LEVITICUS 1 - Edisana ñwed Abasi Ibom

Edifɔp Uwa

¹ NDIEN Jehovah etie ke tent esop okot Moses, onyuŋ ɔdɔhɔ enye, ete,

² Dɔhɔ nditɔ Israel, ete mmɔ, Ke ini owo mbufo kiet oyomde ndida enɔ nsɔk Jehovah, mbufo edida enɔ mbufo ke ufene, mme ke enaŋ, mme ke ŋkpri ufene esɔk.

³ Enɔ esie ama edi edifɔp uwa enaŋ, yak enye ada ayara eke ɔfɔnde ama ɔsɔk: yak ada enye edi ke enyin-usuŋ tent esop, man edi se idinamde enye enem Jehovah esit.

⁴ Ndien yak enye ada ubɔk esie odori edifɔp uwa ke ibuot; ndien enye akabare edi se idinamde enye enem Jehovah esit, ndisio isop esie.

⁵ Ndien yak enye owot enaŋ oro ke iso Jehovah: ndien nditɔ Aaron, mme oku, eda iyip esie edi, enyuŋ esime iyip oro ke itie-uwa emi ekperede enyin-usuŋ tent esop, ekanare ekuk.

⁶ Ndien enye osio ikpa edifɔp uwa efep, onyuŋ abak enye esin ke mbak esie.

⁷ Ndien yak nditɔ Aaron oku esin ikaŋ ke itie-uwa, enyuŋ ediɔŋ ifia edori ke ikaŋ.

⁸ Ndien nditɔ Aaron, mme oku, ediɔŋ mbak oro, ye ibuot, ye ikpɔŋ, edori ke ifia emi edorode ke ikaŋ emi odude ke itie-uwa.

⁹ Ndien yak owo ada mmɔŋ eyet ŋkpɔ esit idibi esie, ye nnuk esie: ndien oku ɔfɔp kpukpru ke itie-uwa, ke edifɔp uwa, uwa ikaŋ, ɔnɔ Jehovah ke edinem utebe.

¹⁰ Ndien enɔ esie ama oto ke ŋkpri ufene, mme ke erɔŋ, mme ke ebot, ke eke edifɔp uwa, yak enye ada ayara eke ɔfɔnde ama ɔsɔk.

¹¹ Ndien yak owot enye ke ŋkaŋ itie-uwa edem edere, ke iso Jehovah: ndien mme oku, nditɔ Aaron, eda iyip esie esime ke itie-uwa, ekenade ekuk.

¹² Ndien yak abak enye esin ke mbak esie, ye ibuot esie, ye ikpɔŋ esie; ndien oku ɔdiɔŋ mmɔ odori ke ifia emi odorode ke ikaŋ emi odude ke itie-uwa.

¹³ Ndien yak owo ada mmɔŋ eyet ŋkpɔ esit idibi esie, ye nnuk esie, ndien oku emen kpukpru ɔfɔp ke itie-uwa, enye edi edifɔp uwa, uwa ikaŋ, edinem utebe Jehovah.

¹⁴ Ndien edieke edifɔp uwa emi enye ɔnɔde Jehovah, otode ke inuen, yak enye ada mbomoŋkuku, mme nditɔ ibiom ɔnɔ ke enɔ esie.

¹⁵ Ndien oku ada enye edi ke itie-uwa, onyuŋ okibi enye ibuot, ɔfɔp ke itie-uwa: onyuŋ onyimi iyip esie eyet ke ŋkaŋ itie-uwa:

¹⁶ onyuŋ osio akpantan esie, ye ifuɔ esie efep, ɔduɔk ke edem usiaha-utin itie-uwa, ke ebiet ŋtɔŋ:

¹⁷ ndien asiak enye ke mba esie, edi okudianare efep: ndien yak oku ɔfɔp enye ke itie-uwa, ke ifia emi odorode ke ikaŋ: enye edi edifɔp uwa, uwa ikaŋ, edinem utebe Jehovah.