LEVITICUS 12 - Edisana ñwed Abasi Ibom

Nte Enamde Ŋwan Asana ke Ini Enye Amande Eyen Ama

¹ EKEM Jehovah ɔdɔhɔ Moses, ete, Dɔhɔ nditɔ Israel, ete,

² adaŋemi ŋwan oyomode, onyuŋ amande eyen-eren; enye (ŋwan) edidehe ke usen itiaba; nte mme usen ndek idiɔk itie edide ke enye edidehe.

³ Ndien ke ɔyɔhɔ usen itiaita yak esibe eyen mbobi.

⁴ Ndien yak ŋwan etie usen edip ye duopeta ke iyip uman enye asana; enye okutuk baba edisana ŋkpɔ kiet, okunyuŋ oduk ke edisana ebiet tutu ekem ke usen emi enamde enye asana.

⁵ Edi edieke enye amande eyen-aŋwan, enye edidi edidehe ke urua iba, nte ndek esie edide: ndien enye editie ke usen ata ye itiokiet ke iyip unam enye asana.

⁶ Ndien ke ekemde ke usen eke enye asanade, edide eke eyen-eren, onyuŋ edide eke eyen-aŋwan, yak enye ada eyen erɔŋ isua kiet ke edifɔp uwa, ye eyen ibiom, mme mbomoŋkuku, ke uwa idiɔk ido, edi ke enyin-usuŋ efe esop, edisɔk oku:

⁷ ndien yak enye ada enye edi ke iso Jehovah, onyuŋ osio isop ɔnɔ ŋwan; ndien enye edidi edisana ke ikɔ eriwɔrɔ iyip esie. Emi edi ewuhɔ ŋwan eke amande mme eren-owo, mme ŋwan.

⁸ Ndien edieke ubɔk mikemke enye ke eyen erɔŋ, yak enye ada mbomo ŋkuku iba, mme nditɔ ibiom iba, edi; kiet ke eke edifɔp uwa, kiet eken ke eke uwa idiɔk ido: ndien yak oku osio isop ɔnɔ enye, ndien enye edidi edisana.