JUDGES 7 - Edisana ñwed Abasi IbomGideon Akan Mbon Ekɔŋ Midian Ke Ekɔŋ 1 NDIEN Jerubbaal, emi edide Gideon, abak edemere, ye kpukpru owo oro edude ye enye, ndien eka ekenam nna ke mben idim Harod: ndien nna Midian odu mmɔ ke edem edere-edere, ke itihere obot Moreh. 2 Ndien Jehovah ɔdɔhɔ Gideon, ete, Mme mmɔ emi edude ye afo ewak ekan nte ndade Midian nsin mmɔ ke ubɔk, mbak Israel edibure mbure ye ami, ete, Ubɔk mi akanyaŋa mi. 3 Kam kwɔrɔ, ndien, sin ke utɔŋ mme mmɔ emi, ete, Yak owo ekededi eke efehede ndik, nsia onyuŋ oyomode enye, ɔkpɔŋ obot Gilead ke usenubɔk akabare ɔnyɔŋ. Ndien tɔsin owo edip ye iba ekabare enyɔŋɔ; ndien esuhɔ tɔsin owo duop. 4 Ndien Jehovah ɔdɔhɔ Gideon, ete, Mme mmɔ emi esuk ewak ekan: da mmɔ suhɔre ke mmɔŋ, man ndomo mmɔ do nnɔ fi: ndien ama ekem, owo eke ndidɔhɔde fi, nte, Emi edika ye afo, yak enye aka ye afo, ndien owo ekedide eke ndidɔhɔde fi, nte, Enye okuka, yak enye okuka. 5 Ndien enye ada mbon oro ɔsuhɔre ke mmɔŋ: ndien Jehovah ɔdɔhɔ Gideon, ete, Da kpukpru owo eke edidade edeme mmɔ edei mmɔŋ, kpa nte ebua edeide, kpɔnɔre nim edem kiet, ye kpukpru owo ŋko eke etɔŋɔde edɔŋ mmɔ eŋwɔŋ. 6 Ndien ibat mmɔ emi edade ubɔk mmɔ ekoi mmɔŋ esin ke inua, edi owo ikie ita: edi kpukpru mmɔ eken etɔŋɔ edɔŋ mmɔ enuhɔ eŋwɔŋ mmɔŋ. 7 Ndien Jehovah ɔdɔhɔ Gideon, ete, Nyeda owo ikie ita emi edeide nnyaŋa mbufo, nnyuŋ nda Midian nsin fi ke ubɔk: ndien yak kpukpru owo eken enyɔŋɔ ke ebiet mmɔ. 8 Ndien mbio oro eda udia ke ubɔk mmɔ, ye obukpoŋ mmɔ: enye onyuŋ ayak kpukpru owo Israel enyɔŋɔ ke tent mmɔ, edi onim owo ikie ita oro. Ndien nna Midian odu enye ke usuhɔre ke ebedeŋ. 9 Edikem, ke okoneyo oro, Jehovah ɔdɔhɔ enye, ete, Daha ke enyɔŋ suhɔre ka nna: koro mmada enye nsin fi ke ubɔk. 10 Edi edieke afo efehede ndisuhɔre, da Purah owo fo suhɔre ye enye ke nna: 11 nyuŋ kop se mmɔ edɔhɔde; ndien ubɔk eyesɔŋ fi ndisuhɔre ŋka ke nna. Ndien enye ada Purah owo esie ɔsuhɔre aka ke utit mbon-ekɔŋ oro edude ke nna. 12 Ndien Midian, ye Amalek, ye kpukpru nditɔ edem usiaha-utin ena efuk etihere nte ŋkukuŋkpɔyɔriyɔ ke uwak; ndien mme camel mmɔ enana ibat, nte ntan ke mben inyaŋ ke uwak. 13 Ndien ke ini Gideon edide, sese, owo kiet ke etiŋ ndap ɔnɔ mbɔhiduŋ esie, ete, Sese, ŋkadaba ndap, ndien, sese, obukpa uyo barley kiet ewet oduk ke nna Midian, aka okosim tent