LEVITICUS 15 - Edisana ñwed Abasi Ibom

Mme Ewuhɔ ke Abaŋa Ŋkpɔ Emi Ɔwɔrɔde Owo ke Idem

¹ NDIEN Jehovah ɔdɔhɔ Moses ye Aaron, ete, Mbufo edɔhɔ nditɔ Israel, ete mmɔ,

² Ke ini ŋkpɔ ɔbɔhɔde eren owo ke obukidem ɔwɔrɔ, enye edehe koro ŋkpɔ ɔbɔhɔde enye ɔwɔrɔ.

³ Ndien ntem ke enye edehe ke ŋkpɔ eke; ɔbɔhɔde enye ɔwɔrɔ ke obuk-idem odutde, mme ke obuk-idem esie esirede etre ndidut, ndek esie edi oro.

⁴ Kpukpru mbri eke owo udɔŋɔ oro anade ke esit edehe; kpukpru ŋkpɔ eke enye etiede ke esit enyuŋ edehe:

⁵ ndien ŋko, owo eke otukde mbri esie enyene ndiyet edisine-ŋkpɔ esiemɔ, nnyuŋ nyet idem esie ke mmɔŋ, ndien edehe tutu osim mbubreyo.

⁶ Owo eke etiede ke ŋkpɔ eke owo udɔŋɔ oro etiede ke esit, onyuŋ enyene ndiyet edisine-ŋkpɔ esiemɔ, nnyuŋ nyet idem esie ke mmɔŋ, ndien edehe tutu osim mbubreyo.

⁷ Ndien ŋko owo eke otukde obukidem owo udɔŋɔ oro, onyuŋ enyene ndiyet edisine-ŋkpɔ esiemɔ, nnyuŋ nyet idem esie ke mmɔŋ, ndien edehe tutu osim mbubreyo.

⁸ Ndien ke ini owo udɔŋɔ oro ɔkɔkde owo eke asanade etap, yak enye eyet edisine-ŋkpɔ esiemɔ, onyuŋ eyet idem esie ke mmɔŋ, ndien edehe tutu osim mbubreyo.

⁹ Ndien kpukpru ŋkpɔ-itie udoro-unam eke owo udɔŋɔ emi odorode ke esit, edidi edidehe.

¹⁰ Kpukpru owo ŋko eke etukde ŋkpɔ ekededi eke ekesinde enye ke idak, eyenyuŋ edehe tutu osim mbubreyo: owo eke obiomde ŋkpɔ oro onyuŋ enyene ndiyet edisine ŋkpɔ esiemɔ, nnyuŋ nyet idem esie ke mmɔŋ, onyuŋ edehe tutu osim mbubreyo.

¹¹ Ndien ŋko kpukpru owo eke owo udɔŋɔ emi otukde, ke miyetke ubɔk esie ke mmɔŋ, enyuŋ enyene ndiyet edisine-ŋkpɔ mmɔ, nyuŋ nyet idem mmɔ ke mmɔŋ, ndien edehe tutu osim mbubreyo.

¹² Yak mmɔ enyuŋ ebom ŋkpɔ mbat eso eke owo udɔŋɔ oro otukde: yak enyuŋ eyet kpukpru ŋkpɔ eto ke mmɔŋ.

¹³ Ekem, adaŋemi owo udɔŋɔ emi asanade, udɔŋɔ esie onyuŋ okurede: yak enye abat usen itiaba ɔnɔ idem esie ke erinam enye asana, ndien eyet edisine ŋkpɔ esiemɔ, onyuŋ eyet idem esie ke ndek mmɔŋ, ndien enye edidi edisana.

¹⁴ Ndien ke ɔyɔhɔ usen itiaita, yak enye ada mbomo ŋkuku iba. Mme nditɔ ibiom iba ke idem esie, edi ke iso Jehovah ke enyin-usuŋ efe esop, ndien ada mmɔ ɔnɔ oku:

¹⁵ ndien yak oku awa mmɔ, kiet ke uwa idiɔk ido, kiet eken ke edifɔp uwa; ke ntre ke oku edisio isop inɔ enye ke iso Jehovah, abaŋa udɔŋɔ esie.

¹⁶ Ndien adaŋemi idem erenowo ɔbɔhɔde ɔduɔhɔ, yak enye eyet ofuri obukidem esie ke mmɔŋ, ndien edehe tutu osim mbubreyo.

