JUDGES 6 - Edisana ñwed Abasi Ibom

Abasi Okot Gideon

¹ EKEM nditɔ Israel enam idiɔk ke iso Jehovah: ndien Jehovah ada mmɔ esin Midian ke ubɔk ke ofuri isua itiaba.

² Ndien ubɔk Midian ɔsɔŋ akan Israel: ndien Midian esin nditɔ Israel eka ekenam mme ebedeŋ emi edude ke ikpɔ obot, ye mme obube, ye mkpɔsɔŋ ebiet.

³ Ndien edikem adaŋa ini nte Israel etɔde ŋkpɔ, Midian ɔdɔk, ye Amalek, ye nditɔ edem usiaha-utin: ntem ke mmɔ edɔk eka ekɔŋ ye mmɔ;

⁴ enyuŋ enam nna eŋwana ekɔŋ ye mmɔ, enyuŋ ebiat mbuŋwum isɔŋ, tutu osim ke Gaza, inyuŋ ikpɔŋke se edade edu uwem ke Israel, baba erɔŋ, baba enaŋ, baba ass kiet.

⁵ Koro mmɔ edade ufene mmɔ ye tent mmɔ edɔk, ndien mmɔ ewak nte ŋkukuŋkpɔyɔriyɔ; ndien mmɔ ye mme camel mmɔ inyeneke ibat: ntre ke mmɔ eduk ke isɔŋ ete ibiat enye.

⁶ Ke ntre ke Midian enam Israel esuhɔre eti-eti; ndien nditɔ Israel eseme enɔ Jehovah.

⁷ Edikem adaŋemi nditɔ Israel esemede enɔ Jehovah ebaŋa Midian,

⁸ Jehovah ɔdɔŋ prophet kiet utom ke ɔtɔ nditɔ Israel, ndien enye ɔdɔhɔ mmɔ, ete, Ntem ke Jehovah Abasi Israel ɔdɔhɔ, ete, Ami ŋkada mbufo ke Egypt ndɔk, ŋkonyuŋ nsio mbufo ke ufɔk ufin mfep;

⁹ nnyuŋ nsio mbufo Egypt ke ubɔk, ye ke ubɔk kpukpru owo eke efikde mbufo, nnyuŋ nsioŋo mmɔ ke iso mbufo mfep, ndien nda isɔŋ mmɔ nnɔ mbufo;

¹⁰ ndien ndɔhɔ mbufo, nte, Ami ndi Jehovah Abasi mbufo; mbufo ekubak mme abasi mme Amorite, emi mbufo eduŋde ke isɔŋ mmɔ: edi mbufo ikokopke uyo mi.

¹¹ Ekem angel Jehovah oto editie ke idak ofriyo kiet emi odude ke Ophrah, emi enyenede Joash eyen Abiezer: ndien Gideon eyen esie ke oyibi wheat ke ɔtɔ udigi wine, man ada enye odip mme Midianite.

¹² Ndien angel Jehovah ɔbiɔŋɔre enye ke iso, onyuŋ ɔdɔhɔ enye, ete, Jehovah ododu ye afo owo uko.

¹³ Ndien Gideon ɔdɔhɔ enye, ete, O Ɔbɔŋ mi, edieke Jehovah odude ye nnyin, anam didie, ndien, kpukpru ŋkpɔ emi enam nnyin? Enye ŋko kpukpru mme utibe ŋkpɔ esie oro mme ete nnyin ekebukde enɔ nnyin, ete, Nte Jehovah ikadaha nnyin ke Egypt idɔk? Edi ke emi Jehovah ɔmɔkpɔŋ nnyin, onyuŋ ayak nnyin esin ke ubɔk Midian.

¹⁴ Ndien Jehovah ɔwɔŋɔre ese enye, onyuŋ ɔdɔhɔ ete, Da odudu fo emi ka, ndien afo eyenyaŋa Israel osio ke ubɔk Midian.

¹⁵ Nte idige ami ndɔŋ fi? Ndien enye ɔbɔrɔ Enye, ete, O Ɔbɔŋ mi, ami ndida nso nnyaŋa Israel? Sese, tɔsin mi ekpri akan ke Manasseh; ami nnyun ndi eyenɔwɔŋ ke ufɔk ete mi.

¹⁶ Ndien Jehovah ɔdɔhɔ enye, ete, Nditreke ndidu ye afo; ndien afo eyekɔt Midian anuak nte owo kiet.

¹⁷ Ndien enye ɔbɔrɔ, ete, Mbɔk, edieke afo amade mi, nam ndien idiɔŋɔ nɔ mi, ete ke afo ɔdɔhɔ ikɔ ye ami.

¹⁸ Mbɔk, kudaha mi tutu ndisim fi, nnyuŋ nsio enɔ mi nnim fi ke iso. Ndien enye ɔdɔhɔ, ete, Nyetie tutu afo afiak edi.

¹⁹ Ndien Gideon aka eketem eyenebot, onyuŋ ada eti ndom-uyo ke ephah kiet anam uyo, isinke leaven: enye esin unam ke akpasa esin efere ke eso, ndien emen ɔwɔrɔ okosim enye ke idak ofriyo oro, ɔnɔ enye.

²⁰ Ndien angel Abasi ɔdɔhɔ enye, ete, Men unam ye uyo oro leaven miduhe, dori ke itiat emi, nyuŋ ŋwaŋa efere.

