LEVITICUS 17 - Edisana ñwed Abasi Ibom

Mme Ewuhɔ Emi Ebaŋade Nte Ekemede Ndiwot Nnyuŋ Nta Mme Unam

¹ EDIKEM Jehovah ɔdɔhɔ Moses, ete, Dɔhɔ Aaron, ye nditɔ esie, ye nditɔ Israel akpaimɔ, ete mmɔ,

² Ikɔ emi Jehovah owukde edi emi, ete,

³ Eyen ufɔk Israel ekededi eke ediwotde enaŋ, mme erɔŋ, mme ebot, ke esit nna, mme eke ediwotde ke edem nna,

⁴ ndien midaha enye idi ke enyin-usuŋ efe esop, man ada enɔ ɔnɔ Jehovah, ke iso ebiet-iduŋ Jehovah; iyip eyesɔp owo oro: enye ɔmɔduɔk iyip; yak enye esibe owo oro efep ke otu mbio-obio mmɔ:

⁵ kpaŋ nditɔ Israel ekpeda uwa mmɔ, emi ewade ke iso iŋwaŋ edi, enyuŋ eda mmɔ esɔk Jehovah, ke enyin-usuŋ efe esop, esɔk oku, enyuŋ ewa mmɔ enɔ Jehovah ke uwa emem.

⁶ Ndien oku osime iyip ke itie-uwa Jehovah, ke enyin-usuŋ efe esop, onyuŋ ɔfɔp ikpɔŋ ɔnɔ Jehovah ke edinem utebe.

⁷ Mmɔ ekunyuŋ ewa aba uwa mmɔ enɔ demon, emi mmɔ etienede. Emi edi nsinsi ewuhɔ mmɔ ke ofuri emana mmɔ.

⁸ Nyuŋ dɔhɔ mmɔ ete, Owo ekededi eke otode ufɔk Israel, mme onyuŋ otode isen eke eduŋde ke otu mbufo, eke ediwade edifɔp uwa mme uwa emem,

⁹ ndien midaha enye idi ke enyin-usuŋ efe esop, iwa inɔ Jehovah; eyesibe owo oro efep ke mbio-obio mmɔ.

¹⁰ Ndien ŋko ama onyuŋ edi owo ekededi eke otode ufɔk Israel, mme onyuŋ otode isen emi eduŋde ke otu mbufo, eke edidiade oruk iyip ekededi, nyewuk iso nse ukpɔŋ oro adiade iyip, nyenyuŋ nsibe enye ke mbio-obio mmɔ mfep.

¹¹ Koro uwem unam odude ke iyip: ami mmonyuŋ nda enye, ndori ke itie-uwa nnɔ mbufo, ndisio isop nnɔ ukpɔŋ mbufo: koro edide iyip osio isop ɔnɔ ukpɔŋ.

¹² Mmɔdo ndɔhɔde nditɔ Israel, nte Baba ofuri ukpɔŋ mbufo kiet okudia iyip, esen emi oduŋde ke otu mbufo okunyuŋ adia iyip.

¹³ Ndien ŋko owo ekededi eke otode nditɔ Israel, eke onyuŋ otode isen emi eduŋde ke otu mbufo, eke ebinde ikɔt omum unam mme inuen eke etade eta; yak enye ɔduɔk iyip esie, ndien ada ntan ofuk enye.

¹⁴ Koro ama edi uwem kpukpru mme unam, edi iyip mmɔ edi uwem mmɔ; ndɔhɔ ndien nditɔ Israel, nte, Mbufo ekudia iyip unam baba kiet, koro uwem kpukpru unam edide iyip mmɔ: yak esibe kpukpru owo eke ediade enye efep.

¹⁵ Ndien kpukpru owo ke otu nditɔ isɔŋ, ye ke otu isen, eke editade se ikpade ikpɔŋ, mme se unam ikɔt awaide, enyene ndiyet edisine-ŋkpɔ mmɔ, nnyuŋ nyet idem mmɔ ke mmɔŋ, ndien edehe tutu osim mbubreyo: ndien mmɔ edidi edisana.

¹⁶ Edi ke mmɔ miyetke edisine-ŋkpɔ mmɔ, minyuŋ iyetke idem mmɔ ke mmɔŋ; yak mmɔ ebiom ndien ukwaŋ-ŋkpɔ mmɔ.