LEVITICUS 14 - Edisana ñwed Abasi Ibom

Nte Ekemede Ndinam Owo Asana ke Ini Enye Enyenede Udɔŋɔ ke Ikpa Idem

¹ NDIEN Jehovah ɔdɔhɔ Moses, ete, Emi edi

² ewuhɔ andidɔŋɔ akpa-mfia ke usen unam enye asana: yak eda enye esɔk oku:

³ ndien yak oku ɔwɔrɔ aka ke edem nna; oku onyuŋ ese, ndien, sese, edieke udɔŋɔ akpa-mfia okurede andidɔŋɔ ama;

⁴ ndien oku editeme ete, Eda edisana inuen uwem iba, ye eto cedar, ye ididuot, ye hyssop, enɔ owo emi enamde enye asana:

⁵ ndien yak oku ɔdɔhɔ ete ewot inuen ke eso mbat ke enyɔŋ ndek mmɔŋ;

⁶ ama edi inuen emi odude uwem, yak enye ada enye, ye eto cedar, ye ididuot, ye hyssop, edebi mmɔ ye inuen emi odude uwem ke iyip inuen emi ewotde ke enyɔŋ ndek mmɔŋ oro:

⁷ onyuŋ osime owo emi eyomde ndisio enye udɔŋɔ akpa-mfia ke idem mfep nnam asana, utim ikatiaba, onyuŋ onim enye ke edisana, ndien asana inuen emi odude uwem ayak ɔnyɔŋ ikɔt.

⁸ Ndien yak owo emi enamde enye asana, eyet edisine-ŋkpɔ esie, onyuŋ okporo kpukpru idet esie onyuŋ eyet idem esie ke mmɔŋ, man enye edi edisana: ndien enye edi ediduk ke nna, etie ke mkpe esa tent esie ke ofuri usen itiaba.

⁹ Ndien ama ekem ke ɔyɔhɔ usen itiaba, yak enye okporo ofuri idet ibuot esie, ye ntaŋ ebek esie, ye nditan enyin esie, onyuŋ okporo ofuri idet esie efep, onyuŋ eyet edisine-ŋkpɔ esie, onyuŋ eyet idem esie ke mmɔŋ, ndien edi edisana.

¹⁰ Ndien ke ɔyɔhɔ usen itiaita, yak enye ada nditɔ okukim iba eke efɔnde ema, ye uman eyen enaŋ isua kiet, eke ɔfɔnde ama, ye omer eti ndom-uyo ita eke ebuakde ye aran, ke uwa udia, ye ubak pint aran kiet.

¹¹ Ndien yak oku emi anamde enye asana, ada owo oro enamde enye asana, ye ŋkpɔ oro, edinim ke iso Jehovah, ke enyin-usuŋ efe esop:

¹² ndien yak oku osio eyen erɔŋ kiet ada edi ke uwa isop, ye aran ke ubak pint, onyuŋ ofuŋ mmɔ ke edifuŋ uwa ke iso Jehovah.

¹³ Ndien yak enye owot eyen erɔŋ oro ke ebiet emi ewotde uwa idiɔk ido, ye edifɔp uwa, ke ebiet emi asanade: koro uwa isop enyenede oku, kpa nte uwa idiɔk ido: enye edi ata edisana:

¹⁴ ndien yak oku ada ndusuk iyip uwa isop oro, ɔtɔi owo emi enamde enye asana, ke mben utɔŋ nnasia, ye ke nnuen ubɔk obodom nnasia, ye ke nnuen ukot obodom nnasia:

¹⁵ ndien yak oku ada ndusuk aran ke ubak pint oro, ɔtɔhɔ esin ke eka-ubɔk esie ufien.

¹⁶ Ndien yak oku edebi nnuenubɔk nnasia esie ke aran emi odude ke eka-ubɔk ufien esie, onyuŋ ada nnuenubɔk esie osime aran ke iso Jehovah utim ikatiaba:

¹⁷ Ndien oku ada usuk aran emi ɔsuhɔde enye eka-ubɔk, ɔtɔi owo emi enamde enye asana, ke mben utɔŋ nnasia, ye ke nnuenubɔk obodom nnasia, ye ke nnuenukot obodom nnasia, ke enyɔŋ iyip uwa isop oro.