²¹ Ndien enye anam ntre. Ndien angel Jehovah, anyan iso esaŋ emi odude enye ke ubɔk, otuk unam ye uyo oro leaven miduhe; ndien ikaŋ obubere ke itiat oro ɔdɔk, ata unam ye uyo oro leaven miduhe, ndien angel Jehovah osop enye ke enyin.

²² Ndien adaŋemi Gideon okutde ke enye edi angel Jehovah, Gideon ɔdɔhɔ ete, Ahah! Ɔbɔŋ Jehovah! ami mmokut angel Jehovah iso ye iso.

²³ Ndien Jehovah ɔdɔhɔ enye, ete, Ɔfɔfɔn ɔnɔ fi; kufehe ndik, udukpaha kpa.

²⁴ Ndien Gideon anam itie-uwa ɔnɔ Jehovah do, onyuŋ osio enye enyiŋ Jehovah-shalom. Enye osuk odu ke Ophrah mme Abiezrite tutu osim mfin emi.

²⁵ Edikem ke okoneyo oro, Jehovah ɔdɔhɔ enye, ete, Da ayara enaŋ emi enyenede usɔ, kpa udiana-akpa enaŋ isua itiaba, ndien wuri itie-uwa Baal emi enyenede usɔ, nyuŋ siak eto mkpe emi ɔwuhɔde enye ke ŋkaŋ:

²⁶ nyuŋ nam itie-uwa nɔ Jehovah Abasi fo ke enyɔŋ ɔkpɔsɔŋ ebiet emi, tim nam kpukpru, ndien da udiana-akpa enaŋ oro fɔp ke edifɔp uwa ke ifia eto-mkpe emi afo edisiakde.

²⁷ Ndien Gideon ada ikɔt esie owo duop, onyuŋ anam kpa nte Jehovah ɔkɔhɔde enye: ndien, edikem, koro enye efehede ufɔk ete esie, ye mbio-obio, enye inamke ke uwemeyo, edi anam ke okoneyo.

²⁸ Ndien adaŋemi mbio-obio edemerede ke usenbɔk, sese, itie uwa Baal omowure, ema enyuŋ esiak eto-mkpe emi odude enye ke ŋkaŋ, udiana-akpa enaŋ onyuŋ ɔfɔbɔ ke enyɔŋ itie-uwa oro ekenamde.

²⁹ Ndien kiet ɔdɔhɔ kiet, ete, Anie anam ŋkpɔ emi? Ndien adaŋemi mmɔ ebupde, enyuŋ eyomde, mmɔ edɔhɔ ete, Gideon eyen Joash akanam ŋkpɔ emi.

³⁰ Ekem mbio-obio edɔhɔ Joash, ete, Da eyen fo wɔrɔ di, man enye akpa: koro enye okowuride itie-uwa Baal, onyuŋ asiakde eto-mkpe emi adade enye ke ŋkaŋ.

³¹ Ndien Joash ɔdɔhɔ kpukpru mmɔ emi edade ekan enye ekuk, ete, Nte mbufo editɔhɔ utɔk enɔ Baal? Nte mbufo eyom enye ndinyaŋa? Owo eke editɔhɔde ɔnɔ enye eyekpa, tutu eyo esiere. Edieke enye edide abasi, yak enye ɔtɔhɔ ɔnɔ idem esie: koro owo okowuride itie-uwa esie.

³² Ndien ke usen oro esio enye enyiŋ Jerubbaal (Yak Baal Ɔtɔhɔ), ete, Yak Baal ɔtɔhɔ ye enye, koro enye okowuride itie-uwa esie.

³³ Ekem ofuri Midian, ye Amalek, ye nditɔ edem usiaha-utin esop idem. Ndien ebe ekenam nna ke itihere Jezreel.

³⁴ Ndien Spirit Jehovah odoro Gideon ke idem, ndien enye ofuri ukorowo; onyuŋ owuk Abiezer, ete etiene imɔ ke edem

³⁵ Enye onyuŋ ɔdɔŋ mme isuŋ-utom asaŋa ke edem Asher, ye Zebulun, ye Naphtali; ndien mmɔ edɔk ndisobo ye mmɔ.

³⁶ Ndien Gideon ɔdɔhɔ Abasi, ete, Edieke afo edidade ubɔk mi anyaŋa Israel, kpa nte afo ɔkɔdɔhɔde,

³⁷ Sese ami nyebri ofuri idet erɔŋ kiet ke ɔtɔ-ubek ibokpot; edieke mbara odude ke idet erɔŋ ikpɔŋ-ikpɔŋ, edi ofuri isɔŋ ama asat, nyefiɔk, ndien, nte afo eyeda ubɔk mi anyaŋa Israel, kpa nte afo ɔkɔdɔhɔde.

³⁸ Ndien ɔwɔrɔ ntre: ndien enye abak edemere ke usenubɔk, aka ekemiŋ idet erɔŋ, onyimi mbara ke idet efep, ndien mmɔŋ ɔyɔhɔ ke bowl kiet.

³⁹ Ndien Gideon ɔdɔhɔ Abasi, ete, Kuyat esit ye ami, ndien nyedɔhɔ kpa ini kiet emi: mbɔk, yak nda idet erɔŋ ndomo kpa ini kiet emi; mbɔk, yak idet erɔŋ ikpɔŋ-ikpɔŋ asat; yak mbara onyuŋ odu ke ofuri isɔŋ.

⁴⁰ Ndien Abasi anam ntre ke okoneyo oro: koro idet erɔŋ asatde ikpɔŋ-ikpɔŋ, mbara onyuŋ odu ke ofuri isɔŋ.