufuhɔre enye iferi.

⁸ Kufuhɔre ŋwan usɔ iferi: emi edi iferi usɔ.

⁹ Ama edi iferi eyen-uka aŋwan, edide eyen-usɔ, onyuŋ edide eyen uka, edide amana ke ufɔk, onyuŋ edide amana ke ebiet efen, kufuhɔre mmɔ iferi.

¹⁰ Ama edi iferi eyen eyen-eren fo, ye eke eyen eyen fo aŋwan, kufuhɔre mmɔ iferi: koro mmɔ edide iferi fo.

¹¹ Ama edi iferi eyen-aŋwan ŋwan usɔ, emi usɔ obonde, enye edi eyen-usɔ aŋwaŋ, kufuhɔre enye iferi.

¹² Kufuhɔre eyen-eka usɔ aŋwan iferi: enye edi oruk usɔ.

¹³ Kufuhɔre eyen-eka uka aŋwan iferi: koro enye edide oruk uka.

¹⁴ Kufuhɔre eyen-eka usɔ eren iferi, kutiene ŋwan esie: enye edi ŋwan eyen-eka usɔ eren.

¹⁵ Kufuhɔre ŋwan eyen fo iferi: enye edi ŋwan eyen fo; kufuhɔre enye iferi.

¹⁶ Kufuhɔre ŋwan eyen-uka iferi: iferi eyen uka edi oro:

¹⁷ Kufuhɔre ŋwan ye eyen esie aŋwan iferi; kuda eyen eyen-eren ŋwan oro, mme eyen eyen esie aŋwan, ete ifuhɔre enye iferi; mmɔ edi oruk esie: ata oburobut ŋkpɔ edi oro.

¹⁸ Kunyuŋ uda ŋwan ukɔrɔ ye eyen-eka esie aŋwan, ndifibe enye ufup, nnyuŋ mfuhɔre enye iferi, ŋkɔrɔ ye enye ke ini uwem esie.

¹⁹ Kunyuŋ utiene ŋwan ke ini idiɔk itie esie, ete ifuhɔre enye iferi.

²⁰ Kunyuŋ ukot ŋwan mbɔhiduŋ fo, ndida idem fo ŋkasabade ye enye.

²¹ Kunyuŋ uda ubon fo unɔ Molech man ebe oduk (ke ikaŋ), kunyuŋ ubiat enyiŋ Abasi fo: ami ndi Jehovah.

²² Kunyuŋ udaŋ ye eren nte edaŋde ye ŋwan: mbubiam edi oro.

²³ Kunyuŋ udaŋ ye baba unam kiet, kunyuŋ usabare idem fo ke esit: ŋwan okunyuŋ ada ke iso unam ndidaŋ ye enye: ata mbubiam edi oro.

²⁴ Mbufo ekuda mme mmɔ emi ndomo kiet esabare idem mbufo ke esit: koro mme idut emi ami mmɔŋ mbin mmɔ mfep ke iso mbufo, edade kpukpru ŋkpɔ emi esabare idem mmɔ ke esit:

²⁵ isɔŋ omonyuŋ edehe: ndien nyeda ufen esie ntiene enye, isɔŋ onyuŋ ɔkpɔhi mme andiduŋ enye efep.

²⁶ Mbufo enim ndien mme ewuhɔ mi, ye item mi, ekunyuŋ enam baba ofuri mbubiam oro kiet, edide eyen isɔŋ, onyuŋ edide esen emi oduŋde ke otu mbufo:

²⁷ (koro mbio isɔŋ emi ebemde mbufo iso, ekenamde kpukpru ŋkpɔ mbubiam emi, isɔŋ oro onyuŋ edehe;)

²⁸ mbak isɔŋ oro edikpɔhi mbufo efep, ke ini mbufo esabarede enye, kpa nte ɔkɔkpɔhide mme idut emi ekebemde mbufo iso efep.

²⁹ Koro ama edi kpukpru owo eke enamde mbubiam ŋkpɔ oro ekededi, yak esibe kpa ukpɔŋ eke enamde, efep ke otu mbio-obio mmɔ.

³⁰ Mbufo enim ndien mme ewuhɔ mi, man ekunam baba ndek ido emi kiet, emi mmɔ ekebemde mbufo iso enam, ekunyuŋ esabare idem mbufo ke esit: ami ndi Jehovah Abasi mbufo.