JUDGES 8 - Edisana ñwed Abasi Ibom

Abasi Ada Ndidem Midian Esin Gideon ke Ubɔk

¹ NDIEN nditɔ Ephraim edɔhɔ enye, ete, Nsinam afo anamde ntem ye nnyin, emi afo mukokotke nnyin, adaŋemi afo akade ndiŋwana ekɔŋ ye Midian?

² Ndien mmɔ etɔhɔ ye enye eti-eti. Ndien enye ɔbɔrɔ mmɔ, ete, Nso ke ami ŋkanam ke emi ndien, ŋkem ye eke mbufo? Nte usaŋa mfiɔhɔ Ephraim ifɔnke ikan ukpeŋe Abiezer?

³ Abasi amada Oreb ye Zeeb, mbɔŋ Midian, esin mbufo ke ubɔk: ndien nso ke ami ŋkeme ndinam ŋkem ye eke mbufo? Ndien mmɔ esuhɔ esit ye enye, ke enye ama ɔkɔdɔhɔ mme ikɔ emi.

⁴ Ekem Gideon osim ke Jordan, ndien asaŋa ebe, ye owo ikie ita emi edude ye enye, ekpɔt, edi esuk ebine.

⁵ Ndien enye ɔdɔhɔ mbio-obio Succoth, ete, Mbɔk, mbufo eda uyo enɔ mbon emi esaŋade mi ke edem: koro mmɔ ekpade mba, ndien ami mmɔŋ mbine Zebah ye Zalmunna, ndidem Midian.

⁶ Edi mbon Succoth edɔhɔ ete, Nte eka-ubɔk Zebah ye Zalmunna edu fi ke ubɔk ke emi, eke nnyin ikpedade uyo inɔ udim-ekɔŋ fo?

⁷ Ndien Gideon ɔdɔhɔ ete, Mmɔdo Jehovah ama ada Zebah ye Zalmunnah esin mi ke ubɔk, nyeda akpap ye ŋkara ikɔt, mmiŋa mbufo obukidem.

⁸ Ndien enye adaha do ɔdɔk ke Penuel, onyuŋ ɔdɔhɔ mmɔ kpasuk ntre; ndien mbio-obio Penuel ebɔrɔ enye kpa nte mbio-obio Succoth ekebɔrɔde.

⁹ Ndien enye ɔdɔhɔ mbio-obio Penuel ŋko, ete, Mma mfiak ke ifure, nyewuri tower emi.

¹⁰ Ndien Zebah ye Zalmunnah edu ke Karkor ye mbon-ekɔŋ mmɔ ŋko, osim tɔsin efut, kpukpru owo eke esuhɔde ke ofuri mbon-ekɔŋ nditɔ edem usiaha-utin: koro tɔsin owo ke itie ikie ye edip eke esiode ofut ekeduɔŋɔde.

¹¹ Ndien Gideon ɔdɔk ke usuŋ mmɔ eke eduŋde ke tent ke edem usiaha-utin Nobah ye Jogbehah, akasuan mbon - ekɔŋ oro: koro nna-ekɔŋ eduede idem.

¹² Ndien Zebah ye Zalmunna efehe itɔk, edi enye ebine mmɔ, onyuŋ omum ndidem Midian mbiba, Zebah ye Zalmunna, onyuŋ esin kpukpru mbon-ekɔŋ ndik.

¹³ Ekem Gideon eyen Joash oto ke ekɔŋ afiak ke ebiet nte edɔkde ke Heres,

¹⁴ okomum akparawa obio Succoth kiet, onyuŋ obime enye: ndien enye ewet mbɔŋ Succoth, ye mbiowo mmɔ, owo ata ye efureba, ɔnɔ enye.

¹⁵ Ndien enye aka okosim mbio-obio Succoth, onyuŋ ɔdɔhɔ ete, Se Zebah ye Zalmunna, emi mbufo ekesakde mi ebaŋa, ete, Nte eka-ubɔk Zebah ye Zalmunna edu fi ke ubɔk, eke nnyin idade uyo inɔ ikɔt fo emi ekpɔtde?

¹⁶ Ndien enye ada mbiowo obio, ye akpap ye ŋkara ikɔt, ekpep mbio-obio Succoth.

¹⁷ Enye onyuŋ owuri tower Penuel, onyuŋ owot mbio-obio.