¹⁷ Yak enyuŋ eda kpukpru ɔfɔŋidem, ye kpukpru ikpa, eke idem erenowo ɔduɔhɔde ke esit, eyet ke mmɔŋ, mmɔ enyuŋ edehe tutu osim mbubreyo.

¹⁸ Ndien adaŋemi erenowo adade ŋkpɔ oro adaŋ ye ŋwan, yak mmɔ enyuŋ eyet idem mmɔ ke mmɔŋ, ndien edehe tutu osim mbubreyo.

¹⁹ Ndien ŋko ke ini ŋkpɔ ɔwɔrɔde ŋwan ke idem, edieke iyip ɔwɔrɔde enye ke obukidem, enye enyene ndida ndek esie ŋkpɔnɔre ntie ke ofuri usen itiaba: ndien kpukpru owo eke etukde enye edidi edidehe tutu osim mbubreyo.

²⁰ Ndien ŋko kpukpru se enye adade ndek esie ana ke esit, edi edidehe: kpukpru se enye etiede ke esit, enyuŋ edehe ŋko-ŋko.

²¹ Ndien kpukpru owo eke etukde mbri esie, enyene ndiyet ɔfɔŋidem mmɔ nnyuŋ nyet idem mmɔ ke mmɔŋ, ndien edehe tutu osim mbubreyo.

²² Ndien ŋko kpukpru owo eke etukde ŋkpɔ ekededi eke enye etiede ke esit, enyene ndiyet edisine-ŋkpɔ mmɔ, nnyuŋ nyet idem mmɔ ke mmɔŋ, ndien edehe tutu osim mbubreyo.

²³ Ndien ekpedi bed esie, onyuŋ edi ŋkpɔ ekededi eke enye etiede ke esit, adaŋemi owo otukde enye, owo edehe tutu osim mbubreyo.

²⁴ Ndien edieke owo adaŋde ye enye, ndek ŋwan onyuŋ eyet enye, owo oro edi edidehe ke usen itiaba; ndien ofuri bed eke owo oro anade ke esit onyuŋ edehe ŋkoŋko.

²⁵ Ndien ke adaŋemi ŋwan ɔdɔŋɔde ɔwɔrɔ iyip ediwak usen, ke midige ini idiɔk itie esie, onyuŋ ɔwɔrɔ ebe ini idiɔk itie esie; enye edehe ofuri ini emi iyip esie ɔwɔrɔde, kpa nte eke esien.

²⁶ Kpukpru mbri eke enye anade ke esit ke ini udɔŋɔ esie, enyuŋ etie ye enye nte mbri udu ke esien; kpukpru ŋkpɔ eke enye etiede ke esit enyuŋ edehe, kpa nte ndek udu ke esien.

²⁷ Ndien kpukpru owo eke etukde ŋkpɔ oro edehe, enyuŋ enyene ndiyet edisine-ŋkpɔ mmɔ, nnyuŋ nyet idem-mmɔ ke mmɔŋ, ndien edehe tutu osim mbubreyo.

²⁸ Edi udɔŋɔ ama ekpehe enye, enye ama onyuŋ asana, yak abat usen itiaba ke idem esie, ndien ke mmɔ ebede, enye eyesana.

²⁹ Ekem ke ɔyɔhɔ usen itiaita, yak enye ada mbomo ŋkuku iba, mme nditɔ ibiom iba ke idem esie, emen mmɔ ɔsɔk oku, ke enyin-usuŋ efe esop.

³⁰ Ndien oku awa kiet ke uwa idiɔk ido, ye kiet eken ke edifɔp uwa; ntre ke oku edisio isop ɔnɔ ke iso Jehovah ke ikɔ eriwɔrɔ ndek esie.

³¹ Ntem ke mbufo edidianare nditɔ Israel ke ndek mmɔ, man mmɔ ekukpaŋa ke ndek mmɔ ke mmɔ esabarede ebiet-iduŋ mi emi odude ke otu mmɔ.

³² Emi edi ewuhɔ owo uwɔrɔ ŋkpɔ idem, ye eke owo eke idem eren owo ɔbɔhɔde enye ɔduɔhɔ, onyuŋ asabarede enye;

³³ ye eke ŋwan eke odude ke esien, ye eke owo eke ŋkpɔ ɔwɔrɔde enye ke idem, edide erenowo, onyuŋ edide ŋwan, ye eke eren eke adaŋde ye ŋwan eke edehede.