¹⁸ Ndien yak oku ada aran emi ɔsuhɔde enye ke eka-ubɔk, eyet owo emi enamde enye asana, ke ibuot. Ntem ke oku osio isop ke iso Jehovah ɔnɔ enye.

¹⁹ Ndien oku awa uwa idiɔk ido oro, onyuŋ osio isop ɔnɔ owo emi esiode ndek esie efep enam enye asana; ndien ediwot edifɔp uwa:

²⁰ yak oku onyuŋ ɔfɔp edifɔp uwa ye inuak udia ke itie-uwa: ntre ke oku osio isop ɔnɔ enye, ndien enye edidi edisana.

²¹ Edi edieke enye obuenede, ubɔk minyuŋ ikemke enye; ndien yak enye ada eyen erɔŋ kiet ke uwa isop eke efuŋde, man esio isop enɔ enye, ye omer eti ndom-uyo kiet eke ebuakde ye aran ke inuak udia, ye ubak pint aran kiet;

²² ye mbomo ŋkuku iba, mme nditɔ ibiom iba, nte ubɔk ekemde enye; kiet edi ke uwa idiɔk ido, ye kiet eken ke edifɔp uwa.

²³ Ndien yak enye ada mmɔ ɔsɔk oku ke ɔyɔhɔ usen itiaita, ke enyin-usuŋ efe esop, ke iso Jehovah, ke ŋkpɔ unam enye asana.

²⁴ Ndien yak oku emen eyen erɔŋ uwa isop, ye ubak pint aran, oku onyuŋ ofuŋ mmɔ ke edifuŋ uwa ke iso Jehovah:

²⁵ ndien enye owot eyen erɔŋ uwa isop, oku onyuŋ ada usuk iyip uwa isop oro, editɔi owo emi enamde enye asana, ke mben utɔŋ nnasia, ye ke nnuenubɔk obodom nnasia, ye ke nnuenukot obodom nnasia:

²⁶ ndien yak oku ada usuk aran ɔtɔhɔ esin ke eka-ubɔk oku ufien:

²⁷ ndien oku ada nnuenubɔk nnasia esie osime usuk aran emi odude enye ke eka-ubɔk ufien, utim ikatiaba ke iso Jehovah:

²⁸ ndien yak oku onyuŋ ada usuk aran emi odude enye ke eka-ubɔk, ɔtɔi owo emi enamde enye asana, ke mben utɔŋ nnasia, ye ke nnuenubɔk obodom nnasia, ye ke nnuenukot obodom nnasia, ke ɔtɔ iyip uwa isop oro:

²⁹ ndien enye ada aran emi ɔsuhɔde oku ke eka-ubɔk, eyet owo emi enamde enye asana ke ibuot, man osio isop ɔnɔ enye ke iso Jehovah.

³⁰ Ndien yak enye awa mbomo ŋkuku oro kiet, mme eyen ibiom kiet, eke ubɔk ekemde enye;

³¹ kpa oro ubɔk ekemde enye, kiet ke uwa idiɔk ido, ye kiet eken ke edifɔp uwa, ɔkɔrɔ ye uwa udia: ntre ke oku osio isop ɔnɔ owo emi enamde enye asana ke iso Jehovah.

³² Emi edi ewuhɔ owo eke ɔdɔŋɔde akpa-mfia, emi ubɔk mikemke enye ke ŋkpɔ unam enye asana.

³³ Ndien Jehovah ɔdɔhɔ Moses ye Aaron, ete,

³⁴ Ke adaŋemi mbufo edidukde ke isɔŋ Canaan, emi ami nyomde ndinɔ mbufo enyene, ndinyuŋ nsinde udɔŋɔ akpa-mfia ke ufɔk ke isɔŋ emi mbufo edinyenede;

³⁵ ndien yak andinyene ufɔk oro edi editiŋ ɔnɔ oku, ete, Etie mi nte udɔŋɔ odu ke ufɔk mi;

³⁶ ndien yak oku eteme ete esioŋo kpukpru ŋkpɔ ke ufɔk oro efep, ke ini oku mika-ikaha kaŋa ndise udɔŋɔ, mbak kpukpru se idude ke ufɔk edidehe: ndien oku ediduk ese ufɔk oro:

