JUDGES 9 - Edisana ñwed Abasi Ibom

Ukara Abimelech

¹ EKEM Abimelech eyen Jerubbaal aka Shechem etiene nditɔ ete eka esie, ɔkɔdɔhɔ mmɔ, ye ofuri ubon ufɔk ete eka esie, ete,

² Mbɔk, mbufo edɔhɔ ke utɔŋ kpukpru mme enyene Shechem, ete, Ewe edifɔn mbufo ikan? Ke kpukpru nditɔ Jerubbaal, owo ata ye duop, ndida ubɔŋ mbufo, mme owo kiet ndida ubɔŋ mbufo? Mbufo eti ŋko, ete ke ami ndi ɔkpɔ mbufo ye obukidem mbufo.

³ Ndien nditɔ-ete eka esie edɔhɔ kpukpru ikɔ emi ebaŋa enye esin ke utɔŋ kpukpru mme enyene Shechem: ndien esit mmɔ akabare etiene Abimelech: koro mmɔ edɔhɔde ete, Enye edi eyen-ete nnyin.

⁴ Ndien mmɔ esio mbak silver ata ye duop ke ufɔk Baalberith, enɔ enye, ndien Abimelech ada mmɔ ekpe mbukpo ye otime-otime owo eke esaŋade ye enye.

⁵ Ndien enye aka ke ufɔk ete esie ke Ophrah, akada nditɔ-ete esie, nditɔ iren Jerubbaal, owo ata ye duop, owot ke enyɔŋ itiat kiet; edi Jotham ekpri eyen Jerubbaal ɔsuhɔ: koro enye okodibede.

⁶ Ndien kpukpru mme enyene Shechem, ye ofuri ufɔk Millo esop idem, ndien mmɔ eka ekenim Abimelech ɔbɔŋ ke ɔtɔ ofriyo adaha emi odude ke Shechem.

⁷ Ndien adaŋemi mmɔ eketiŋde enɔ Jotham, enye aka akada ke ibuot Gerizim, ndien emenere uyo esie ofiori, onyuŋ ɔdɔhɔ mmɔ, ete, Mbufo mme enyene Shechem, ekop uyo mi, man Abasi okpokop uyo mbufo.

⁸ Mme eto ekeka ndiyet ɔbɔŋ aran nnim ke idem-mmɔ;

⁹ ndien mmɔ; edɔhɔ olive, ete, Da ubɔŋ nnyin! Ndien olive ɔdɔhɔ mmɔ, ete, Nte ɔfɔn mi ndikpɔŋ aran mi emi edade mi ekpono Abasi ye owo ke esit, ndien ŋka ŋkenyeŋe ke enyɔŋ mme eto?

¹⁰ Ndien mme eto edɔhɔ fig, ete, Afo di da ubɔŋ nnyin.

¹¹ Edi fig ɔdɔhɔ mmɔ, ete, Nte ɔfɔn mi ndikpɔŋ iniŋe mi, ye eti mfri mi, ndien ŋka ŋkenyeŋe ke enyɔŋ mme eto?

¹² Ndien mme eto edɔhɔ vine, ete, Afo di da ubɔŋ nnyin.

¹³ Edi vine ɔdɔhɔ mmɔ, ete, Nte ɔfɔn mi ndikpɔŋ wine mi, emi adatde Abasi ye owo esit, ndien ŋka ŋkenyeŋe ke enyɔŋ mme eto?

¹⁴ Ekem, kpukpru mme eto edɔhɔ mbarekpe, ete, Afo di da ubɔŋ nnyin.

¹⁵ Ndien mbarekpe ɔdɔhɔ mme eto, ete, Edieke mbufo enimde mi ke ɔbɔŋ mbufo ke akpanikɔ, mbufo edi edibuɔt idem ke mfut mi; edi midige ntre, ikaŋ eyewɔrɔ ke mbarekpe akata mme cedar ke Lebanon.

¹⁶ Edieke mbufo enamde akpanikɔ ye esit kiet, ndien, ke erinim Abimelech ke ɔbɔŋ, edieke mbufo enyuŋ enamde se ifɔnde ye Jerubaal ye ufɔk esie, enyuŋ enam ye enye nte ekemde ye utom ubɔk esie;

¹⁷ koro ete mi akaŋwanade ekɔŋ ɔnɔ mbufo, onyuŋ emende uwem esie ɔduɔk, onyuŋ anyaŋa mbufo osio ke ubɔk Midian:

¹⁸ ndien mbufo ema edaha ke enyɔŋ, ebiat ufɔk ete mi mfin emi, ema enyuŋ eda nditɔ esie, owo ata ye duop, ewot ke enyɔŋ itiat kiet, enyuŋ eda Abimelech eyen aŋwan-esa esie enim ke ɔbɔŋ mme enyene Shechem: koro enye edide eyen-ete mbufo,

¹⁹ ndien edieke mbufo enamde akpanikɔ ye esit kiet enɔ Jerubbaal ye ufɔk esie mfin emi, mbufo edara Abimelech, yak enye onyuŋ adara mbufo:

²⁰ edi midige ntre, yak ikaŋ oto Abimelech ke idem ata mme enyene Shechem, ye ufɔk Millo; yak ikaŋ onyuŋ oto mme enyene Shechem, ye ufɔk Millo ke idem, ata Abimelech.