¹⁸ Ndien enye ɔdɔhɔ Zebah ye Zalmunna, ete, Mbio oro mbufo ekewotde ke Tabor, eketie didie? Ndien mmɔ ebɔrɔ ete, Nte afo etiede, kpa ntre ke mmɔ eketie; kpukpru mmɔ eye uyai nte nditɔ edidem.

¹⁹ Ndien enye ɔdɔhɔ ete, Mmɔ ekedi nditɔ-eka mi: ma uwem Jehovah, mbufo ekpenim mmɔ uwem, ŋkpowotke mbufo.

²⁰ Ndien enye ɔdɔhɔ Jether akpan esie, ete, Daha ke enyɔŋ kowot mmɔ. Edi eyen oro isioho ofut esie: koro ndik anam enye: koro enye edide kaŋa eyenɔwɔŋ.

²¹ Ndien Zebah ye Zalmunna edɔhɔ ete, Afo daha ke enyɔŋ di wot nnyin: koro nte owo etiede, kpa ntre ke odudu esie etie. Ndien Gideon adaha ke enyɔn owot Zebah ye Zalmunna, onyuŋ ɔkɔŋɔre ŋkpɔ mbana nte ŋkpri ɔfiɔŋ oro ekɔŋɔde mme camel mmɔ ke itɔŋ.

²² Ndien Israel edɔhɔ Gideon, ete, Da ubɔŋ nnyin, afo, ye eyen fo, ye eyeyen fo: koro afo amanyaŋa nnyin osio Midian ke ubɔk.

²³ Ndien Gideon ɔbɔrɔ, ete, Ami ndidaha ubɔŋ mbufo, eyen mi idinyuŋ idaha ubɔŋ mbufo: Jehovah eyedi andida ubɔŋ mbufo.

²⁴ Ndien Gideon ɔbɔrɔ mmɔ, ete, Mmɔŋ mbeŋe mbufo ebeŋe kiet, nte, Kpukpru mbufo enɔ mi mkpanuen utɔŋ mbume mbufo: koro mmɔ ekenyenede mkpanuen utɔŋ o gold, koro edide nditɔ Ishmael.

²⁵ Ndien mmɔ edɔhɔ, ete, Nnyin itreke ndinɔ. Ndien mmɔ ebri ekura kiet, ndien kpukpru owo eda mkpanuen o gold mbume mmɔ ediduɔk ke esit.

²⁶ Ndien udop mkpanuen o gold oro enye ekebeŋede osim tɔsin shekel gold ye ikie itiaba: ɔkɔrɔ ye ŋkpɔ mbana nte ŋkpri ɔfiɔŋ, ye ŋkwa, ye edisine-ŋkpɔ purple emi esiŋede ndidem Midian ke idem, onyuŋ ɔkɔrɔ ye ŋkpɔkɔbi emi ekɔŋɔde mme camel mmɔ ke itɔŋ.

²⁷ Ndien Gideon ada enye anam ephod kiet onim ke obio esie, ke Ophrah: ndien ofuri Israel ewaha etiene enye do; ndien enye akabara edi afia ye Gideon, ye ufɔk esie.

²⁸ Ntre ke Midian esuk ibuot ke iso nditɔ Israel, inyuŋ imenke aba ibuot mmɔ. Ndien isɔŋ ana suŋ ke ofuri isua aba ke eyo Gideon.

²⁹ Ekem Jerubbaal eyen Joash aka okoduŋ ke ufɔk esiemɔ.

³⁰ Gideon onyuŋ enyene nditɔ-iren ata ye duop emi enye okobonde: koro enye enyenede ediwak iban.

³¹ Ndien ŋwan esie emi okodude ke Shechem, aman eyen-eren ɔnɔ enye ŋko, emi osiode enye enyiŋ Abimelech.

³² Ekem Gideon eyen Joash akpa, ke ini enye ɔsɔŋde eti-eti, ndien ebuk enye ke udi Joash ete esie, ke Ophrah mme Abiezrite.

³³ Edikem adaŋemi Gideon akpade, nditɔ Israel ekabare etiene Baalim, enyuŋ enim Baal-berith ke abasi mmɔ.

³⁴ Nditɔ Israel inyuŋ itihi Jehovah Abasi mmɔ, emi akanyaŋade mmɔ osio ke ubɔk kpukpru mme asua mmɔ emi ekande mmɔ ekuk:

³⁵ mmɔ inyuŋ ifɔnke ido ye ufɔk Jerubbaal, kpa Gideon, nte ekemde ye kpukpru ufɔn eke enye ɔkɔfɔnde ye Israel.