³⁷ ndien adaŋemi enye esede udɔŋɔ: sese, udɔŋɔ ama odu ke ibibene ufɔk oro, ndudu-ndudu, awa ntɔŋ, mme iduot ntɔŋ, onyuŋ ebiet nte ŋkpɔ ɔbuhɔde ke esit ibibene;

³⁸ ndien yak oku ɔwɔrɔ ke esit ufɔk osim enyin-usuŋ ufɔk, onyuŋ ɔkɔbi ufɔk oro ke ofuri usen itiaba;

³⁹ ndien ke ɔyɔhɔ usen itiaba, yak oku afiak ekese: ndien, sese, udɔŋɔ oro ama atara ke ibibene ufɔk;

⁴⁰ yak oku ɔdɔhɔ ete esio itiat eke udɔŋɔ odude ke esit efep, eda mmɔ ekeduɔŋɔ ke ndek ebiet ke edem obio:

⁴¹ ndien anam ekwat esit ufɔk ekanade ekuk, enyuŋ emen ntan eke ekwatde efep ekeduɔk ke ndek ebiet ke edem obio:

⁴² ndien yak eda itiat efen, esin ke itie itiat oro; enyuŋ eda ntan efen etop ufɔk.

⁴³ Ndien edieke udɔŋɔ oro ɔtɔŋɔde ntak asiaha ke ufɔk, ke ema esioŋo itiat oro efep, enyuŋ ekwat ufɔk, enyuŋ etop, ema;

⁴⁴ yak oku edi edise, ndien, sese, edieke udɔŋɔ atarade ke ufɔk, ke edi idiɔk akpa-mfia ke ufɔk oro: enye edehe.

⁴⁵ Ndien enye owuri ufɔk oro, ye itiat esie, ye eto esie, ye ofuri ntan ufɔk oro; onyuŋ obiom aka ke ndek ebiet ke edem obio.

⁴⁶ Ndien ŋko owo eke odukde ke ufɔk ke ofuri ini emi ekekɔbide enye, edidehe tutu osim mbubreyo.

⁴⁷ Owo ŋko eke anade ke ufɔk oro onyuŋ enyene ndiyet edisine-ŋkpɔ esie; owo eke adiade ŋkpɔ ke ufɔk oro onyuŋ enyene ndiyet edisine-ŋkpɔ esie.

⁴⁸ Ekem oku ama oduk edise, ndien, sese, edieke udɔŋɔ oro mitarake ke ufɔk, ke ema eketop ufɔk ema: ndien yak oku onim ufɔk oro ke edisana: koro udɔŋɔ omokure:

⁴⁹ ndien yak enye ada inuen iba, ye eto cedar, ye iduot, ye hyssop, ofimere idiɔk ŋkpɔ ufɔk efep:

⁵⁰ ndien yak enye owot inuen kiet esin ke eso mbat ke enyɔŋ ndek mmɔŋ:

⁵¹ yak enye onyuŋ ada cedar, ye hyssop, ye iduot, ye inuen uwem, edebi ke iyip inuen emi ekewotde, ye ke ndek mmɔŋ oro, osime ufɔk utim ikatiaba:

⁵² ntre ke enye edida iyip inuen oro, ye ndek mmɔŋ, ye inuen uwem, ye cedar, ye hyssop, ye iduot, ofimere idiɔk ŋkpɔ ufɔk efep:

⁵³ ndien asana inuen uwem ke obio ayak ɔnyɔŋ ikɔt: ntem ke enye edisio isop ufɔk; ndien ufɔk edidi edisana.

⁵⁴ Emi edi ewuhɔ kpukpru oruk udɔŋɔ akpa-mfia, ye ŋkikan,

⁵⁵ ye eke akpa-mfia ɔfɔŋidem, ye eke ufɔk; ye eke mkpuk,

⁵⁶ ye eke ikpɔk,

⁵⁷ ye eke afia ŋkem; man eteme owo ini eke enye edehede, ye ini eke enye asanade: ewuhɔ akpa-mfia edi emi.