²¹ Ndien Jotham efehe, ɔbɔhɔ, aka Beer, onyuŋ oduŋ do abak Abimelech eyen-ete esie.

²² Ntre ke Abimelech ada ubɔŋ Israel ke isua ita.

²³ Ndien Abasi ɔdɔŋ idiɔk spirit esin ke ufɔt Abimelech ye mme enyene Shechem; ndien mme enyene Shechem ebiaŋa Abimelech;

²⁴ man afai oro ekenamde nditɔ Jerubbaal ata ye duop, edi, man iyip mmɔ onyuŋ ɔsɔp Abimelech eyen ete mmɔ, emi okowotde mmɔ; onyuŋ ɔsɔp mme enyene Shechem emi ekesɔŋde enye ubɔk owot nditɔ ete esie.

²⁵ Ndien mme enyene Shechem esin owo ke ikɔt ke enyɔŋ obot, ete ebet enye, ndien mmɔ ebume kpukpru owo eke esaŋade ke usuŋ oro ebe mmɔ: ndien emen eketiŋ enɔ Abimelech.

²⁶ Ekem Gaal eyen Ebed edi ye nditɔ-ete, esie edibe aka Shechem: ndien mme enyene Shechem ebuɔt idem mmɔ ye enye.

²⁷ Ekem ke adaŋemi mmɔ ewɔŋɔde eka iŋwaŋ eketet mfri vine mmɔ, enyuŋ edigi, ndien mmɔ enam usɔrɔ, enyuŋ eduk ke ufɔk abasi mmɔ, edia ŋkpɔ, enyuŋ eŋwɔŋ,

²⁸ enyuŋ esuŋi Abimelech. Ndien Gaal eyen Ebed ɔdɔhɔ ete, Abimelech edi anie? Shechem enyuŋ edi mme anie, eke nnyin ikpedide ikɔt esie? Nte enye idige eyen Jerubbaal? Nte Zebul idige andidaha owo esie? Mbufo edi ikɔt nditɔ Hamor ete Shechem: nnyin inyuŋ inam didie idi ikɔt esie?

²⁹ Mbio-obio emi ekpekam edu mi ke ubɔk, ŋkpebin Abimelech mfep. Ndien enye ɔdɔhɔ Abimelech, ete, Nam mbon-ekɔŋ fo ewak, ndien wɔrɔ di.

³⁰ Ndien adaŋemi Zebul etubom obio okopde ikɔ Gaal eyen Ebed, esit ayat enye.

³¹ Ndien enye ɔdɔŋ mme isuŋ-utom ke ɔtɔ Abimelech ke ndibe, ete, Sese, Gaal eyen Ebed ye nditɔ-ete esie emedi ke Shechem; ndien, sese, mmɔ edemere obio, ete esua fi.

³² Daha ke enyɔŋ ke okoneyo, ndien, afo ye mmɔ emi edude ye afo, nyuŋ dibe ke ikɔt bet:

³³ ndien ama ekem ke eyo esierede, ke ini utin asiahade, bak demere, di bumere obio; ndien, sese, adaŋemi enye ye mmɔ emi edude ye enye ewɔŋɔde eka ekɔŋ ye afo, nam mmɔ ke ukeme ubɔk fo.

³⁴ Ndien Abimelech ye kpukpru mmɔ emi edude ye enye, edaha ke enyɔŋ ke okoneyo, ndien mmɔ etim udim inaŋ edibe ebet Shechem.

³⁵ Ekem Gaal eyen Ebed ɔwɔrɔ akada ke inua-otop obio: ndien Abimelech, ye mmɔ emi edude ye enye edaha ke ebiet oro mmɔ ekedibede ebet.

³⁶ Ndien adaŋemi Gaal eyen Ebed okutde mmɔ, enye ɔdɔhɔ Zebul, ete Sese, owo ko ke eto ke ibuot obot esuhɔre. Edi Zebul ɔdɔhɔ enye, ete, Ke edi ukpɔŋ obot ke afo okut, ɔkɔm owo.

³⁷ Ndien Gaal ɔtɔŋɔ ntak ɔdɔhɔ ete, Sese, owo ke eto ke ibombom iŋwaŋ esuhɔre, udim efen ke onyuŋ asaŋa ke usuŋ ofriyo mbon-ibɔk edi.