kiet, ɔtɔ enye ɔduɔk, onyuŋ owuri enye, ndien tent oro ɔduɔ ke isɔŋ ana. 14 Ndien mbɔhiduŋ esie ɔbɔrɔ ete, Emi idige ŋkpɔ baba kiet, ibɔhɔke ofut Gideon, eyen Joash, owo Israel: Abasi mmɔŋ ada Midian ye ofuri nna ekɔŋ emi esin enye ke ubɔk. 15 Edikem ke ini Gideon okopde mbuk ndap oro, ye nte esiakde enye, enye atuak ibuot, ndien afiak ke nna Israel, onyuŋ ɔdɔhɔ ete, Mbufo edaha ke enyɔŋ: koro Jehovah amada nna ekɔŋ Midian esin mbufo ke ubɔk. 16 Ndien enye abahare owo ikie ita oro esin ke udim ita, onyuŋ esin mmɔ kpukpru obukpoŋ ke ubɔk, ye ukpɔk abaŋ, ye nsaraŋikaŋ ke abaŋ. 17 Ndien enye ɔdɔhɔ mmɔ, ete, Mbufo ese mi, enyuŋ enam kpa nte ami nnamde; ndien, sese, ke ini ndisimde utit nna, ama ekem, nte ami nnamde, kpa ntre ke mbufo edinam. 18 Adaŋemi ami ye kpukpru mmɔ eke edude ye ami, ifuride obukpoŋ, mbufo ŋko ŋko enyuŋ ofuri obukpoŋ ekan ofuri nna ekuk, enyuŋ efiori ete, Ofut Jehovah ye eke Gideon. 19 Ekem Gideon ye owo ikie oro edude ye enye esim utit nna ke eritɔŋɔ ufɔt-ufɔt efen: ndien ndo-ndo oro mmɔ enim mbon-ukpeme: ndien mmɔ efuri obukpoŋ, enyuŋ enuak abaŋ oro odude mmɔ ke ubɔk. 20 Ntre ke mme udim ita oro efuri obukpoŋ, enyuŋ enuak abaŋ, enyuŋ emum nsaraŋikaŋ ke ubɔk mmɔ ufien, ye obukpoŋ ke ubɔk nnasia, efuri: ndien mmɔ efiori, ete, Ofut Jehovah ye eke Gideon. 21 Ndien kpukpru owo etuak eda ke itie mmɔ ekan nna ekuk. Ndien ofuri nna etibi itɔk, enyuŋ esioŋo mkpo, enyuŋ efeŋe. 22 Ntre ke owo ikie ita oro efuri obukpoŋ; ndien Jehovah esin kpukpru owo eda ofut eŋwana ye mbɔhiduŋ mmɔ, ye ofuri nna: ndien nna efeŋe esim ke Beth-shittah ke Zererah, ye ke mben Abel-meholah ebe Tabbath. 23 Ndien mmɔ ewuk nditɔ Israel, ete eto ke Naphtali, ye Asher, ye ofuri Manasseh, ebine Midian. 24 Ndien Gideon ɔdɔŋ mme isuŋ utom ke ofuri obot Ephraim, ekedɔhɔ ete, Mbufo esuhɔre ekebiɔŋɔ Midian, enyuŋ ebem mmɔ iso ekpehe mmɔŋ, tutu esim ke Beth-barah ye Jordan. Ndien kpukpru owo Ephraim esop idem, enyuŋ ekpehe mmɔŋ, tutu esim ke Beth-barah ye Jordan. 25 Mmɔ enyuŋ emum Oreb ye Zeeb, mbɔŋ Midian mbiba; ndien ewot Oreb ke ɔtɔ akamba itiat Oreb, enyuŋ ewot Zeeb ke ebiet udigi wine zeeb, enyuŋ ebine Midian, enyuŋ eda ibuot Oreb, ye ibuot Zeeb, edisɔk Gideon ke edem Jordan oko. |
Efik Old Bible With Sectional Headings © Bible Society of Nigeria, 2013, 2019.
Bible Society of Nigeria