³⁸ Ndien Zebul ɔdɔhɔ enye, ete, Enye ndien inua fo emi afo akadade ɔdɔhɔ ete, Abimelech edi anie eke nnyin ikpedide ikɔt esie? Nte idige mme mmɔ emi afo ekesinde ke ndek edi emi? Wɔrɔ, ndien, kaŋwana ye mmɔ.

³⁹ Ndien Gaal ebem mme enyene Shechem iso aka akaŋwara ye Abimelech.

⁴⁰ Ndien Abimelech ebine enye, ndien enye efehe enye ke iso, ediwak owo enyuŋ eda unan eduɔŋɔ, tutu osim ke inua-otop.

⁴¹ Ndien Abimelech oduŋ ke Arumah; Zebul onyuŋ ebin Gaal ye nditɔ-ete esie efep, ete ekuduŋ ke Shechem.

⁴² Edikem mkpɔŋ mbio-obio eka ke iŋwaŋ; ndien etiŋ enɔ Abimelech.

⁴³ Ndien enye ada ikɔt esie abahare esin ke udim ita, aka okodibe ke iŋwaŋ ebet, ndien enye okut, ndien, sese, adaŋemi mbio-obio ewɔŋɔde ke obio, enye adaha ke enyɔŋ aŋwana ye mmɔ, onyuŋ asuan mmɔ.

⁴⁴ Ndien Abimelech, ye udim oro edude ye enye, ebumere ekeda ke inua-otop obio mme udim iba eken enyuŋ ebumere ebine kpukpru mmɔ eke edude ke iŋwaŋ, enyuŋ ewot mmɔ.

⁴⁵ Abimelech onyuŋ aŋwana ye obio ke ofuri usen oro, onyuŋ ada obio, owot mmɔ eke edude ke esit; onyuŋ owuri obio, ndien ada inuŋ asuan ke esit.

⁴⁶ Ndien adaŋemi kpukpru mme enyene tower Shechem ekopde, mmɔ eduk ke ɔkpɔsɔŋ ebiet ufɔk El-berith.

⁴⁷ Ekem, owo etiŋ ɔnɔ Abimelech, ete, Kpukpru mme enyene tower Shechem emesop idem ɔtɔ kiet.

⁴⁸ Ndien Abimelech ɔdɔk obot Zalmon, ye kpukpru owo emi edude ye enye; ndien Abimelech ada ekuri ke ubɔk esie osibe ŋkɔk-eto kiet, ndien emen enye odori ke afara esiemɔ, onyuŋ ɔdɔhɔ kpukpru owo emi edude ye enye, ete, Se mbufo ekutde ami nnamde, ewara enam kpasuk nte ami.

⁴⁹ Ndien kpukpru owo kiet kiet enyuŋ esibe ŋkɔk mmɔ, ndien etiene Abimelech edem, ekebok mmɔ ke edikoŋ ufɔk oro, enyuŋ esin ikaŋ ke esit, efɔp edikoŋ ufɔk oro. Ntre ke kpukpru mbon tower Shechem ŋko enyuŋ ekpaŋa, esim tɔsin owo, ye iren ye iban.

⁵⁰ Ndien Abimelech aka Thebez akanam nna-ekɔŋ ekpere Thebez,

⁵¹ ndien ada enye. Edi ɔkpɔsɔŋ tower odu ke ufɔt obio: ndien kpukpru iren ye iban, ye kpukpru mme enyene obio efeŋe eduk do, ekɔbi usuŋ ebaha idem mmɔ; ndien edɔk ke enyuŋ tower oro.

⁵² Ndien Abimelech aka ke tower oro, akaŋwana ye enye, onyuŋ asaŋa ekpere enyin-usuŋ tower, ete ifɔp enye ke ikaŋ.

⁵³ Ndien ŋwan kiet otop itiat ɔkɔk, ɔtɔ Abimelech ke ibuot, asuan enye mkpɔkpɔrɔ.

⁵⁴ Ndien enye awara okot akparawa emi akamade ŋkpɔ-ekɔŋ esie, onyuŋ ɔdɔhɔ enye, ete, Sio ofut fo wot mi, mbak edidɔhɔ ebaŋa mi, ete ke edi ŋwan kiet okowot mi. Ndien akparawa esie okim enye owot.

⁵⁵ Ekem adaŋemi mbio Israel ekutde ete ke Abimelech amakpa, kpukpru owo enyɔŋɔ ke ebiet mmɔ.

⁵⁶ Ntem ke Abasi osio usiene idiɔk ido Abimelech, emi enye akanamde ye ete esie, ke eriwot nditɔ-ete esie owo ata ye duop.

⁵⁷ Abasi onyuŋ anam kpukpru mme idiɔk ido mbio-obio Shechem efiak edoro mmɔ ke ibuot: ndien isuŋi Jotham eyen Jerubbaal osim mmɔ.